ਆਪਣੇ ਵੱਲ ਆਕਰਸ਼ਿਤ ਕਰਦਾ ਹੈ ਬਿਨਾਂ ਮੂਰਤੀ ਵਾਲਾ ਇਹ ਮੰਦਰ
ਇੱਥੇ ਯਕਸ਼ ਨੇ ਲਈ ਸੀ ਯੂਧਿਸ਼ਟਰ ਦੀ ਪਰੀਖਿਆ
ਨਵੀਂ ਦਿੱਲੀ: ਰਾਜਸਥਾਨ ਦੇ ਭਰਪੂਰ ਜ਼ਿਲ੍ਹੇ ਦੇ ਉਪਖੰਡ ਕਾਮਾਂ ਬਾਰੇ ਭਲੇ ਹੀ ਘਟ ਲੋਕਾਂ ਨੇ ਸੁਣਿਆ ਹੋਵੇ ਪਰ ਧਾਰਮਿਕ ਲੋਕਾਂ ਖ਼ਾਸ ਤੌਰ 'ਤੇ ਵੈਸ਼ਣਵਾਂ ਵਿਚ ਇਸ ਸਥਾਨ ਨੂੰ ਆਧਿਆਤਮਕ ਰੂਪ ਤੋਂ ਕਾਫ਼ੀ ਮਹੱਤਵਪੂਰਨ ਸਥਾਨ ਮੰਨਿਆ ਜਾਂਦਾ ਹੈ। ਕਾਮਾਂ ਦਾ ਕੁੱਝ ਹਿੱਸਾ ਬ੍ਰਜ ਭੂਮੀ ਨਾਲ ਲਗਦਾ ਹੈ ਜਿੱਥੇ ਭਗਵਾਨ ਕ੍ਰਿਸ਼ਣ ਨੇ ਅਪਣਾ ਬਚਪਨ ਗੁਜ਼ਾਰਿਆ ਸੀ। ਕਾਮਾਂ ਵਿਚ ਤੁਲਸੀ ਦੇ ਪੌਦੇ ਬਹੁਤ ਹਨ ਜਿਸ ਕਰ ਕੇ ਇਸ ਨੂੰ ਆਦੀ ਵ੍ਰਿੰਦਾਵਨ ਵੀ ਕਿਹਾ ਜਾਂਦਾ ਹੈ।
ਭਾਦੋਂ ਮਹੀਨੇ ਵਿਚ ਇੱਥੇ ਵਿਸ਼ੇਸ਼ ਵਣ ਯਾਤਰਾ ਹੁੰਦੀ ਹੈ ਜਿਸ ਵਿਚ ਵੈਸ਼ਣਵ ਸਮਾਜ ਦੇ ਲੋਕ ਹਿੱਸਾ ਲੈਂਦੇ ਹਨ। ਬਾਰਿਸ਼ ਦੇ ਮੌਸਮ ਵਿਚ ਇੱਥੋਂ ਦੇ ਚੀਲ ਮਹਿਲ ਵਿਚ ਮੇਲਾ ਵੀ ਲਗਦਾ ਹੈ ਜਿਸ ਨੂੰ ਪਰਿਕਰਮਾ ਮੇਲਾ ਕਿਹਾ ਜਾਂਦਾ ਹੈ। ਇਸ ਖੇਤਰ ਵਿਚ ਰਾਜਸਥਾਨ ਦੇ ਕੁੱਝ ਪ੍ਰਸਿੱਧ ਅਤੇ ਮਾਨਤਾ ਵਾਲੇ ਮੰਦਿਰ ਵੀ ਸਥਿਤ ਹਨ। ਇਹਨਾਂ ਵਿਚੋਂ ਇਕ ਚੌਰਾਸੀ ਖੰਬਾ ਮੰਦਿਰ ਹੈ। ਇਸ ਮੰਦਿਰ ਵਿਚ 84 ਪਿਲਰ ਹਨ ਜਿਸ ਦੇ ਆਧਾਰ 'ਤੇ ਇਸ ਨੂੰ ਇਹ ਨਾਮ ਦਿੱਤਾ ਜਾਂਦਾ ਹੈ।
ਇੱਥੇ ਕਿਸੇ ਵੀ ਭਗਵਾਨ ਦੀ ਮੂਰਤੀ ਨਹੀਂ ਹੈ ਅਤੇ ਨਾ ਹੀ ਕੋਈ ਪੂਜਾ ਹੁੰਦੀ ਹੈ ਫਿਰ ਵੀ ਇਸ ਨੂੰ ਮੰਦਿਰ ਕਿਹਾ ਜਾਂਦਾ ਹੈ। ਮੰਨਿਆ ਜਾਂਦਾ ਹੈ ਕਿ ਭਾਰਤ 'ਤੇ ਰਾਜ ਕਰਨ ਵਾਲੀਆਂ ਸ਼ਕਤੀਆਂ ਨੇ ਇਸ ਨੂੰ ਕਈ ਤਰ੍ਹਾਂ ਦੇ ਨੁਕਸਾਨ ਪਹੁੰਚਾਏ ਸਨ ਜਿਸ ਨਾਲ ਇਹ ਅਪਣਾ ਅਸਲ ਰੂਪ ਗੁਆ ਚੁੱਕਿਆ ਹੈ। ਇਸ ਮੰਦਿਰ ਨਾਲ ਜੁੜੀਆਂ ਅਨੋਖੀਆਂ ਗੱਲਾਂ ਟੂਰਿਸਟ ਵਿਚ ਜਗਿਆਸਾ ਜਗਾਉਂਦੀਆਂ ਹਨ ਜੋ ਯਾਤਰੀਆਂ ਨੂੰ ਖਿੱਚ ਕੇ ਲਿਆਉਂਦੀਆਂ ਹਨ।
ਦਰਅਸਲ ਚੌਰਾਸੀ ਖੰਬਾ ਮੰਦਿਰ ਵਿਚ ਅੱਜ ਤਕ ਕੋਈ ਵੀ ਸਹੀ ਗਿਣਤੀ ਦਾ ਪਤਾ ਨਹੀਂ ਲਗਾ ਸਕਿਆ। ਜੋ ਕੋਈ ਵੀ ਇਸ ਨੂੰ ਗਿਣਨ ਦੀ ਕੋਸ਼ਿਸ਼ ਕਰਦਾ ਹੈ ਤਾਂ ਉਸ ਨੂੰ ਜਾਂ ਤਾਂ ਜ਼ਿਆਦਾ ਖੰਬੇ ਦਿਖਾਈ ਦਿੰਦੇ ਹਨ ਜਾਂ ਫਿਰ ਘਟ। ਇਹਨਾਂ ਨੂੰ ਜਿੰਨੀ ਵਾਰ ਗਿਣਿਆ ਜਾਂਦਾ ਹੈ ਉੰਨੀ ਵਾਰ ਅਲੱਗ ਗਿਣਤੀ ਨਿਕਲਦੀ ਹੈ।
ਸਥਾਨਕ ਲੋਕਾਂ ਦਾ ਮੰਨਣਾ ਹੈ ਕਿ ਇਸ ਮੰਦਿਰ ਕੋਲ ਸਥਿਤ ਧਰਮ ਕੁੰਡ ਉਹੀ ਸਥਾਨ ਹੈ ਜਿੱਥੇ ਯਕਸ਼ ਨੇ ਯੂਧਿਸ਼ਟਰ ਦੀ ਪਰੀਖਿਆ ਲਈ ਸੀ। ਮਹਾਂਭਾਰਤ ਵਿਚ ਇਸ ਘਟਨਾ ਬਾਰੇ ਪੜ੍ਹਨ ਨੂੰ ਮਿਲਦਾ ਹੈ। ਇਸ ਵਿਚ ਕਿੰਨੀ ਸੱਚਾਈ ਹੈ ਇਸ ਬਾਰੇ ਕੋਈ ਵੀ ਠੋਸ ਸਬੂਤ ਮੌਜੂਦ ਨਹੀਂ ਹੈ।