Republic Day Security arrangement

ਜੰਮੂ : ਅਤਿਵਾਦੀ ਗਣਤੰਤਰ ਦਿਵਸ ਦੇ ਮੌਕੇ ਅਤੇ ਅਫਜ਼ਲ ਗੁਰੂ ਦੀ ਬਰਸੀ 'ਤੇ ਵੱਡਾ ਹਮਲਾ ਕਰਨ ਦੀ ਤਿਆਰੀ ਵਿਚ ਹਨ। ਇਸ ਨੂੰ ਲੈ ਕੇ ਸੁਰੱਖਿਆ ਏਜੰਸੀਆਂ ਅਲਰਟ 'ਤੇ ਹਨ। ਅਤਿਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਇਕ ਵਾਰ ਫਿਰ ਵੱਡੀ ਵਾਰਦਾਤ ਕਰਨ ਦੀ ਸਾਜਸ਼ ਵਿਚ ਲਗਾ ਹੋਇਆ ਹੈ। ਇਸ ਸਾਜਸ਼ ਨੂੰ ਪੂਰਾ ਕਰਨ ਦੀ ਜਿੰਮੇਵਾਰੀ ਜੈਸ਼ ਸਰਗਨਾ ਮਸੂਦ ਅਜ਼ਹਰ ਦੇ ਭਤੀਜੇ ਹੁਜੈਫਾ ਅਤੇ ਤਿੰਨ ਹੋਰ ਵੱਡੇ ਕਮਾਂਡਰਾਂ ਅਬਦੁਲ ਰਸ਼ੀਦ ਗਾਜ਼ੀ, ਮੁਹੰਮਦ ਉਮਰ ਅਤੇ ਮੁਹੰਮਦ ਇਸਮਾਈਲ ਨੂੰ ਸੌਂਪੀ ਗਈ ਹੈ।

ਸੁਰੱਖਿਆ ਬਲਾਂ ਨੇ ਇਹਨਾਂ ਅਤਿਵਾਦੀਆਂ ਨੂੰ ਖਤਮ ਕਰਨ ਲਈ ਮੁਹਿੰਮ ਸ਼ੁਰੂ ਕਰ ਦਿਤੀ ਹੈ। ਸੁਰੱਖਿਆ ਏਜੰਸੀਆਂ ਅਤੇ ਪੁਲਿਸ ਦੇ ਅਧਿਕਾਰੀ ਜੈਸ਼ ਦੇ ਨਾਮੀ ਕਮਾਂਡਰਾਂ ਦੀ ਕਸ਼ਮੀਰ ਵਿਚ ਮੌਜੂਦਗੀ ਅਤੇ ਕਿਸੇ ਵੱਡੀ ਵਾਰਦਾਤ ਦੀ ਉਹਨਾਂ ਦੀ ਤਿਆਰੀ ਨੂੰ ਲੈ ਕੇ ਚੁੱੱਪ ਹਨ ਪਰ ਸੂਤਰਾਂ ਦਾ ਕਹਿਣਾ ਹੈ ਕਿ ਹੁਜੈਫਾ ਅਤੇ ਅਬਦੁਲ ਰਸ਼ੀਦ ਗਾਜ਼ੀ ਅਕਤੂਬਰ 2018 ਦੇ ਆਖਰੀ ਹਫਤੇ ਵਿਚ ਵੀ ਜੰਮੂ-ਕਸ਼ਮੀਰ ਵਿਚ ਘੁਸਪੈਠ ਕਰਨ ਵਿਚ ਕਾਮਯਾਬ ਰਹੇ, ਜਦਕਿ ਮੁਹੰਮਦ ਇਸਮਾਈਲ ਅਤੇ ਉਮਰ ਉਹਨਾਂ ਦੇ ਆਉਣ ਤੋਂ ਕੁਝ ਮਹੀਨੇ ਪਹਿਲਾਂ ਤੋਂ ਹੀ ਕਸ਼ਮੀਰ ਵਿਚ ਹਨ।

ਇਹ ਸਾਰੇ ਅਤਿਵਾਦੀ ਅਫਗਾਨ ਯੁੱਧ ਵਿਚ ਹਿੱਸਾ ਲੈ ਚੁੱਕੇ ਹਨ। ਹੁਜੈਫਾ ਅਤੇ ਗਾਜ਼ੀ ਦੇ ਨਾਲ ਤਿੰਨ ਹੋਰ ਅਤਿਵਾਦੀ ਆਏ ਸਨ, ਪਰ ਉਹਨਾਂ ਦੀ ਪਛਾਣ ਨਹੀਂ ਹੋ ਸਕੀ ਹੈ। ਗਾਜ਼ੀ ਦੇ ਕਸ਼ਮੀਰ ਵਿਚ ਹੋਣ ਦੀ ਪੁਸ਼ਟੀ ਦੰਸਬਰ ਮਹੀਨੇ ਦੌਰਾਨ ਹੋਈ ਸੀ। ਸੂਤਰਾਂ ਨੇ ਦੱਸਿਆ ਕਿ ਅਕਤੂਬਰ 2001 ਵਿਚ ਸ਼੍ਰੀਨਗਗਰ ਵਿਚ ਰਾਜ ਵਿਧਾਨਸਭਾ ਅਤੇ 13 ਦਸੰਬਰ 2001 ਨੂੰ ਸੰਸਦ ਹਮਲੇ ਤੋਂ ਬਾਅਦ ਅਜ਼ਹਰ ਮਸੂਦ ਨੇ ਰਾਜ ਵਿਚ ਅਪਣਾ ਨੈਟਵਰਕ ਫਿਰ ਤੋਂ ਮਜ਼ਬੂਤ ਕਰਨਾ ਸ਼ੁਰੂ ਕਰ ਦਿਤਾ ਸੀ।

ਉਸ ਨੇ ਸਥਾਨਕ  ਨੌਜਵਾਨਾਂ ਨੂੰ ਫਿਰ ਤੋਂ ਅਪਣੇ ਨਾਲ ਜੋੜਨ ਲਈ ਸੰਸਦ ਹਮਲੇ ਦੇ ਮੁਖ ਸਾਜਸ਼ਕਰਤਾ ਅਫਜ਼ਲ ਗੁਰੂ ਦੀ ਫਾਂਸੀ ਤੋਂ ਬਾਅਦ ਉਸ ਦੇ ਨਾਮ 'ਤੇ ਅਫਜ਼ਲ ਗੁਰੂ ਬ੍ਰਿਗੇਡ ਦਾ ਗਠਨ ਕੀਤਾ। ਇਸ ਦੀ ਜਿੰਮੇਵਾਰੀ ਜੰਮੂ-ਕਸ਼ਮੀਰ ਅਤੇ ਭਾਰਤ ਦੇ ਹੋਰਨਾਂ ਹਿੱਸਿਆਂ ਵਿਚ ਮਹੱਤਵਪੂਰਨ ਸਰਕਾਰੀ ਅਤੇ ਸੁਰੱਖਿਆ ਕੇਂਦਰਾਂ ਨੂੰ ਨਿਸ਼ਾਨਾ ਬਣਾਉਣਾ ਹੈ।  ਅਬਦੁਲ ਰਸ਼ੀਦ ਗਾਜ਼ੀ ਦੋ ਹੋਰ ਅਤਿਵਾਦੀਆਂ ਸਮੇਤ ਉਤਰੀ ਕਸ਼ਮੀਰ ਵਿਚ ਕਿਸੇ ਸੁਰੱਖਿਅਤ ਥਾਂ 'ਤੇ ਲੁਕਿਆ ਹੋਇਆ ਹੈ।