foreign restaurants

ਨਵੀਂ ਦਿੱਲੀ, 22 ਮਈ : ਪਿਛਲਾ ਸਾਲ ਰੈਸਟੋਰੈਂਟ ਉਦਯੋਗ ਲਈ ਮੰਦਭਾਗਾ ਰਿਹਾ। ਪਿਛਲੇ 12 ਮਹੀਨਿਆਂ ਦੌਰਾਨ ਦੇਸ਼ ਵਿਚ 50 ਦੇ ਕਰੀਬ ਮਸ਼ਹੂਰ ਕੈਜੁਅਲ ਡਾਈਨਿੰਗ ਰੈਸਟੋਰੈਂਟ ਅਤੇ ਹੈਮਬਰਗਰ ਜੁਆਇੰਟਸ ਬੰਦ ਹੋ ਚੁੱਕੇ ਹਨ। ਲਾਗਤ ਵਧਣ, ਸਸਤੀਆਂ ਦਰਾਂ ਵਾਲੇ ਸਟ੍ਰੀਟ ਆਊਟਲੈਟਸ ਦੀ ਗਿਣਤੀ ਵਧਣ ਅਤੇ ਕਿਰਾਏ ਵਿਚ ਵਾਧੇ ਕਾਰਨ ਇਸ ਉਦਯੋਗ ਨੂੰ ਵੱਡਾ ਧੱਕਾ ਲਗਿਆ ਹੈ।

ਅਮਰੀਕਾ ਦੇ ਡੋਮੀਨੋਜ਼ ਅਤੇ ਡੰਕਿਨ ਡੌਨੱਟਸ ਦੇ ਭਾਰਤ ਵਿਚ ਸਟੋਰ ਚਲਾਉਣ ਵਾਲੇ ਜੁਬੀਲੈਂਟ ਫੂਡਵਰਕਰਸ ਵਲੋਂ ਸਾਲ ਭਰ ਵਿਚ ਘਾਟੇ ਦੀ ਮਾਰ ਸਹਿ ਰਹੇ 26 ਆਊਟਲੈਟਸ ਬੰਦ ਕਰ ਦਿਤੇ ਗਏ ਹਨ। ਟੀ.ਜੀ.ਆਈ. ਫਰਾਈਡੇਜ਼ ਨੇ ਪਿਛਲੇ ਮਹੀਨੇ ਤਿੰਨ ਸਟੋਰ ਬੰਦ ਕੀਤੇ ਜਦਕਿ ਦੋ ਹੋਰ ਅਮਰੀਕੀ ਚੇਨ ਵੇਂਡੀਜ਼ ਅਤੇ ਕ੍ਰਿਸਪੀ ਕ੍ਰੀਮ ਨੂੰ ਵੀ ਅਪਣੇ-ਅਪਣੇ ਸਟੋਰ ਬੰਦ ਕਰਨੇ ਪਏ। ਜੇ.ਐਸ.ਐਮ. ਹਾਸਪਿਟੈਲਿਟੀ ਦੀ ਕੈਲੇਫ਼ੋਰਨੀਆ ਪਿਜ਼ਾ ਕਿਚਨ ਅਤੇ ਦਿੱਲੀ ਦੀ ਕੈਫ਼ੇ ਆਊਟ ਆਫ਼ ਦਾ ਬਾਕਸ ਨੂੰ ਵੀ ਅਪਣੇ ਕੁੱਝ ਸਟੋਰ ਬੰਦ ਕਰਨੇ ਪਏ।

ਫ਼ੂਡ ਇੰਡਸਟ੍ਰੀਜ਼ ਲਈ ਆਨ ਲਾਈਨ ਪਲੇਟਫ਼ਾਰਮ ਟੈਗਟੇਸਟ ਦੀ ਸਥਾਪਨਾ ਕਰਨ ਵਾਲੇ, ਪ੍ਰਾਈਵੇਟ ਇਕੁਇਟੀ ਅਤੇ ਫ਼ੂਡ ਇੰਡਸਟਰੀਜ਼ ਦੇ ਦਿੱਗਜ ਜਸਪਾਲ ਸਭਰਵਾਲ ਨੇ ਦਸਿਆ, ਮਹਿੰਗਾਈ ਦਰ ਵਧਣ, ਜੀ.ਐਸ.ਟੀ. ਸਿਸਟਮ 'ਚ ਇਨਪੁਟ ਕ੍ਰੈਡਿਟ ਵਾਪਸ ਲਏ ਜਾਣ ਅਤੇ ਬਾਜ਼ਾਰ ਵਿਚ ਵਧ ਰਹੇ ਮੁਕਾਬਲੇ ਵਰਗੇ ਕਾਰਨਾਂ ਕਰ ਕੇ ਵਪਾਰ ਖੇਤਰ ਵਿਚ ਚੁਣੌਤੀਆਂ ਵਧ ਗਈਆਂ ਹਨ। ਉਨ੍ਹਾਂ ਦਸਿਆ ਕਿ ਨੋਟਬੰਦੀ ਤੋਂ ਪਹਿਲਾਂ 2015 ਵਿਚ ਉਦਯੋਗ ਦੀ ਜਿੰਨੀ ਸੇਲ ਰਹੀ ਸੀ ਇਸ ਸਾਲ ਸੇਲ ਉਸ ਤੋਂ ਵੀ ਘੱਟ ਰਹੇਗੀ।

ਉਦਯੋਗ ਦੀ ਸਮਝ ਰੱਖਣ ਵਾਲਿਆਂ ਦਾ ਕਹਿਣਾ ਹੈ ਕਿ ਭਾਰਤ ਵਿਚ ਹਲਦੀ ਰਾਮ ਵਰਗੇ ਲੋਕਲ ਸਨੈਕਸ ਦੀ ਵਿਕਰੀ ਮੈਕਡੌਨਲਡ ਨਾਲੋਂ ਵਧ ਹੈ। ਇਸ ਲਈ ਭਾਰਤ ਵਿਚ ਹੈਮਬਰਗਰ ਵਰਗੇ ਆਊਟਲੈਟਸ ਲਈ ਬਹੁਤ ਘੱਟ ਸਕੋਪ ਹੈ। ਉਨ੍ਹਾਂ ਨੇ ਦਸਿਆ ਕਿ ਪਿਛਲੇ 3-4 ਸਾਲ ਵਿਚ ਜਿਹੜੇ ਵਿਦੇਸ਼ੀ ਬਰਗਰ ਦੀ ਚੇਨ ਭਾਰਤ ਵਿਚ ਆਈ ਉਹ ਹੁਣ ਅਪਣੇ ਬਿਜ਼ਨਸ ਵਿਚ ਬਦਲਾਅ ਲਿਆ ਰਹੇ ਹਨ ਅਤੇ ਭਾਰਤ ਵਿਚ ਟਿਕਣ ਲਈ ਸਹੀ ਮਾਡਲ ਦੀ ਭਾਲ ਕਰ ਰਹੇ ਹਨ।

ਇਸ ਦੀ ਇਕ ਮਿਸਾਲ ਅਮਰੀਕੀ ਫੈਟ ਬਰਗਰ ਹੈ, ਜਿਸ ਨੇ ਗੁੜਗਾਉਂ 'ਚ ਅਪਣਾ ਇਕਲੌਤਾ ਸੋਟਰ ਬੰਦ ਕਰ ਦਿਤਾ। ਦੁਨੀਆਂ ਦੀ ਵੱਡੀ ਬਰਗਰ ਚੇਨ 'ਚੋਂ ਇਕ ਵੇਂਡੀਜ਼ ਨੇ ਕਿਹਾ ਕਿ ਉਹ ਭਾਰਤ ਵਿਚ 2019 ਤੱਕ 40-50 ਸਟੋਰ ਖੋਲਣਾ ਚਾਹੁੰਦੀ ਹੈ ਪਰ ਅਜੇ ਉਹ ਸਿਰਫ਼ ਦੋ ਸਟੋਰ ਹੀ ਆਪਰੇਟ ਕਰ ਰਹੀ ਹੈ। ਉਹ ਪਹਿਲਾਂ ਹੀ ਅਪਣੇ 3 ਸਟੋਰ ਬੰਦ ਕਰ ਚੁੱਕੀ ਹੈ।