Depression

ਹੈਦਰਬਾਦ: ਮਲਟੀਨੈਸ਼ਨਲ ਕੰਪਨੀ ਵਿਚ ਕੰਮ ਕਰ ਰਹੀ ਇਕ ਲੜਕੀ ਨੇ ਅਪਣਾ ਆਈਏਐਸ ਦਾ ਸੁਪਨਾ ਪੂਰਾ ਕਰਨ ਲਈ ਐਚਆਰ ਮੈਨੇਜਰ ਦੀ ਨੌਕਰੀ ਛੱਡ ਦਿੱਤੀ। ਪਰ ਸਾਲਾਂ ਦੀ ਸਖਤ ਮਿਹਤਨ ਤੋਂ ਬਾਅਦ ਵੀ ਜਦੋਂ ਉਹ ਆਈਐਸ ਦੀ ਪ੍ਰੀਖਿਆ ਪਾਸ ਨਹੀਂ ਕਰ ਸਕੀ ਤਾਂ ਉਹ ਤਣਾਅ ਦਾ ਸ਼ਿਕਾਰ ਹੋ ਗਈ।

ਆਈਏਐਸ ਦੀ ਪ੍ਰੀਖਿਆ ਪਾਸ ਨਾ ਹੋਣ ਕਾਰਨ ਉਸ ਨੂੰ ਇੰਨਾ ਡੂੰਘਾ ਸਦਮਾ ਲੱਗਿਆ ਕਿ ਉਹ ਕੂੜਾ ਚੁੱਕਣ ਦਾ ਕੰਮ ਕਰਨ ਲੱਗੀ। ਮੀਡੀਆ ਰਿਪੋਰਟਾਂ ਮੁਤਾਬਕ ਲੜਕੀ ਨੇ ਕਰੀਬ 8 ਮਹੀਨੇ ਪਹਿਲਾਂ ਅਪਣਾ ਘਰ ਛੱਡਿਆ। ਇਸ ਤੋਂ ਬਾਅਦ ਉਹ ਡੇਢ ਹਜ਼ਾਰ ਕਿਲੋਮੀਟਰ ਦੀ ਦੂਰੀ 'ਤੇ ਗੋਰਖਪੁਰ ਪਹੁੰਚ ਗਈ। ਲੜਕੀ ਦੀ ਤਸਵੀਰ ਸੋਸ਼ਲ ਮੀਡੀਆ 'ਤੇ ਕਾਫ਼ੀ ਵਾਇਰਲ ਹੋ ਰਹੀ ਹੈ।

ਜਾਣਕਾਰੀ ਅਨੁਸਾਰ ਰਜਨੀ ਨਾਮ ਦੀ ਇਹ ਲੜਕੀ ਵਾਰੰਗਲ (ਤੇਲੰਗਾਨਾ) ਦੀ ਰਹਿਣ ਵਾਲੀ ਹੈ। 23 ਜੁਲਾਈ ਨੂੰ ਉਹ ਗੋਰਖਪੁਰ ਦੇ ਤਿਵਾੜੀਪੁਰ ਥਾਣੇ ਨੇੜੇ ਮਿਲੀ ਸੀ। ਉਸ ਸਮੇਂ ਉਹ ਕੂੜੇਦਾਨ ਨੇੜੇ ਪਏ ਚਾਵਲ ਖਾ ਰਹੀ ਸੀ। ਸਥਾਨਕ ਲੋਕਾਂ ਨੇ ਉਸ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ, ਜਦੋਂ ਉਸ ਨੇ ਪੁਲਿਸ ਕਰਮਚਾਰੀਆਂ ਨੂੰ ਦੇਖਿਆ ਤਾਂ ਉਹ ਅੰਗਰੇਜ਼ੀ ਬੋਲਣ ਲੱਗੀ।

ਪੁਲਿਸ ਮੁਲਾਜ਼ਮਾਂ ਨੇ ਉਸ ਨੂੰ ਸਥਾਨਕ ਚੈਰੀਟੇਬਲ ਫਾਊਂਡੇਸ਼ਨ ਦੇ ਹਵਾਲੇ ਕਰ ਦਿੱਤਾ, ਜਿੱਥੇ ਲੜਕੀ ਦਾ ਤਿੰਨ ਮਹੀਨਿਆਂ ਤੋਂ ਇਲਾਜ ਚੱਲਿਆ। ਸਿਹਤ ਵਿਚ ਕੁਝ ਸੁਧਾਰ ਹੋਣ ਤੋਂ ਬਾਅਦ ਲੜਕੀ ਨੇ ਅਪਣੇ ਪਰਿਵਾਰ ਬਾਰੇ ਦੱਸਿਆ।

ਲੜਕੀ ਦੇ ਪਿਤਾ ਨੇ ਦੱਸਿਆ ਕਿ ਰਜਨੀ ਨੇ ਸਾਲ 2000 ਵਿਚ ਫਸਟ ਡਵੀਜ਼ਨ 'ਚ ਐਮਬੀਏ ਪਾਸ ਕੀਤੀ ਸੀ। ਉਸ ਦਾ ਸੁਪਨਾ ਆਈਏਐਸ ਬਣਨਾ ਸੀ। ਉਸ ਨੇ ਦੋ ਵਾਰ ਸਿਵਲ ਸੇਵਾਵਾਂ ਦੀ ਪ੍ਰੀਖਿਆ ਦਿੱਤੀ ਪਰ ਉਹ ਅਸਫਲ ਰਹੀ । ਇਸ ਦੇ ਚਲਦਿਆਂ ਉਹ ਉਦਾਸ ਰਹਿਣ ਲੱਗੀ ਤੇ ਤਣਾਅ ਵਿਚ ਚਲੀ ਗਈ।