Students

ਨਵੀਂ ਦਿੱਲੀ: ਕੌਂਸਲ ਫਾਰ ਇੰਡੀਅਨ ਸਕੂਲ ਸਰਟੀਫਿਕੇਟ ਐਗਜ਼ਾਮੀਨੇਸ਼ਨ (ਸੀਆਈਐਸਸੀਈ) ਨੇ ਸ਼ੁੱਕਰਵਾਰ ਨੂੰ ਆਈਸੀਐਸਈ (10ਵੀਂ)ਅਤੇ ਆਈਐਸਸੀ (12ਵੀਂ) ਕਲਾਸ ਦੇ ਨਤੀਜੇ ਜਾਰੀ ਕਰ ਦਿੱਤੇ ਹਨ। ਇਸ ਸਾਲ ਬੋਰਡ ਨੇ ਅਸਾਧਾਰਣ ਹਲਾਤਾਂ ਨੂੰ ਦੇਖਦੇ ਹੋਏ ਮੈਰਿਟ ਲਿਸਟ ਜਾਰੀ ਨਹੀਂ ਕੀਤੀ ਹੈ। ਨਾ ਹੀ ਬੋਰਡ ਨੇ ਆਈਸੀਐਸਈ ਦੇ ਟਾਪਰਾਂ ਦਾ ਐਲ਼ਾਨ ਕੀਤਾ ਗਿਆ ਅਤੇ ਨਾ ਹੀ ਆਈਐਸਸੀ ਦੇ ਟਾਪਰਾਂ ਦੇ ਨਾਮ ਐਲਾਨੇ ਗਏ।

ਜ਼ਿਕਰਯੋਗ ਹੈ ਕਿ ਸੀਆਈਐਸਸੀਈ ਨੇ ਕੋਰੋਨਾ ਵਾਇਰਸ ਮਹਾਂਮਾਰੀ ਦੇ ਚਲਦਿਆਂ ਬਾਕੀ ਪ੍ਰੀਖਿਆਵਾਂ ਰੱਦ ਕਰ ਦਿੱਤੀਆਂ ਸਨ। ਬੋਰਡ ਨੇ ਰੱਦ ਹੋਈਆਂ ਪ੍ਰੀਖਿਆਵਾਂ ਦੇ ਨੰਬਰ ਇਕ ਵਿਕਲਪਕ ਮੁਲਾਂਕਣ ਯੋਜਨਾ ਦੇ ਜ਼ਰੀਏ  ਦਿੱਤੇ ਹਨ, ਜਿਸ ਦਾ ਐਲਾਨ ਪਿਛਲੇ ਹਫ਼ਤੇ ਕੀਤਾ ਗਿਆ ਸੀ। ਮੁਲਾਂਕਣ ਯੋਜਨਾ ਮੁਤਾਬਕ ਉਮੀਦਵਾਰਾਂ ਦਾ ਮੁਲਾਂਕਣ ਤਿੰਨ ਮਾਪਦੰਡਾਂ ਦੇ ਅਧਾਰ ‘ਤੇ ਕੀਤਾ ਗਿਆ।

ਇਹਨਾਂ ਵਿਚ ਸਰਬੋਤਮ ਤਿੰਨ ਵਿਸ਼ਿਆਂ ਦੇ ਅੰਕ, ਉਹਨਾਂ ਦੇ ਅੰਦਰੂਨੀ ਮੁਲਾਂਕਣ ਦੇ ਅੰਕ ਅਤੇ ਪ੍ਰਾਜੈਕਟ ਦਾ ਮੁਲਾਂਕਣ ਸ਼ਾਮਲ ਹੈ। ਵਿਦਿਆਰਥੀਆਂ ਨੂੰ ਉਹਨਾਂ ਵਿਸ਼ਿਆਂ ਵਿਚੋਂ ਤਿੰਨ ਦੇ ਸਭ ਤੋਂ ਵਧੀਆਂ ਪ੍ਰਤੀਸ਼ਤ ਅੰਕਾਂ ਦਾ ਇਕ ਔਸਤ ਮਿਲਿਆ, ਜਿਸ ਦੇ ਲਈ ਬੋਰਡ ਪ੍ਰੀਖਿਆ ਹੋ ਚੁੱਕੀ ਸੀ। ਇਸ ਸਾਲ ਦੋਵੇਂ ਕਲਾਸਾਂ ਵਿਚ ਪਿਛਲੇ ਸਾਲ ਤੋਂ ਵਧੀਆਂ ਨਤੀਜਾ ਰਿਹਾ।

ਇਸ ਵਾਰ ਆਈਸੀਐਸਈ ਵਿਚ 99.33 ਫੀਸਦੀ ਵਿਦਿਆਰਥੀ ਪਾਸ ਹੋਏ ਜਦਕਿ ਪਿਛਲੇ ਸਾਲ 98.54 ਫੀਸਦੀ ਵਿਦਿਆਰਥੀ ਪਾਸ ਹੋਏ ਸੀ। ਉੱਥੇ ਹੀ ਆਈਸੀਐਸ ਵਿਚ ਇਸ ਵਾਰ 96.84 ਫੀਸਦੀ ਵਿਦਿਆਰਥੀ ਪਾਸ ਹੋਏ ਹਨ ਜਦਕਿ ਪਿਛਲੇ ਸਾਲ 96.52 ਫੀਸਦੀ ਵਿਦਿਆਰਥੀ ਪਾਸ ਹੋਏ ਸੀ। ਵਿਦਿਆਰਥੀ cisce.org ਅਤੇ results.cisce.org ‘ਤੇ ਜਾ ਕੇ ਅਪਣਾ ਨਤੀਜਾ ਚੈੱਕ ਕਰ ਸਕਦੇ ਹਨ।

ਵੈੱਬਸਾਈਟ ਤੋਂ ਇਲਾਵਾ ਵਿਦਿਆਰਥੀ ਐਸਐਮਐਸ ਦੇ ਜ਼ਰੀਏ ਵੀ ਅਪਣਾ ਨਤੀਜਾ ਜਾਣ ਸਕਦੇ ਹਨ। ਇਸ ਦੇ ਲਈ ਵਿਦਿਆਰਥੀਆਂ ਨੂੰ ਅਪਣੀ ਆਈਡੀ 09248082883 ਨੰਬਰ ‘ਤੇ ਭੇਜਣੀ ਹੋਵੇਗੀ। ਇਸ ਦੇ ਲਈ ‘ICSE/ISC (Unique ID)' ਲਿਖ ਕੇ 09248082883 ਨੰਬਰ ‘ਤੇ ਭੇਜਣੀ ਹੋਵੇਗੀ ਅਤੇ ਨਤੀਜਾ ਤੁਹਾਨੂੰ ਫੋਨ ‘ਤੇ ਮਿਲ ਜਾਵੇਗਾ।