Covid vaccine

ਨਵੀਂ ਦਿੱਲੀ: ਦੇਸ਼ ’ਚ ਹੁਣ ਤਕ ਲਗਾਏ ਕੋਵਿਡ-19 ਦੇ ਕਰੀਬ 13 ਕਰੋੜ ਟੀਕਿਆਂ ’ਚੋਂ 90 ਫ਼ੀ ਸਦੀ ਟੀਕੇ ਆਕਸਫੋਰਡ/ਐਸਟ੍ਰਾਜੇਨੇਕਾ ਦੇ ਕੋਵਿਸ਼ੀਲਡ ਦੀਆਂ ਲਗਾਈਆਂ ਗਈਆਂ ਹਨ। ਬੁਧਵਾਰ ਨੂੰ ਉਪਲੱਬਧ ਸਰਕਾਰੀ ਡਾਟਾ ’ਚ ਇਹ ਜਾਣਕਾਰੀ ਸਾਹਮਣੇ ਆਈ। ਇਨ੍ਹਾਂ ’ਚੋਂ 15 ਸੂਬਿਆਂ ਅਤੇ ਕੇਂਦਰ ਸ਼ਾਸ਼ਤ ਪ੍ਰਦੇਸ਼ਾਂ ਨੇ ਸਿਰਫ਼ ਕੋਵਿਸ਼ੀਲਡ ਹੀ ਲਗਾਇਆ ਹੈ, ਜਿਸ ਦਾ ਉਤਪਾਦਨ ਪੁਣੇ ਸਥਿਤ ਸੀਰਮ ਇੰਸਟੀਚਿਊਟ ਆਫ਼ ਇੰਡੀਆ (ਐਸ.ਆਈ.ਆਈ.) ਕਰ ਰਿਹਾ ਹੈ।

ਭਾਰਤ ’ਚ ਦਿਤਾ ਜਾ ਰਿਹਾ ਦੂਜਾ ਟੀਕਾ ਹੈਦਰਾਬਾਦ ਸਥਿਤ ਭਾਰਤ ਬਾਇਓਟੇਕ ਦਾ ਦੇਸੀ ਟੀਕਾ ਕੋਵੈਕਸੀਨ ਹੈ। ਸਰਕਾਰ ਨੇ ਕੋਵਿਨ ਪੋਰਟਲ ’ਤੇ ਉਪਲੱਬਧ ਡਾਟਾ ਅਨੁਸਾਰ ਕੋਵਿਡ-19 ਦੇ ਕੁਲ 12,76,05,870 ਟੀਕਿਆਂ ’ਚੋਂ 11,60,65,107 ਟੀਕੇ ਕੋਵਿਸ਼ੀਲਡ ਦੇ ਹਨ, ਜਦੋਂ ਕਿ 1,15,40,763 ਟੀਕੇ ਕੋਵੈਕਸੀਨ ਦੇ ਹਨ।

ਇਸ ਤੋਂ ਇਲਾਵਾ ਗੋਆ, ਚੰਡੀਗੜ੍ਹ ਅਤੇ ਜੰਮੂ ਕਸ਼ਮੀਰ ਸਮੇਤ ਕਰੀਬ 15 ਸੂਬਿਆਂ ਅਤੇ ਕੇਂਦਰ ਸ਼ਾਸ਼ਤ ਪ੍ਰਦੇਸ਼ਾਂ ਨੇ ਲਾਭਪਾਤਰਾਂ ਨੂੰ ਸਿਰਫ਼ ਕੋਵਿਸ਼ੀਲਡ ਟੀਕਾ ਲਗਾਇਆ ਹੈ। ਮਾਹਰਾਂ ਦਾ ਕਹਿਣਾ ਹੈ ਕਿ ਕੋਵੈਕਸੀਨ ਦੇ ਮੁਕਾਬਲੇ ’ਚ ਕੋਵਿਸ਼ੀਲਡ ਬਹੁਤ ਵੱਡੇ ਪੈਮਾਨੇ ’ਤੇ ਬਣਾਈ ਜਾ ਰਹੀ ਹੈ, ਜਿਸ ਕਾਰਨ ਇਸ ਦੀ ਉਪਲੱਬਧਤਾ ਜ਼ਿਆਦਾ ਹੈ।

ਭਾਰਤੀ ਆਯੂਵਿਗਿਆਨ ਖੋਜ ਕੌਂਸਲ (ਆਈ.ਸੀ.ਐਮ.ਆਰ.) ’ਚ ਮਹਾਂਮਾਰੀ ਵਿਗਿਆਨ ਅਤੇ ਸੰਚਾਰੀ ਰੋਗ ਦੇ ਮੁਖੀ ਡਾ.ਸਮੀਰਨ ਪਾਂਡਾ ਨੇ ਕਿਹਾ ਕਿ ਜਲਦ ਹੀ ਕੋਵੈਕਸੀਨ ਦਾ ਉਤਪਾਦਨ ਵੀ ਵਧਾਇਆ ਜਾਵੇਗਾ। ਭਾਰਤ ਬਾਇਓਟੇਕ ਨੇ ਮੰਗਲਵਾਰ ਨੂੰ ਕਿਹਾ ਸੀ ਕਿ ਸਮਰੱਥਾ ਵਿਸਥਾਰ ਨੂੰ ਬੈਂਗਲੁਰੂ ਅਤੇ ਹੈਦਰਾਬਾਦ ਦੇ ਕਈ ਕੇਂਦਰਾਂ ’ਚ ਲਾਗੂ ਕਰ ਦਿਤਾ ਗਿਆ ਹੈ ਤਾਂ ਕਿ ਹਰ ਸਾਲ 70 ਕਰੋੜ ਟੀਕਿਆਂ ਦੀ ਖੁਰਾਕ ਤਿਆਰ ਕੀਤੀ ਜਾ ਸਕੇ।