Railway released NTPC exam result last date, read till when will get job

 

ਨਵੀਂ ਦਿੱਲੀ -  ਰੇਲਵੇ ਨੇ ਪਹਿਲੀ ਵਾਰ ਆਪਣੀਆਂ ਭਰਤੀ ਪ੍ਰੀਖਿਆਵਾਂ ਦੇ ਨਤੀਜੇ  ਐਲਾਨ ਕਰਨ ਅਤੇ ਨੌਕਰੀਆਂ ਪ੍ਰਦਾਨ ਕਰਨ ਲਈ ਸਮਾਂ ਸੀਮਾ ਤੈਅ ਕੀਤੀ ਹੈ। ਇਸ ਤਹਿਤ ਮਾਰਚ 2023 ਵਿਚ ‘ਨਾਨ-ਟੈਕਨੀਕਲ ਪਾਪੂਲਰ ਕੈਟਾਗਰੀ’ (ਐਨਟੀਪੀਸੀ) ਦੀ ਪ੍ਰੀਖਿਆ ਵਿਚ ਚੁਣੇ ਗਏ 35,281 ਉਮੀਦਵਾਰਾਂ ਨੂੰ ਨੌਕਰੀਆਂ ਦਿੱਤੀਆਂ ਜਾਣਗੀਆਂ। 

ਇਸ ਕਦਮ ਨਾਲ ਇੱਕ ਲੱਖ ਉਮੀਦਵਾਰਾਂ ਨੂੰ ਰਾਹਤ ਮਿਲੀ ਹੈ ਜੋ ਵੱਖ-ਵੱਖ ਪੜਾਵਾਂ 'ਤੇ ਪ੍ਰੀਖਿਆਵਾਂ ਵਿਚ ਸ਼ਾਮਲ ਹੋਏ ਹਨ ਅਤੇ ਨਤੀਜਿਆਂ ਦੀ ਉਡੀਕ ਕਰ ਰਹੇ ਹਨ। ਰੇਲਵੇ ਭਰਤੀ ਬੋਰਡ (RRB) NTPC ਪ੍ਰੀਖਿਆ 2022 ਚਾਰ ਸਾਲਾਂ ਬਾਅਦ 35,281 ਖਾਲੀ ਅਸਾਮੀਆਂ ਨੂੰ ਭਰਨ ਲਈ ਭਾਰਤੀ ਰੇਲਵੇ ਦੇ ਵੱਖ-ਵੱਖ ਰੇਲਵੇ ਜ਼ੋਨਾਂ ਅਤੇ ਉਤਪਾਦਨ ਇਕਾਈਆਂ ਵਿਚ ਆਯੋਜਿਤ ਕੀਤੀ ਗਈ ਸੀ।

ਅਧਿਕਾਰੀਆਂ ਨੇ ਦੱਸਿਆ ਕਿ ਲੈਵਲ ਛੇ ਦੇ 7,124 ਉਮੀਦਵਾਰਾਂ ਦੇ ਨਤੀਜੇ ਸਤੰਬਰ ਵਿਚ ਐਲਾਨੇ ਗਏ ਸਨ, ਉਨ੍ਹਾਂ ਦੀ ਮੈਡੀਕਲ ਜਾਂਚ ਅਤੇ ਦਸਤਾਵੇਜ਼ਾਂ ਦੀ ਤਸਦੀਕ ਕੀਤੀ ਜਾ ਰਹੀ ਹੈ। 21 ਆਰਆਰਬੀਜ਼ ਵਿਚੋਂ, 17 ਪਹਿਲਾਂ ਹੀ ਆਪਣੇ ਅੰਤਿਮ ਨਤੀਜੇ ਐਲਾਨ ਕਰ ਚੁੱਕੇ ਹਨ ਜਦੋਂ ਕਿ ਬਾਕੀ ਜਲਦੀ ਹੀ ਸਾਹਮਣੇ ਆਉਣਗੇ। 

ਰੇਲਵੇ ਦੀ ਸਮਾਂਰੇਖਾ ਦੇ ਅਨੁਸਾਰ, ਲੈਵਲ 5 ਦਾ ਨਤੀਜਾ ਨਵੰਬਰ ਦੇ ਤੀਜੇ ਹਫ਼ਤੇ ਤੱਕ ਆ ਜਾਵੇਗਾ ਅਤੇ ਉਨ੍ਹਾਂ ਦੇ ਦਸਤਾਵੇਜ਼ਾਂ ਦੀ ਤਸਦੀਕ ਅਤੇ ਮੈਡੀਕਲ ਜਾਂਚ ਦਸੰਬਰ ਦੇ ਦੂਜੇ ਹਫ਼ਤੇ ਤੱਕ ਪੂਰੀ ਹੋ ਜਾਵੇਗੀ। ਉਨ੍ਹਾਂ ਨੂੰ ਜਨਵਰੀ ਦੇ ਤੀਜੇ ਹਫ਼ਤੇ ਤੱਕ ਨੌਕਰੀ ਲਈ ਸੂਚੀਬੱਧ ਕੀਤਾ ਜਾਵੇਗਾ। ਲੈਵਲ 4 ਦੀ ਨੌਕਰੀ ਲਈ ਹਾਜ਼ਰ ਹੋਣ ਵਾਲੇ ਉਮੀਦਵਾਰਾਂ ਦੇ ਨਤੀਜੇ ਜਨਵਰੀ ਦੇ ਦੂਜੇ ਹਫ਼ਤੇ ਤੱਕ ਆ ਜਾਣਗੇ, ਜਿਸ ਤੋਂ ਬਾਅਦ ਫਰਵਰੀ ਦੇ ਪਹਿਲੇ ਹਫ਼ਤੇ ਤੱਕ ਉਨ੍ਹਾਂ ਦੇ ਦਸਤਾਵੇਜ਼ਾਂ ਦੀ ਤਸਦੀਕ ਅਤੇ ਮੈਡੀਕਲ ਜਾਂਚ ਪੂਰੀ ਕੀਤੀ ਜਾਵੇਗੀ। ਚੁਣੇ ਗਏ ਲੋਕਾਂ ਨੂੰ ਫਰਵਰੀ ਵਿਚ ਹੀ ਸ਼ਾਰਟਲਿਸਟ ਕੀਤਾ ਜਾਵੇਗਾ। 

ਲੈਵਲ 3 ਦੀਆਂ ਨੌਕਰੀਆਂ ਲਈ ਸ਼ਾਰਟਲਿਸਟਿੰਗ ਮਾਰਚ 2023 ਦੇ ਪਹਿਲੇ ਹਫ਼ਤੇ ਤੱਕ ਪੂਰੀ ਹੋ ਜਾਵੇਗੀ, ਜਦੋਂ ਕਿ ਲੈਵਲ 2 ਦੀਆਂ ਨੌਕਰੀਆਂ ਲਈ ਪੂਰੀ ਪ੍ਰਕਿਰਿਆ ਮਾਰਚ 2023 ਦੇ ਚੌਥੇ ਹਫ਼ਤੇ ਤੱਕ ਪੂਰੀ ਹੋ ਜਾਵੇਗੀ। ਇਨ੍ਹਾਂ ਵਿਚ ਸਟੇਸ਼ਨ ਮਾਸਟਰ, ਗੁਡਸ ਗਾਰਡ, ਕਮਰਸ਼ੀਅਲ ਅਪ੍ਰੈਂਟਿਸ, ਟਿਕਟ ਕਲਰਕ, ਜੂਨੀਅਰ ਅਕਾਊਂਟਸ ਅਸਿਸਟੈਂਟ, ਸੀਨੀਅਰ ਕਲਰਕ ਅਤੇ ਟਾਈਪਿਸਟ ਅਤੇ ਟਾਈਮ ਕੀਪਰ ਵਰਗੀਆਂ ਨੌਕਰੀਆਂ ਸ਼ਾਮਲ ਹਨ। RRB NTPC ਭਰਤੀ ਪ੍ਰਕਿਰਿਆ ਵਿਚ ਕੰਪਿਊਟਰ ਅਧਾਰਤ ਪ੍ਰੀਖਿਆ, ਟਾਈਪਿੰਗ ਹੁਨਰ ਟੈਸਟ, ਦਸਤਾਵੇਜ਼ ਤਸਦੀਕ ਅਤੇ ਮੈਡੀਕਲ ਪ੍ਰੀਖਿਆ ਦੇ ਪੜਾਅ ਸ਼ਾਮਲ ਹੁੰਦੇ ਹਨ। RRB NTPC ਪ੍ਰੀਖਿਆ ਲਈ ਨੋਟੀਫਿਕੇਸ਼ਨ 28 ਫਰਵਰੀ 2019 ਨੂੰ ਜਾਰੀ ਕੀਤਾ ਗਿਆ ਸੀ।