ਚੰਡੀਗੜ੍ਹ:  ਸਾਈਬਰ ਧੋਖਾਧੜੀ ਦੇ ਮਾਮਲਿਆਂ ਵਿਚ ਹੋ ਰਹੇ ਵਾਧੇ ਦੇ ਚਲਦਿਆਂ ਚੰਡੀਗੜ੍ਹ ਪੁਲਿਸ ਦਾ ਸਾਈਬਰ ਸੈੱਲ ਭਾਰਤੀ ਰਿਜ਼ਰਵ ਬੈਂਕ ਦੀ ਮਦਦ ਲੈਣ ਜਾ ਰਿਹਾ ਹੈ। ਦਰਅਸਲ ਚੰਡੀਗੜ੍ਹ ਪੁਲਿਸ ਵੱਲੋਂ ਆਰੀਬੀਆਈਰ ਨੂੰ ਇਕ ਐਡਵਾਇਜ਼ਰੀ ਜਾਰੀ ਕਰਨ ਦੀ ਮੰਗ ਕੀਤੀ ਜਾਵੇਗੀ, ਜਿਸ ਵਿਚ ਡਿਜੀਟਲ ਪੇਮੈਂਟ ਗੇਟਵੇਅ ਅਤੇ ਵਿੱਤੀ ਸੇਵਾ ਕੰਪਨੀਆਂ ਨੂੰ ਉਹਨਾਂ ਦੀਆਂ ਐਪਸ ਨੂੰ ਹੋਰ ਸੁਰੱਖਿਅਤ ਬਣਾਉਣ ਲਈ ਕਿਹਾ ਜਾਵੇਗਾ।

ਜਾਣਕਾਰੀ ਮੁਤਾਬਕ ਚੰਡੀਗੜ੍ਹ ਪੁਲਿਸ ਵੱਖ-ਵੱਖ ਤਰ੍ਹਾਂ ਦੇ ਪੇਮੈਂਟ ਮੋਡ ਅਤੇ ਉਹਨਾਂ ਨਾਲ ਜੁੜੀ ਧੋਖਾਧੜੀ ਬਾਰੇ ਆਰਬੀਆਈ ਨੂੰ ਜਾਣਕਾਰੀ ਦੇਵੇਗੀ। ਉੱਥੇ ਹੀ ਕੁਝ ਕਮੀਆਂ ਕਾਰਨ ਕੰਪਨੀਆਂ ਦੇ ਪੇਮੈਂਟ ਗੇਟਵੇਅ ਨੂੰ ਹੈਕਰਜ਼ ਵੱਲੋਂ ਬਾਈਪਾਸ ਕਰਕੇ ਧੋਖਾਧੜੀ ਦੇ ਢੰਗ ਬਾਰੇ ਵੀ ਦੱਸਿਆ ਜਾਵੇਗਾ।

ਦੱਸ ਦੇਈਏ ਕਿ ਹਾਲ ਹੀ ਵਿਚ ਹੈਕਰਾਂ ਨੇ ਪਾਲ ਮਰਚੈਂਟਸ ਦੀ ਮੋਬਾਈਲ ਐਪ ਹੈਕ ਕਰਕੇ 1.95 ਕਰੋੜ ਰੁਪਏ ਦੀ ਠੱਗੀ ਮਾਰੀ ਸੀ । ਇਸ ਮਾਮਲੇ ਵਿਚ ਪੁਲਿਸ ਨੇ ਪੰਜ ਮੁਲਜ਼ਮ ਕਾਬੂ ਕੀਤੇ ਹਨ ਅਤੇ ਕੁਝ ਫਰਾਰ ਹਨ। ਪਾਲ ਮਰਚੈਂਟਸ ਦੀ ਪਾਲਪੇ V2.0 ਐਪ ਵਿਚ ਇਕ ਬੱਗ ਦਾ ਪਤਾ ਲਗਾ ਕੇ ਸਾਈਬਰ ਅਪਰਾਧੀਆਂ ਨੇ ਧੋਖਾਧੜੀ ਕੀਤੀ ਸੀ। ਜਾਣਕਾਰੀ ਮੁਤਾਬਕ ਪਾਲ ਮਰਚੈਂਟ ਦੀ ਐਪ ਨੂੰ ਬਰਪ ਸੂਟ ਪ੍ਰੋ ਹੈਕਿੰਗ ਟੂਲਕਿੱਟ ਦੀ ਵਰਤੋਂ ਨਾਲ ਹੈਕ ਗਿਆ ਸੀ।