Old Women

 ਨਵੀਂ ਦਿੱਲੀ: ਇੰਟਰਨੈੱਟ ਅਤੇ ਸੋਸ਼ਲ ਮੀਡੀਆ ਕਿਸ ਤਰ੍ਹਾਂ ਇਨਸਾਨਾਂ ਦੀ ਮਦਦ ਕਰਦੇ ਹਨ, ਇਹ ਨਜ਼ਾਰਾ ਹਾਲ ਹੀ ਵਿਚ ਦੇਖਣ ਨੂੰ ਮਿਲਿਆ ਹੈ। ਮੱਧ ਪ੍ਰਦੇਸ਼ ਦੇ ਦਮੋਹ ਵਿਚ ਵਾਪਰੀ ਇਕ ਘਟਨਾ ਨੂੰ ਲੈ ਕੇ ਹਰ ਕੋਈ ਹੈਰਾਨ ਹੈ। ਦਰਅਸਲ ਇਸ ਇਲਾਕੇ ਵਿਚ ਇਕ ਔਰਤ ਕਰੀਬ 4 ਦਹਾਕਿਆਂ ਤੋਂ ਰਹਿ ਰਹੀ ਹੈ।

90 ਸਾਲਾ ਬਜ਼ੁਰਗ ਔਰਤ ਕਈ ਸਾਲਾਂ ਤੋਂ ਇਸ ਪਰਿਵਾਰ ਦਾ ਹਿੱਸਾ ਬਣ ਕੇ ਰਹਿ ਰਹੀ ਹੈ ਪਰ ਬੀਤੇ ਹਫ਼ਤੇ ਹੀ ਪਤਾ ਚੱਲਿਆ ਕਿ ਇਹ ਔਰਤ ਅਸਲ ਵਿਚ ਮਹਾਰਾਸ਼ਟਰ ਦੇ ਨਾਗਪੁਰ ਜ਼ਿਲ੍ਹੇ ਦੀ ਰਹਿਣ ਵਾਲੀ ਹੈ। ਇਹ ਪਰਿਵਾਰ ਕਾਫੀ ਸਮੇਂ ਤੋਂ ਜਾਣਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ ਕਿ ਇਹ ਬਜ਼ੁਰਗ ਔਰਤ ਕਿੱਥੋਂ ਦੀ ਰਹਿਣ ਵਾਲੀ ਹੈ।

ਦਰਅਸਲ ਇਸ ਪਰਿਵਾਰ ਦੇ ਮੁਖੀ ਇਰਸ਼ਾਦ ਦੇ ਪਿਤਾ ਇਕ ਟਰੱਕ ਡਰਾਇਵਰ ਸਨ। ਕਰੀਬ 40 ਸਾਲ ਪਹਿਲਾਂ ਉਹਨਾਂ ਨੂੰ 50 ਸਾਲਾ ਔਰਤ ਦਮੋਹ ਵਿਚ ਹੀ ਸੜਕ ਕਿਨਾਰੇ ਪਰੇਸ਼ਾਨ ਹਾਲਤ ਵਿਚ ਦਿਖਾਈ ਦਿੱਤੀ ਸੀ। ਉਸ ਔਰਤ ਦੀ ਮਦਦ ਕਰਨ ਲਈ ਇਰਸ਼ਾਦ ਦੇ ਪਿਤਾ ਉਹਨਾਂ ਨੂੰ ਘਰ ਲੈ ਆਏ। ਉਸ ਸਮੇਂ ਤੋਂ ਇਹ ਬਜ਼ੁਰਗ ਔਰਤ ਇਸ ਪਰਿਵਾਰ ਨਾਲ ਰਹਿ ਰਹੀ ਹੈ।

ਜਦੋਂ ਇਸ ਔਰਤ ਕੋਲੋਂ ਉਸ ਦੇ ਘਰ ਦਾ ਪਤਾ ਪੁੱਛਿਆ ਗਿਆ ਤਾਂ ਉਹਨਾਂ ਨੇ ਜਵਾਬ ਨਹੀਂ ਦਿੱਤਾ, ਅਚਾਨਕ ਇਕ ਦਿਨ ਉਹਨਾਂ ਨੇ ਇਕ ਸ਼ਹਿਰ ਦਾ ਨਾਂਅ ਖੰਜਮ ਨਗਰ ਦਾ ਜ਼ਿਕਰ ਕੀਤਾ। ਜੋ ਕਿ ਮਹਾਰਾਸ਼ਟਰ ਦੇ ਅਮਰਾਵਤੀ ਜ਼ਿਲ੍ਹੇ ਵਿਚ ਹੈ। ਸਮਾਜਿਕ ਕਾਰਜਾਂ ਵਿਚ ਜੁਟੇ ਇਰਸ਼ਾਦ ਨੇ ਤੁਰੰਤ ਖੰਜਮ ਨਗਰ ਪੰਚਾਇਤ ਦਾ ਨੰਬਰ ਲੱਭਿਆ ਅਤੇ ਉਹਨਾਂ ਨੇ ਉੱਥੋਂ ਦੇ ਲੋਕਾਂ ਨਾਲ ਗੱਲਬਾਤ ਕੀਤੀ ਅਤੇ ਫਿਰ ਵਟਸਐਪ ਦੇ ਜ਼ਰੀਏ ਔਰਤ ਦੀ ਤਸਵੀਰ ਭੇਜੀ।

ਕੁਝ ਸਮੇਂ ਬਾਅਦ ਜਦੋਂ ਇਸ ਤਸਵੀਰ ਨੂੰ ਲੋਕਾਂ ਨੂੰ ਦਿਖਾਇਆ ਗਿਆ ਤਾਂ ਇਕ ਵਿਅਕਤੀ ਨੇ ਕਿਹਾ ਕਿ ਇਹ ਉਸ ਦੀ ਦਾਦੀ ਹੈ। ਕੁਝ ਹੀ ਦਿਨ ਬਾਅਦ ਉਹ ਵਿਅਕਤੀ ਅਪਣੀ ਦਾਦੀ ਨੂੰ ਘਰ ਵਾਪਸ ਲੈ ਕੇ ਚਲਾ ਗਿਆ। ਇਸ ਤਰ੍ਹਾਂ ਸੋਸ਼ਲ਼ ਮੀਡੀਆ ਨੇ ਕਈ ਸਾਲਾਂ ਤੋਂ ਵਿਛੜੀ ਔਰਤ ਨੂੰ ਅਪਣੇ ਪਰਿਵਾਰ ਨਾਲ ਮਿਲਾ ਦਿੱਤਾ।