Photo

ਨਵੀਂ ਦਿੱਲੀ: ਭਾਰਤੀ ਰਿਜ਼ਰਵ ਬੈਂਕ ਵੱਲੋਂ ਦਿੱਤੀ ਗਈ ਜਾਣਕਾਰੀ ਤੋਂ ਪਤਾ ਚੱਲਿਆ ਹੈ ਕਿ ਪਿਛਲੇ ਵਿੱਤੀ ਸਾਲ 2019-20 ਵਿਚ ਤਤਕਾਲੀਨ 18 ਸਰਕਾਰੀ ਬੈਂਕਾਂ ਵੱਲੋਂ ਕੁੱਲ 1,48,428 ਕਰੋੜ ਰੁਪਏ ਦੀ ਧੋਖਾਧੜੀ ਦੇ 12,416 ਦੇ ਮਾਮਲੇ ਦਰਜ ਕੀਤੇ ਗਏ। ਆਰਟੀਆਈ (ਸੂਚਨਾ ਦੇ ਅਧਿਕਾਰ) ਦੇ ਅਧਿਕਾਰੀ ਨੇ ਨਿਊਜ਼ ਏਜੰਸੀ ਪੀਟੀਆਈ ਨੂੰ ਦੱਸਿਆ ਕਿ ਆਰਬੀਆਈ ਨੇ ਉਹਨਾਂ ਨੂੰ ਆਰਟੀਆਈ ਦੇ ਤਹਿਤ ਇਹ ਜਾਣਕਾਰੀ ਦਿੱਤੀ ਹੈ।

ਰਿਜ਼ਰਵ ਬੈਂਕ ਦੁਆਰਾ ਆਰਟੀਆਈ ਤਹਿਤ ਦਿੱਤੀ ਗਈ ਜਾਣਕਾਰੀ ਵਿਚ ਬੈਂਕਿੰਗ ਧੋਖਾਧੜੀ ਦੇ ਮਾਮਲਿਆਂ ਵਿਚ ਉਸ ਸਮੇਂ ਦੇ 18 ਸਰਕਾਰੀ ਬੈਂਕਾਂ ਜਾਂ ਉਹਨਾਂ ਦੇ ਗ੍ਰਾਹਕਾਂ ਨੂੰ ਹੋਏ ਨੁਕਸਾਨ ਦਾ ਵਿਸ਼ੇਸ਼ ਵੇਰਵਾ ਨਹੀਂ ਦਿੱਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਬੀਤੇ ਸਾਲਾਂ ਵਿਚ ਕ੍ਰਮਵਾਰ ਰਲੇਵੇਂ ਤੋਂ ਬਾਅਦ ਦੇਸ਼ ਵਿਚ ਸਰਕਾਰੀ ਖੇਤਰ ਦੇ ਬੈਂਕਾ ਦੀ ਗਿਣਤੀ ਫਿਲਹਾਲ 12 ਰਹਿ ਗਈ ਹੈ।

ਆਰਟੀਆਈ ਤੋਂ ਮਿਲੇ ਅੰਕੜਿਆਂ ਨੂੰ ਦੇਖੀਏ ਤਾਂ ਬੀਤੇ ਸਾਲ ਵਿਚ ਧੋਖਾਧੜੀ ਦਾ ਸਭ ਤੋਂ ਵੱਡਾ ਸ਼ਿਕਾਰ ਸਰਕਾਰੀ ਖੇਤਰ ਦਾ ਚੋਟੀ ਦਾ ਬੈਂਕ ਭਾਰਤੀ ਸਟੇਟ ਬੈਂਕ ਬਣਿਆ ਹੈ। ਇਸ ਮਿਆਦ ਦੌਰਾਨ ਐਸਬੀਆਈ ਵਿਚ 44,612.93 ਕਰੋੜ ਰੁਪਏ ਦੀ ਧੋਖਾਧੜੀ ਨਾਲ ਜੁੜੇ 6,964 ਮਾਮਲੇ ਦਰਜ ਕੀਤੇ ਗਏ। ਇਹ ਰਕਮ ਬੀਤੇ ਵਿੱਤੀ ਸਾਲ ਦੌਰਾਨ 18 ਸਰਕਾਰੀ ਬੈਂਕਾਂ ਵਿਚ ਧੋਖਾਧੜੀ ਨਾਲ ਆਈ ਕੁੱਲ ਰਾਸ਼ੀ ਦਾ ਕਰੀਬ 30 ਫੀਸਦੀ ਹੈ।

ਆਰਬੀਆਈ ਨੇ ਦੱਸਿਆ ਕਿ ਪੰਜਾਬ ਨੈਸ਼ਨਲ ਬੈਂਕ ਵੱਲੋਂ ਇਕ ਅਪ੍ਰੈਲ, 2019 ਤੋਂ 31 ਮਾਰਚ 2020 ਦੀ ਮਿਆਦ ਦੌਰਾਨ ਧੋਖਾਧੜੀ ਦੇ 395 ਮਾਮਲੇ ਸੂਚਿਤ ਕੀਤੇ ਗਏ, ਜਿਨ੍ਹਾਂ ਵਿਚੋਂ 15,354 ਕਰੋੜ ਰੁਪਏ ਦੀ ਰਕਮ ਸ਼ਾਮਲ ਹੈ। ਇਸ ਸੂਚੀ ਵਿਚ ਤੀਜੇ ਸਥਾਨ ‘ਤੇ ਬੈਂਕ ਆਫ ਬੜੌਦਾ ਰਿਹਾ, ਜਿਸ ਵਿਚ 349 ਮਾਮਲਿਆਂ ਦੇ ਨਾਲ 12,586 ਕਰੋੜ ਰੁਪਏ ਦੀ ਧੋਖਾਧੜੀ ਸਾਹਮਣੇ ਆਈ ਹੈ।

ਦੱਸ ਦਈਏ ਕਿ ਬੈਂਕ ਆਫ ਬੜੌਦਾ ਵਿਚ ਵਿਜੈਆ ਬੈਂਕ ਅਤੇ ਦੇਨਾ ਬੈਂਕ ਦਾ ਰਲੇਵਾਂ ਇਕ ਅਪ੍ਰੈਲ 2019 ਵਿਚ ਅਮਲ ਵਿਚ ਆਇਆ ਸੀ। ਇਸ ਦੌਰਾਨ ਯੂਨੀਅਨ ਬੈਂਕ ਆਫ ਇੰਡੀਆ ਨੇ 424 ਮਾਮਲਿਆਂ ਵਿਚ 9,316.80 ਕਰੋੜ ਰੁਪਏ, ਬੈਂਕ ਆਫ਼ ਇੰਡੀਆ ਨੇ 200 ਮਾਮਲਿਆਂ ਵਿਚ 8,069.14 ਕਰੋੜ ਰੁਪਏ, ਕੇਨਰਾ ਬੈਂਕ ਨੇ 208 ਮਾਮਲਿਆਂ ਵਿਚ 7,519.30 ਕਰੋੜ ਰੁਪਏ, ਇੰਡੀਅਨ ਓਵਰਸੀਜ਼ ਬੈਂਕ ਨੇ 207 ਮਾਮਲਿਆਂ ਵਿਚ 7,275.48 ਕਰੋੜ ਰੁਪਏ, ਅਲਾਹਾਬਾਦ ਬੈਂਕ ਨੇ 896 ਮਾਮਲਿਆਂ ਵਿਚ 6,973.90 ਕਰੋੜ ਰੁਪਏ ਅਤੇ ਯੂਕੋ ਬੈਂਕ ਵੱਲੋਂ 119 ਮਾਮਲਿਆਂ ਵਿਚ 5,384.53 ਕਰੋੜ ਰੁਪਏ ਦੀ ਧੋਖਾਧੜੀ ਦੀ ਸੂਚਨਾ ਦਿੱਤੀ।

ਸੂਚਨਾ ਦੇ ਅਧਿਕਾਰ ਐਕਟ ਦੇ ਤਹਿਤ ਰਿਜ਼ਰਵ ਬੈਂਕ ਨੇ ਦੱਸਿਆ ਕਿ 1 ਅਪ੍ਰੈਲ, 2019 ਤੋਂ 31 ਮਾਰਚ, 2020 ਤੱਕ ਦੀ ਮਿਆਦ ਦੌਰਾਨ ਓਰੀਐਂਟਲ ਬੈਂਕ ਆਫ਼ ਕਾਮਰਸ ਨੇ 329 ਮਾਮਲਿਆਂ ਵਿਚ 5,340.87 ਕਰੋੜ ਰੁਪਏ, ਸਿੰਡੀਕੇਟ ਬੈਂਕ ਨੇ 438 ਮਾਮਲਿਆਂ ਵਿਚ 4,999.03 ਕਰੋੜ ਰੁਪਏ, ਕਾਰਪੋਰੇਸ਼ਨ ਬੈਂਕ ਨੇ 125 ਮਾਮਲਿਆਂ ਵਿਚ 4,816.60 ਕਰੋੜ, ਸੈਂਟਰਲ ਬੈਂਕ ਆਫ ਇੰਡੀਆ ਨੇ 900 ਮਾਮਲਿਆਂ ਵਿਚ 3,993.82 ਕਰੋੜ ਰੁਪਏ ਦੀ ਧੋਖਾਧੜੀ ਦੀ ਜਾਣਕਾਰੀ ਦਿੱਤੀ ਹੈ। 

ਆਂਧਰਾ ਬੈਂਕ ਦੇ 115 ਮਾਮਲਿਆਂ ਵਿਚ 3,462.32 ਕਰੋੜ ਰੁਪਏ, ਬੈਂਕ ਆਫ਼ ਮਹਾਰਾਸ਼ਟਰ ਨੇ 413 ਮਾਮਲਿਆਂ ਵਿਚ 3,391.13 ਕਰੋੜ ਰੁਪਏ, ਯੂਨਾਈਟਿਡ ਬੈਂਕ ਆਫ਼ ਇੰਡੀਆ ਨੇ 87 ਮਾਮਲਿਆਂ ਵਿਚ 2,679.72 ਕਰੋੜ ਰੁਪਏ, ਇੰਡੀਅਨ ਬੈਂਕ ਨੇ 225 ਮਾਮਲਿਆਂ ਵਿਚ 2,254.11 ਕਰੋੜ ਰੁਪਏ ਅਤੇ ਪੰਜਾਬ ਐਂਡ ਸਿੰਧ ਬੈਂਕ ਨੇ 67 ਮਾਮਲਿਆਂ ਵਿਚ 397. 28 ਕਰੋੜ ਰੁਪਏ ਦੀ ਧੋਖਾਧੜੀ ਦੀ ਜਾਣਕਾਰੀ ਦਿੱਤੀ ਹੈ।