Navjot Singh Sidhu

ਚੰਡੀਗੜ੍ਹ: ਕਿਸਾਨੀ ਸੰਘਰਸ਼ ਦੇ ਸਮਰਥਨ ਵਿਚ ਕਾਂਗਰਸ ਨੇਤਾ ਨਵਜੋਤ ਸਿੰਘ ਸਿੱਧੂ ਨੇ ਕੇਂਦਰ ਸਰਕਾਰ ‘ਤੇ ਫਿਰ ਹਮਲਾ ਬੋਲਿਆ ਹੈ। ਨਵਜੋਤ ਸਿੱਧੂ ਨੇ ਟਵੀਟ ਕਰ ਕੇ ਕਿਹਾ ਕਿ ਕਿਸਾਨ ਕੋਈ ਕਰਜ਼ਾ ਮੁਆਫੀ ਜਾਂ ਸਬਸਿਡੀ ਨਹੀਂ ਮੰਗ ਰਹੇ। ਉਹ ਅਪਣੇ ਹੱਕ ਦੀ ਕਮਾਈ ਤੇ ਉਚਿਤ ਕੀਮਤਾਂ ਲਈ ਲੜ ਰਹੇ ਹਨ।

ਕੇਂਦਰ ਸਰਕਾਰ ਸਵਾਮੀਨਾਥਰ ਕਮਿਸ਼ਨ ਦੇ ਸੀ2 ਫਾਰਮੂਲੇ ਨੂੰ ਲਾਗੂ ਕਰਨ ਦੀ ਬਜਾਏ ਕਿਸਾਨ ਦੀ ਆਮਦਨ ‘ਤੇ ਕਬਜ਼ਾ ਕਰ ਰਹੀ ਹੈ। ਕੇਂਦਰ ਸਰਕਾਰ ਨੇ ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਦਾ ਵਾਅਦਾ ਕੀਤਾ ਪਰ ਸਰਕਾਰ ਨੇ ਉਹਨਾਂ ਨੂੰ 6000 ਰੁਪਏ ਦੇ ਦਿੱਤੇ ਯਾਨੀ ਕਿ ਹਰ ਮਹੀਨੇ 500 ਰੁਪਏ ਦਾ ਲੋਲੀਪੋਪ ਫੜ੍ਹਾ ਦਿੱਤਾ।

ਨਵਜੋਤ ਸਿੱਧੂ ਨੇ ਕਿਹਾ ਕਿ 1970 ਵਿਚ 73 ਰੁਪਏ ਪ੍ਰਤੀ ਕੁਇੰਟਲ ਕਣਕ ਦੀ ਐਮਐਸਪੀ ਸੀ। ਇਕ ਪ੍ਰੋਫੈਸਰ ਨੂੰ 90 ਰੁਪਏ ਤਨਖ਼ਾਹ ਮਿਲਦੀ ਸੀ, ਉਹਨਾਂ ਦੀ ਤੇ ਸਰਕਾਰੀ ਕਰਮਚਾਰੀਆਂ ਦੀ ਤਨਖ਼ਾਹ ਅੱਜ 1000 ਗੁਣਾ ਵਧ ਗਈ। ਪਰ ਕਿਸਾਨ ਦੀ ਐਮਐਸਪੀ ਸਿਰਫ਼ 19 ਗੁਣਾ ਵਧੀ ਹੈ।

ਉਹਨਾਂ ਕਿਹਾ ਕਿ ਸਰਕਾਰ ਕਿਸਾਨਾਂ ਨੂੰ 6000 ਰੁਪਏ ਦੇ ਕੇ ਮਜ਼ਾਕ ਕਰ ਰਹੀ ਹੈ। ਕਿਸਾਨਾਂ ਨੂੰ ਇਕ ਦਿਨ ਦਾ ਹੀ 1000-2000 ਮਿਲਣਾ ਚਾਹੀਦਾ ਹੈ। ਉਹਨਾਂ ਕਿਹਾ ਕਿਸਾਨਾਂ ਨੂੰ ਸਰਕਾਰ ਲੋਲੀਪੋਪ ਦੇ ਰਹੀ ਹੈ, ਜਿਸ ਵਿਚ ਕੁਝ ਨਹੀਂ ਹੈ।