ਨਵੀਂ ਦਿੱਲੀ- ਪਾਕਿਸਤਾਨ ਦੇ ਸ਼ਹਿਰ ਪੇਸ਼ਾਵਰ ’ਚ 23 ਸਾਲਾਂ ਦੀ ਪਾਬੰਦੀ ਤੋਂ ਬਾਅਦ ਸੁਨਹਿਰੀ ਮਸਜਿਦ ’ਚ ਔਰਤਾਂ ਦੁਬਾਰਾ ਨਮਾਜ਼ ਅਦਾ ਕਰ ਸਕਣਗੀਆਂ। ਏਜੰਸੀਆਂ ਦੀ ਰਿਪੋਰਟ ਮੁਤਾਬਕ ਮਸਜਿਦ ਦੇ ਨਾਇਬ ਇਮਾਮ ਮੁਹੰਮਦ ਇਸਮਾਇਲ ਨੇ ਕਿਹਾ ਕਿ 1996 ਤੱਕ ਔਰਤਾਂ ਨੂੰ ਜੁੰਮੇ ਦੀ ਖ਼ਾਸ ਨਮਾਜ਼ ਪੜ੍ਹਨ ਦੀ ਇਜਾਜ਼ਤ ਸੀ ਪਰ ਵਧਦੇ ਅਤਿਵਾਦ ਕਾਰਨ ਉਨ੍ਹਾਂ ਨੂੰ ਅਜਿਹਾ ਕਰਨ ’ਤੇ ਰੋਕ ਲਾ ਦਿੱਤੀ ਗਈ ਸੀ।

ਮੀਡੀਆ ਰਿਪੋਰਟਾਂ ਅਨੁਸਾਰ ਮਸਜਿਦ ਪ੍ਰਸ਼ਾਸਨ ਵੱਲੋਂ ਇਸ ਕਦਮ ਦਾ ਐਲਾਨ ਕੀਤੇ ਜਾਣ ਤੋਂ ਬਾਅਦ ਲਗਭਗ 20 ਔਰਤਾਂ ਨੇ ਪਰਸੋਂ ਸ਼ੁੱਕਰਵਾਰ ਨੂੰ ਜੁੰਮੇ ਦੀ ਨਮਾਜ਼ ਅਦਾ ਕੀਤੀ। ਔਰਤਾਂ ਲਈ ਮਸਜਿਦ ਦੀ ਉੱਪਰਲੀ ਮੰਜ਼ਿਲ ਉੱਤੇ ਵੱਡੇ ਹਾਲ ’ਚ ਜੁੰਮੇ ਦੀ ਨਮਾਜ਼ ਅਦਾ ਕਰਨ ਦਾ ਇੰਤਜ਼ਾਮ ਕੀਤਾ ਗਿਆ ਹੈ। ਮਸਜਿਦ ਪ੍ਰਸ਼ਾਸਨ ਦੇ ਬੈਨਰ ’ਤੇ ਵੀ ਅਜਿਹਾ ਲਿਖਿਆ ਗਿਆ ਹੈ। ਔਰਤਾਂ ਨੂੰ ਈਦ ਦੀ ਨਮਾਜ਼ ਦੀ ਵੀ ਇਜਾਜ਼ਤ ਹੋਵੇਗੀ।

ਇਸਮਾਇਲ ਨੇ ਦੱਸਿਆ ਕਿ ਅਸੀਂ ਉੱਪਰਲੇ ਹਿੱਸੇ ਨੂੰ ਦੋਬਾਰਾ ਖੋਲ੍ਹ ਦਿੱਤਾ ਹੈ, ਤਾਂ ਜੋ ਔਰਤਾਂ ਇੱਕ ਵੱਖਰੀ ਥਾਂ ਉੱਤੇ ਜੁੰਮੇ ਦੀ ਨਮਾਜ਼ ਅਦਾ ਕਰ ਸਕਣ ਅਤੇ ਖ਼ੁਤਬਾ ਸੁਣ ਸਕਣ। ਜੁੰਮੇ ਦੀ ਨਮਾਜ਼ ਅਦਾ ਕਰਨ ਵਾਲੀ 45 ਸਾਲਾ ਕੌਸਰ ਸ਼ਾਹ ਨੇ ਕਿਹਾ ਕਿ ਮੈਂ ਸੱਚਮੁਚ ਖ਼ੁਸ਼ ਹਾਂ ਤੇ ਇਹ ਵਾਕਈ ਇੱਕ ਚੰਗਾ ਫ਼ੈਸਲਾ ਹੈ। ਸਾਨੂੰ ਉਮੀਦ ਹੈ ਕਿ ਮਸਜਿਦ ਪ੍ਰਸ਼ਾਸਨ ਔਰਤਾਂ ਨੂੰ ਨਿਯਮਤ ਤੌਰ ’ਤੇ ਵੀ ਇਜਾਜ਼ਤ ਦੇਵੇਗਾ।