Priya Kaur

ਸ੍ਰੀਨਗਰ: ਮਸ਼ਹੂਰ ਰਿਐਲਿਟੀ ਸ਼ੋਅ ਕੌਣ ਬਣੇਗਾ ਕਰੋੜਪਤੀ ਦੇ 12ਵੇਂ ਸੀਜ਼ਨ ਵਿਚ ਕਸ਼ਮੀਰ ਦੀ ਰਹਿਣ ਵਾਲੀ ਸਿੱਖ ਲੜਕੀ ਪ੍ਰੀਆ ਕੌਰ ਨੇ 25 ਲੱਖ ਰੁਪਏ ਜਿੱਤ ਕੇ ਅਪਣੇ ਮਾਪਿਆਂ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਅਪਣੀ ਸ਼ਾਨਦਾਰ ਜਿੱਤ ਨਾਲ ਪ੍ਰੀਆ ਕਸ਼ਮੀਰ ਦੇ ਬੱਚਿਆਂ ਲਈ ਮਿਸਾਲ ਬਣ ਚੁੱਕੀ ਹੈ।

15 ਸਾਲਾ ਪ੍ਰੀਆ ਕੌਰ ਦਾ ਕਹਿਣਾ ਹੈ ਕਿ ਇਹ ਸਫਰ ਬਹੁਤ ਔਖਾ ਹੁੰਦਾ ਹੈ ਤੇ ਹੌਸ ਸੀਟ ਤੱਕ ਪਹੁੰਚਣ ਲਈ ਬਹੁਤ ਮਿਹਨਤ ਕਰਨੀ ਪੈਂਦੀ ਹੈ। ਜੰਮੂ-ਕਸ਼ਮੀਰ ਦੇ ਸ੍ਰੀਨਗਰ ਦੀ ਰਹਿਣ ਵਾਲੀ ਪ੍ਰੀਆ ਕੌਰ ਨੇ ਦੱਸਿਆ ਕਿ ਉਹ 10ਵੀਂ ਜਮਾਤ ‘ਚ ਪੜ੍ਹਦੀ ਹੈ ਤੇ ਉਸ ਦਾ ਕੇਬੀਸੀ ਦਾ ਸਫਰ ਬਹੁਤ ਵਧੀਆ ਸੀ। ਉਸ ਨੇ ਕਿਹਾ ਕਿ ਉਹ ਹੌਸ ਸੀਟ ਤੱਕ ਪਹੁੰਚੀ, ਇਸ ਲਈ ਉਹ ਅਪਣੇ ਆਪ ਨੂੰ ਬਹੁਤ ਖੁਸ਼ਨਸੀਬ ਮੰਨਦੀ ਹੈ।

ਪ੍ਰੀਆ ਨੇ ਦੱਸਿਆ ਕਿ ਕੇਬੀਸੀ ਦੇ ਜਿੰਨੇ ਵੀ ਪੜਾਅ ਸੀ, ਉਹ ਉਸ ਨੇ ਅਸਾਨੀ ਨਾਲ ਕਲੀਅਰ ਕੀਤੇ ਪਰ ਆਖਰੀ ਰਾਊਂਡ ਬਹੁਤ ਮੁਸ਼ਕਿਲਾਂ ਭਰਿਆ ਹੁੰਦਾ ਹੈ। ਪ੍ਰੀਆ ਨੇ ਕਿਹਾ ਕਿ ਉਸ ਨੇ ਕਦੀ ਨਹੀਂ ਸੋਚਿਆ ਸੀ ਕਿ ਉਹ ਇਸ ਪਲੇਟਫਾਰਮ ‘ਤੇ ਪਹੁੰਚੇਗੀ ਤੇ ਉਸ ਦੀ ਅਮਿਤਾਭ ਬਚਨ ਨਾਲ ਮੁਲਾਕਾਤ ਹੋਵੇਗੀ।

ਪ੍ਰੀਆ ਨੇ ਦੱਸਿਆ ਕਿ ਉਹ ਆਈਏਐਸ ਅਫਸਰ ਬਣਨਾ ਚਾਹੁੰਦੀ ਹੈ ਤੇ ਸਮਾਜ ਦੇ ਲੋਕਾਂ ਦੀ ਸੇਵਾ ਕਰਨਾ ਚਾਹੁੰਦੀ ਹੈ। ਪ੍ਰੀਆ ਨੇ ਦੱਸਿਆ ਕਿ ਉਸ ਨੂੰ ਫਿਲਹਾਲ ਪੈਸੇ ਨਹੀਂ ਮਿਲੇ, ਇਹ ਪੈਸੇ ਉਸ ਨੂੰ 18 ਸਾਲ ਦੀ ਉਮਰ ਵਿਚ ਮਿਲਣਗੇ।  ਜਦੋਂ ਵੀ ਇਹ ਪੈਸੇ ਮਿਲਣਗੇ ਤਾਂ ਉਹ ਇਸ ਦਾ 10 ਫੀਸਦੀ ਦਾਨ ਕਰੇਗੀ ਕਿਉਂਕਿ ਸਿੱਖ ਧਰਮ ਵਿਚ ਦਸਵੰਧ ਕੱਢਣ ਦਾ ਸੰਦੇਸ਼ ਦਿੱਤਾ ਗਿਆ ਹੈ।