ਹਰਿਦੁਆਰ: ਆਰਐੱਸਐੱਸ ਮੁਖੀ ਮੋਹਨ ਭਾਗਵਤ ਨੇ ਕਿਹਾ ਕਿ ਸਨਾਤਨ ਧਰਮ ਹੀ ਹਿੰਦੂ ਰਾਸ਼ਟਰ ਹੈ। ਭਾਰਤ 15 ਸਾਲਾਂ ਵਿਚ ਮੁੜ ਅਖੰਡ ਭਾਰਤ ਬਣੇਗਾ। ਇਹ ਸਭ ਅਸੀਂ ਆਪਣੀਆਂ ਅੱਖਾਂ ਨਾਲ ਦੇਖਾਂਗੇ। ਉਹਨਾਂ ਕਿਹਾ ਕਿ ਭਾਵੇਂ ਸੰਤਾਂ ਤੋਂ ਮਿਲੀ ਜੋਤਿਸ਼ ਅਨੁਸਾਰ 20 ਤੋਂ 25 ਸਾਲਾਂ ਵਿਚ ਭਾਰਤ ਮੁੜ ਅਖੰਡ ਭਾਰਤ ਬਣੇਗਾ। ਜੇਕਰ ਅਸੀਂ ਸਾਰੇ ਰਲ ਕੇ ਇਸ ਕੰਮ ਦੀ ਰਫਤਾਰ ਵਧਾ ਦੇਈਏ ਤਾਂ 10 ਤੋਂ 15 ਸਾਲਾਂ ਵਿਚ ਅਖੰਡ ਭਾਰਤ ਬਣ ਜਾਵੇਗਾ।

Mohan Bhagwat

ਇਕ ਪ੍ਰੋਗਰਾਮ ਦੌਰਾਨ ਆਰਐੱਸਐੱਸ ਮੁਖੀ ਨੇ ਕਿਹਾ ਕਿ ਭਾਰਤ ਤਰੱਕੀ ਦੇ ਰਾਹ 'ਤੇ ਲਗਾਤਾਰ ਅੱਗੇ ਵੱਧ ਰਿਹਾ ਹੈ। ਜੋ ਇਸ ਦੇ ਰਾਹ ਵਿਚ ਆਉਂਦੇ ਹਨ ਉਹ ਖਤਮ ਹੋ ਜਾਂਦੇ ਹਨ। ਉਹਨਾਂ ਕਿਹਾ ਕਿ ਅਸੀਂ ਸਿਰਫ਼ ਅਹਿੰਸਾ ਦੀ ਗੱਲ ਕਰਾਂਗੇ ਪਰ ਹੱਥ ਵਿਚ ਸੋਟੀ ਲੈ ਕੇ ਇਹ ਕਹਾਂਗੇ। ਸਾਡੇ ਮਨ ਵਿਚ ਕੋਈ ਨਫ਼ਰਤ, ਦੁਸ਼ਮਣੀ ਨਹੀਂ ਹੈ ਪਰ ਜੇਕਰ ਦੁਨੀਆਂ ਸ਼ਕਤੀ ਨੂੰ ਹੀ ਮੰਨਦੀ ਹੈ ਤਾਂ ਅਸੀਂ ਕੀ ਕਰੀਏ?

Mohan Bhagwat

ਉਹਨਾਂ ਕਿਹਾ ਕਿ ਸਾਡੀ ਕੌਮੀਅਤ ਹਰ ਸਮੇਂ ਗੰਗਾ ਦੇ ਵਹਾਅ ਵਾਂਗ ਵਹਿ ਰਹੀ ਹੈ। ਜਦੋਂ ਤੱਕ ਦੇਸ਼ ਹੈ ਉਦੋਂ ਤੱਕ ਧਰਮ ਹੈ। ਜੇਕਰ ਧਰਮ ਨੂੰ ਉੱਚਾ ਚੁੱਕਣ ਦਾ ਉਪਰਾਲਾ ਕੀਤਾ ਜਾਵੇ ਤਾਂ ਭਾਰਤ ਦਾ ਉਥਾਨ ਹੋਵੇਗਾ। ਇਕ ਹਜ਼ਾਰ ਸਾਲਾਂ ਤੋਂ ਭਾਰਤ ਵਿਚ ਸਨਾਤਨ ਧਰਮ ਨੂੰ ਖਤਮ ਕਰਨ ਲਈ ਲਗਾਤਾਰ ਯਤਨ ਕੀਤੇ ਗਏ ਪਰ ਅਸੀਂ ਅਤੇ ਸਨਾਤਨ ਧਰਮ ਅਜੇ ਵੀ ਉੱਥੇ ਹੀ ਹੈ। ਉਹਨਾਂ ਕਿਹਾ ਕਿ ਭਾਰਤ ਇਕ ਅਜਿਹਾ ਦੇਸ਼ ਹੈ ਜਿੱਥੇ ਦੁਨੀਆ ਦੇ ਹਰ ਕਿਸਮ ਦੇ ਵਿਅਕਤੀ ਦੀ ਬੁਰਾਈ ਦੀ ਪ੍ਰਵਿਰਤੀ ਖਤਮ ਹੁੰਦੀ ਹੈ। ਜਦੋਂ ਉਹ ਭਾਰਤ ਆਉਂਦਾ ਹੈ ਤਾਂ ਉਹ ਜਾਂ ਤਾਂ ਠੀਕ ਹੋ ਜਾਂਦਾ ਹੈ ਜਾਂ ਗਾਇਬ ਹੋ ਜਾਂਦਾ ਹੈ। ਭਾਗਵਤ ਨੇ ਕਿਹਾ ਕਿ ਜੋ ਅਖੌਤੀ ਲੋਕ ਸਨਾਤਨ ਧਰਮ ਦਾ ਵਿਰੋਧ ਕਰਦੇ ਹਨ, ਉਹਨਾਂ ਦਾ ਵੀ ਇਸ ਵਿਚ ਸਹਿਯੋਗ ਹੈ। ਜੇ ਉਹ ਵਿਰੋਧ ਨਾ ਕਰਦੇ ਤਾਂ ਹਿੰਦੂ ਨਾ ਜਾਗਦੇ।