Suicide

ਕੋਟਾ : ਆਏ ਦਿਨ ਕੋਟਾ ਤੋਂ ਵਿਦਿਆਰਥੀਆਂ ਦੀ ਖੁਦਕੁਸ਼ੀ ਦੀਆਂ ਖਬਰਾਂ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ।ਰਾਜਸਥਾਨ ਦੇ ਕੋਟਾ 'ਚ ਤਿੰਨ ਦਿਨਾਂ ਦੇ ਅੰਦਰ ਦੋ ਵਿਦਿਆਰਥੀਆਂ ਨੇ ਖੁਦਕੁਸ਼ੀ ਕਰ ਲਈ ਹੈ। ਦੇਸ਼ ਦਾ ਕੋਚਿੰਗ ਹਬ ਕੋਟਾ ਇਸ ਸਾਲ ਹੁਣ ਤੱਕ ਤਿਆਰੀ ਕਰ ਰਹੇ 13 ਵਿਦਿਆਰਥੀਆਂ ਦੀ ਮੌਤ ਦਾ ਗਵਾਹ ਬਣ ਚੁੱਕਿਆ ਹੈ। ਤਿੰਨ ਦਿਨਾਂ ਵਿਚ ਜਿਸ ਦੂਜੀ ਵਿਦਿਆਰਥਣ ਨੇ ਖੁਦਕੁਸ਼ੀ ਕੀਤੀ ਹੈ, ਉਹ ਮਹਾਰਾਸ਼ਟਰ ਦੀ ਰਹਿਣ ਵਾਲੀ ਸੀ ਅਤੇ ਇੱਥੇ ਨੀਟ ਦੀ ਤਿਆਰੀ ਕਰ ਰਹੀ ਸੀ। ਮੰਗਲਵਾਰ ਨੂੰ ਉਸ ਦੀ ਲਾਸ਼ ਹਾਸਟਲ ਦੇ ਕਮਰੇ ਵਿਚ ਫ਼ਾਹਾ ਲੈ ਕੇ ਲਟਕਦੇ ਮਿਲੀ।  

ਪੁਲਿਸ ਨੇ ਦੱਸਿਆ ਕਿ 11ਵੀ ਦੀ ਵਿਦਿਆਰਥਣ ਸਾਕਸ਼ੀ ਮਹਾਰਾਸ਼ਟਰ ਦੀ ਨਿਵਾਸੀ ਸੀ ਅਤੇ ਉਹ ਇਥੇ ਕੁੰਹਾੜੀ ਲੈਂਡਮਾਰਕ ਸਥਿਤ ਇਕ ਹਾਸਟਲ ਵਿਚ ਰਹਿ ਰਹੀ ਸੀ। ਸੋਮਵਾਰ ਦੇਰ ਰਾਤ ਤਕ ਉਹ ਹੋਰ ਵਿਦਿਆਰਥੀਆਂ ਦੇ ਨਾਲ ਬੈਠ ਕੇ ਪੜ੍ਹਾਈ ਕਰ ਰਹੀ ਸੀ। ਉਸ ਤੋਂ ਬਾਅਦ ਉਹ ਅਪਣੇ ਕਮਰੇ ਵਿਚ ਚੱਲੀ ਗਈ। ਮੰਗਲਵਾਰ ਨੂੰ ਦੁਪਹਿਰ ਤੱਕ ਉਹ ਹਾਸਟਲ ਦੇ ਕਮਰੇ ਤੋਂ ਬਾਹਰ ਨਹੀਂ ਆਈ। ਉਸ ਤੋਂ ਪਹਿਲਾਂ ਸੱਭ ਨੇ ਸੋਚਿਆ ਕਿ ਉਸ ਨੇ ਦੇਰ ਰਾਤ ਤੱਕ ਪੜ੍ਹਾਈ ਕੀਤੀ ਹੈ ਇਸ ਲਈ ਸੋ ਰਹੀ ਹੋਵੇਗੀ ਪਰ ਦੁਪਹਿਰ ਇਕ ਵੱਜਣ ਤੋਂ ਬਾਅਦ ਵਾਰਡਨ ਨੇ ਦਰਵਾਜਾ ਠਕਠਕਾਇਆ।

ਕੋਈ ਜਵਾਬ ਨਾ ਮਿਲਿਆ ਤਾਂ ਉਨ੍ਹਾਂ ਨੂੰ ਕੁੱਝ ਗਡ਼ਬਡ਼ ਲੱਗੀ। ਵਾਰਡਨ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਮੌਕੇ 'ਤੇ ਪਹੁੰਚੀ ਪੁਲਿਸ ਨੇ ਦਰਵਾਜਾ ਤੋੜਿਆ ਤਾਂ ਸਾਹਮਣੇ ਸਾਕਸ਼ੀ ਦੀ ਲਾਸ਼ ਫ਼ਾਹਾ ਲਏ ਹੋਏ ਲਟਕ ਰਹੀ ਸੀ।  ਪੁਲਿਸ ਨੇ ਸਾਕਸ਼ੀ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿਤਾ ਹੈ। ਪੁੱਛਗਿਛ ਵਿਚ ਉਸ ਦੀ ਸਹੇਲੀਆਂ ਨੇ ਦੱਸਿਆ ਕਿ ਸਾਕਸ਼ੀ ਅਪਣੀ ਪੜ੍ਹਾਈ ਨੂੰ ਲੈ ਕੇ ਬਹੁਤ ਪਰੇਸ਼ਾਨ ਰਹਿੰਦੀ ਸੀ। ਪੁਲਿਸ ਨੇ ਸਾਕਸ਼ੀ ਦੇ ਪਰਵਾਰ ਨੂੰ ਸੂਚਨਾ ਭੇਜ ਦਿਤੀ ਹੈ। ਇਸ ਤੋਂ ਪਹਿਲਾਂ ਐਤਵਾਰ ਨੂੰ ਬਿਹਾਰ ਦੇ ਇਕ ਵਿਦਿਆਰਥੀ ਨੇ ਵੀ ਇੱਥੇ ਖੁਦਕੁਸ਼ੀ ਕਰ ਲਈ ਸੀ।

ਉਹ ਆਈਆਈਟੀ ਦੀ ਤਿਆਰੀ ਕਰ ਰਿਹਾ ਸੀ। ਡਾਕਟਰੀ ਅਤੇ ਇੰਜਨੀਅਰਿੰਗ ਦੀ ਕੋਚਿੰਗ ਲੈਣ ਲਈ ਹਰ ਸਾਲ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ 1.50 ਲੱਖ ਤੋਂ ਵੱਧ ਵਿਦਿਆਰਥੀ ਕੋਟਾ ਆਉਂਦੇ ਹਨ। ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ ਦਿਤੇ ਅੰਕੜਿਆਂ ਮੁਤਾਬਕ 2013 ਤੋਂ 2017 ਤੱਕ ਕੋਟਾ 'ਚ ਕੋਚਿੰਗ ਕਰਨ ਵਾਲੇ 58 ਵਿਦਿਆਰਥੀ ਖੁਦਕੁਸ਼ੀ ਕਰ ਚੁਕੇ ਹਨ।