File photo

ਨਵੀਂ ਦਿੱਲੀ- ਸਰਕਾਰ ਨੇ ਪੈਨਸ਼ਨਰਾਂ ਨੂੰ ਵੱਡਾ ਤੋਹਫਾ ਦਿੱਤਾ ਹੈ। ਪਰਸੋਨਲ, ਪਬਲਿਕ ਸ਼ਿਕਾਇਤਾਂ ਅਤੇ ਪੈਨਸ਼ਨ ਮੰਤਰਾਲੇ ਨੇ ਪੈਨਸ਼ਨ ਵੰਡਣ ਵਾਲੇ ਬੈਂਕਾਂ ਨੂੰ ਹਦਾਇਤ ਕੀਤੀ ਹੈ ਕਿ ਜਿਨ੍ਹਾਂ ਪੈਸ਼ਨਰਾਂ ਨੇ 30 ਨਵੰਬਰ ਤੱਕ ਆਪਣਾ ਜੀਵਨ ਸਰਟੀਫਿਕੇਟ ਜਮ੍ਹਾ ਨਹੀਂ ਕੀਤਾ ਉਹਨਾਂ ਪੈਨਸ਼ਨਰਾਂ ਤੋਂ  ਵੱਧ ਤੋਂ ਵੱਧ 60 ਰੁਪਏ ਚਾਰਜ ਲੈ ਕੇ ਉਹਨਾਂ ਦੇ ਘਰ ਤੇ ਇਹ ਸੁਵਿਧਾ ਉਪਲੱਬਧ ਕਰਵਾਈ ਜਾਵੇ।

ਇਸ ਬਾਰੇ 17 ਜਨਵਰੀ 2020 ਨੂੰ ਇਕ ਸਰਕੂਲਰ ਜਾਰੀ ਕੀਤਾ ਗਿਆ ਹੈ। ਦੱਸ ਦਈਏ ਕਿ ਹਰ ਸਾਲ ਸਰਕਾਰੀ ਪੈਨਸ਼ਨਰ ਨੂੰ ਆਪਣਾ ਜੀਵਿਤ ਰਹਿਣ ਦਾ ਸਰਟੀਫਿਕੇਟ ਨਵੰਬਰ ਵਿਚ ਬੈਂਕ ਵਿਚ ਜਮ੍ਹਾ ਕਰਨਾ ਪੈਂਦਾ ਹੈ ਤਾਂ ਜੋ ਉਸਦੀ ਪੈਨਸ਼ਨ ਨਾ ਰੁਕੇ। ਸਾਰੇ ਪੈਨਸ਼ਨਰਾਂ ਦਾ ਜੀਵਨ ਸਰਟੀਫਿਕੇਟ ਜਮ੍ਹਾ ਹੋਵੇ ਇਹ ਸੁਰੱਖਿਅਤ ਕਰਨ ਲਈ ਮੰਤਰਾਲੇ ਨੇ ਬੈਂਕਾਂ ਨੂੰ ਹਰ ਸਾਲ 1 ਦਸੰਬਰ ਨੂੰ ਜੀਵਨ ਸਰਟੀਫਿਕੇਟ ਜਮ੍ਹਾ ਨਾ ਕਰਨ ਵਾਲਿਆਂ ਦੀ ਸੂਚੀ ਤਿਆਰ ਕਰਨ ਲਈ ਕਿਹਾ ਹੈ।

ਬੈਂਕ ਨੂੰ ਕਿਹਾ ਗਿਆ ਹੈ ਕਿ ਉਹ ਐਸਐਮਐਸ ਅਤੇ ਈਮੇਲ ਦੇ ਜ਼ਰੀਏ ਪੈਨਸ਼ਨਰਾਂ ਨੂੰ ਯਾਦ ਕਰਾਉਣ ਜੋ ਲਾਈਫ ਸਰਟੀਫਿਕੇਟ ਜਮ੍ਹਾ ਨਹੀਂ ਕਰਦੇ। ਮੈਸੇਜ ਜਾਂ ਮੇਲ ਭੇਜਣ ਦੇ ਨਾਲ ਹੀ ਬੈਂਕ ਨੂੰ ਇਹ ਵੀ ਪੁੱਛਣਾ ਹੋਵੇਗਾ ਕਿ ਕੀ ਤੁਸੀਂ ਘਰ ਵਿਚ ਜੀਵਨ ਪ੍ਰਮਾਣ ਪੱਤਰ ਜਮ੍ਹਾਂ ਕਰਨ ਦੀ ਸੁਵਿਧਾ ਪ੍ਰਾਪਤ ਕਰਨਾ ਚਾਹੁੰਦੇ ਹੋ। ਬੈਂਕ 24 ਅਕਤੂਬਰ, 1 ਨਵੰਬਰ, 15 ਨਵੰਬਰ ਅਤੇ 25 ਨਵੰਬਰ ਨੂੰ ਪੈਨਸ਼ਨਰਾਂ ਨੂੰ ਮੈਸੇਜ ਅਤੇ ਈਮੇਲ ਭੇਜ ਕੇ ਯਾਦ ਦਿਲਵਾਉਣਗੇ।

ਪਿਛਲੇ ਸਾਲ 18 ਜੁਲਾਈ 2019 ਨੂੰ ਇਕ ਸਰਕੁਲਰ ਜਾਰੀ ਕਰ ਕੇ ਕੇਂਦਰ ਸਰਕਾਰ ਨੇ 80 ਸਾਲ ਤੋਂ ਜ਼ਿਆਦਾ ਉਮਰ ਵਾਲੇ ਪੈਸ਼ਨਰਾਂ ਨੂੰ ਆਪਣਾ ਜੀਵਨ ਸਰਟੀਫਿਕੇਟ ਜਮ੍ਹਾਂ ਕਰਨ ਲਈ 1 ਨਵੰਬਰ ਦੀ ਥਾਂ 'ਤੇ 1 ਅਕਤੂਬਰ ਦੀ ਤਾਰੀਕ ਦਿੱਤੀ ਸੀ।