Indian Economy

ਨਵੀਂ ਦਿੱਲੀ : ਗਲੋਬਲ ਕੰਸਲਟੇਸੀ ਫਰਮ ਪੀਡਬਲਊਸੀ ਦਾ ਮੰਨਣਾ ਹੈ ਕਿ ਇਸ ਸਾਲ ਭਾਰਤ ਬ੍ਰਿਟੇਨ ਨੂੰ ਪਛਾੜ ਕੇ ਦੁਨੀਆਂ ਦੀ 5ਵੀਂ ਸੱਭ ਤੋਂ ਵੱਡੀ ਅਰਥਵਿਵਸਥਾ ਬਣ ਸਕਦਾ ਹੈ। 2017 ਵਿਚ ਭਾਰਤ ਨੇ ਫਰਾਂਸ ਨੂੰ ਪਿੱਛੇ ਛੱਡ ਕੇ 6ਵਾਂ ਨੰਬਰ ਹਾਸਲ ਕੀਤਾ ਸੀ। ਗੋਲਬਲ ਅਰਥਵਿਵਸਥਾ ਦੀ ਰੈਕਿੰਗ ਵਿਚ ਅਮਰੀਕਾ ਪਹਿਲੇ ਨੰਬਰ 'ਤੇ, ਚੀਨ ਦੂਜੇ ਅਤੇ ਜਪਾਨ ਤੀਜੇ ਨੰਬਰ 'ਤੇ ਹੈ। ਬ੍ਰਿਟੇਨ ਪੰਜਵੇ ਨੰਬਰ 'ਤੇ ਹੈ ਪਰ ਬ੍ਰੈਗਜ਼ਿਟ ਤੋਂ ਬਾਹਰ ਕੱਢਣ ਦਾ ਫ਼ੈਸਲਾ ਉਸ ਦੀ ਅਰਥਵਿਵਸਥਾ 'ਤੇ ਅਸਰ ਪਾ ਸਕਦਾ ਹੈ।

ਫਰਾਂਸ ਅਤੇ ਬ੍ਰਿਟੇਨ ਦੀ ਅਬਾਦੀ ਲਗਭਗ ਬਰਾਬਰ ਹੈ। 5ਵੇਂ ਨਬੰਰ 'ਤੇ ਆਉਣ ਤੋਂ ਬਾਅਦ ਭਾਰਤ ਅਪਣੀ ਰੈਕਿੰਗ ਨੂੰ ਲੰਮੇ ਸਮੇਂ ਤੱਕ ਕਾਇਸ ਰੱਖ ਸਕਦਾ ਹੈ। ਗਲੋਬਲ ਅਰਥਵਿਵਸਥਾ ਵਿਚ ਕੋਈ ਵੱਡਾ ਉਤਾਰ ਚੜਾਅ ਨਾ ਰਿਹਾ ਅਤੇ ਤੇਲ ਦੀ ਸਪਲਾਈ ਠੀਕ ਰਹੀ ਤਾਂ 2019-20 ਵਿਚ ਭਾਰਤ ਦੀ ਜੀਡੀਪੀ 7.6 ਫ਼ੀ ਸਦੀ ਰਹਿਣ ਦਾ ਅੰਦਾਜ਼ਾ ਹੈ। ਇਸ ਦੌਰਾਨ ਬ੍ਰਿਟੇਨ ਦੀ ਜੀਡੀਪੀ ਵਿਕਾਸ ਦਰ 1.6 ਫ਼ੀ ਸਦੀ ਅਤੇ ਫਰਾਂਸ ਦੀ 1.7 ਫ਼ੀ ਸਦੀ ਰਹਿ ਸਕਦੀ ਹੈ। ਪੀਡਬਲਊਸੀ ਦੇ ਸੀਨੀਅਰ ਅਰਥਸ਼ਾਸਤਰੀ ਮਾਈਕ ਜੈਕਮੈਨ ਦਾ ਕਹਿਣਾ ਹੈ ਕਿ ਮੌਜੂਦਾ ਸਮੇਂ ਵਿਚ ਭਾਰਤ ਦੁਨੀਆਂ ਦੀ ਸੱਭ ਤੋਂ ਤੇਜ਼ੀ ਨਾਲ ਵੱਧ ਰਹੀ ਅਰਥ ਵਿਵਸਥਾ ਹੈ।

ਭਾਰਤ ਦੀ ਨਵੀਂ ਸਰਕਾਰ ਦੀਆਂ ਨੀਤੀਆਂ ਅਤੇ ਜੀਐਸਟੀ ਵਿਕਾਸ ਦਰ ਨੂੰ ਤੇਜ਼ ਕਰਨ ਵਿਚ ਸਹਾਈ ਹੋਣਗੀਆਂ । ਦੂਜੇ ਪਾਸੇ 2018 ਅਤੇ 2019 ਵਿਚ ਬ੍ਰਿਟੇਨ ਦੀ ਵਿਕਾਸ ਦਰ ਵਿਚ ਘਾਟਾ ਦੇਖਿਆ ਗਿਆ। ਮਾਹਰਾਂ   ਦਾ ਮੰਨਣਾ ਹੈ ਕਿ ਇਸ ਸਾਲ ਦੁਨੀਆਵੀ ਪੱਧਰ 'ਤੇ ਮੰਦੀ ਰਹਿ ਸਕਦੀ ਹੈ ਕਿਉਂਕਿ ਜੀ-7 ਦੇਸ਼ਾਂ ਦੀ ਵਿਕਾਸ ਦਰ ਔਸਤ ਹੀ ਦਿਖਾਈ ਦੇ ਰਹੀ ਹੈ।

ਕੇਂਦਰੀ ਮੰਤਰੀ ਸੁਰੇਸ਼ ਪ੍ਰਭੂ ਦਾ ਕਹਿਣਾ ਹੈ ਕਿ ਆਉਣ ਵਾਲੇ ਸਮੇਂ ਵਿਚ ਦੁਨੀਆਵੀ ਪੱਧਰ 'ਤੇ ਜੋ ਉਤਾਰ ਚੜਾਅ ਆ ਸਦਕੇ ਹਨ, ਉਹਨਾਂ ਦਾ ਭਾਰਤ ਨੂੰ ਲਾਭ ਲੈਣਾ ਚਾਹੀਦਾ ਹੈ। ਅਫਰੀਕਾ ਅਤੇ ਲੈਟਿਨ ਅਮਰੀਕੀ ਦੇਸ਼ਾਂ ਵਿਚ ਭਾਰਤ ਲਈ ਚੰਗੀਆਂ ਸੰਭਾਵਨਾਵਾਂ ਹਨ। ਉਹਨਾਂ ਕਿਹਾ ਕਿ ਨਿਰਯਾਤ ਨੂੰ ਵਧਾਉਣ ਲਈ ਸਰਕਾਰ ਅਪਣੇ ਘਰੇਲੂ ਉਡਾਨਾਂ ਦੇ ਖੇਤਰ ਨੂੰ ਮਜ਼ਬੂਤ ਬਣਾਉਣ ਲਈ 4 ਅਰਬ 63 ਕਰੋੜ ਰੁਪਏ ਦਾ ਨਿਵੇਸ਼ ਕਰਕੇ 100 ਨਵੇਂ ਹਵਾਈ ਅੱਡੇ ਬਣਾਉਣ ਜਾ ਰਹੀ ਹੈ।