ਜੈਪੁਰ- ਰਾਜਸਥਾਨ ਦੇ 21 ਸਾਲਾ ਮਯੰਕ ਪ੍ਰਤਾਪ ਸਿੰਘ ਦੇਸ਼ ਦੇ ਸਭ ਤੋਂ ਛੋਟੀ ਉਮਰ ਦੇ ਜੱਜ ਬਣਨ ਵਾਲੇ ਹਨ। ਉਹ ਰਾਜਸਥਾਨ ਨਿਆਇਕ ਸੇਵਾ ਭਰਤੀ ਪ੍ਰੀਖਿਆ (RJS) –2018 ’ਚ ਅੱਵਲ ਆਏ ਹਨ। ਇਸ ਉਪਲਬਧੀ ਨਾਲ ਉਨ੍ਹਾਂ 23 ਸਾਲਾਂ ਦੀ ਉਮਰ ’ਚ ਸਭ ਤੋਂ ਛੋਟੀ ਉਮਰ ਦੇ ਜੱਜ ਹੋਣ ਦਾ ਪਹਿਲਾ ਰਿਕਾਰਡ ਤੋੜ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਇਸ ਵਰ੍ਹੇ ਹੀ RJS ’ਚ ਉਮੀਦਵਾਰ ਦੀ ਘੱਟੋ–ਘੱਟ ਉਮਰ 23 ਸਾਲਾਂ ਤੋਂ ਘਟਾ ਕੇ 21 ਸਾਲ ਕੀਤੀ ਗਈ ਸੀ। ਮਯੰਕ ਜੈਪੁਰ ’ਚ ਰਹਿੰਦੇ ਹਨ ਤੇ ਉਨ੍ਹਾਂ ਦੇ ਮਾਤਾ–ਪਿਤਾ ਦੋਵੇਂ ਸਰਕਾਰੀ ਸਕੂਲਾਂ ’ਚ ਅਧਿਆਪਕ ਹਨ ਤੇ ਵੱਡੀ ਭੈਣ ਇੰਜੀਨੀਅਰ ਹੈ।

ਉਨ੍ਹਾਂ ਨੂੰ ਇਹ ਸਫ਼ਲਤਾ ਇਸੇ ਵਰ੍ਹੇ ਰਾਜਸਥਾਨ ਯੂਨੀਵਰਸਿਟੀ ਤੋਂ ਪੰਜ ਸਾਲਾਂ ਦੀ LLB ਡਿਗਰੀ ਹਾਸਲ ਕਰਨ ਤੋਂ ਬਾਅਦ ਮਿਲੀ ਹੈ। ਪੜ੍ਹਾਈ ਦੌਰਾਨ ਹੀ ਉਨ੍ਹਾਂ ਨਿਆਇਕ ਸੇਵਾ ਨੂੰ ਆਪਣਾ ਟੀਚਾ ਬਣਾ ਲਿਆ ਸੀ ਪਰ ਉਹ ਸੋਚ ਰਹੇ ਸਨ ਕਿ ਪ੍ਰੀਖਿਆ ’ਚ ਬੈਠਣ ਦੀ ਘੱਟੋ–ਘੱਟ ਉਮਰ 23 ਸਾਲ ਮੁਕੰਮਲ ਹੋਣ ਤੱਕ ਉਹ ਕੋਚਿੰਗ ਨਾਲ ਤਿਆਰੀ ਕਰਨਗੇ। ਜਦੋਂ ਉਹ ਕੋਰਸ ਦੇ ਆਖ਼ਰੀ ਵਰ੍ਹੇ ’ਚ ਆਏ, ਤਾਂ RJS ਲਈ ਉਮਰ ਦਾ ਨਵਾਂ ਨਿਯਮ ਲਾਗੂ ਹੋਇਆ ਤੇ ਮਯੰਕ ਨੇ ਉਸ ਨੂੰ ਇੱਕ ਮੌਕੇ ਵਜੋਂ ਲਿਆ।

ਮਯੰਕ ਨੇ ਆਪਣੀ ਗ੍ਰੈਜੂਏਸ਼ਨ ਦੀ ਆਖ਼ਰੀ ਪ੍ਰੀਖਿਆ ਦੇ ਸਿਰਫ਼ ਦੋ ਮਹੀਨਿਆਂ ਅੰਦਰ ਹੀ RJS ਦਾ ਪੇਪਰ ਦੇ ਕੇ ਪ੍ਰੀਖਿਆ ਪਾਸ ਕਰ ਲਈ। 9 ਨਵੰਬਰ ਨੂੰ ਉਨ੍ਹਾਂ ਦਾ ਇੰਟਰਵਿਊ ਹੋਇਆ, ਜਿਸ ਵਿਚ ਸਬਰੀਮਾਲਾ ਨਾਲ ਜੁੜੇ ਪ੍ਰਸ਼ਨ ਪੁੱਛੇ ਗਏ। ਮਯੰਕ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਆਪਣੀ ਸਫ਼ਲਤਾ ਪ੍ਰਤੀ ਪੂਰਾ ਭਰੋਸਾ ਸੀ ਪਰ ਇਹ ਉਨ੍ਹਾਂ ਸੁਫ਼ਨੇ ’ਚ ਵੀ ਨਹੀਂ ਸੋਚਿਆ ਸੀ ਕਿ ਉਹ ਪਹਿਲਾ ਰੈਂਕ ਲਿਆ ਕੇ ਰਿਕਾਰਡ ਕਾਇਮ ਕਰ ਦੇਣਗੇ। ਉਨ੍ਹਾਂ ਕਿਹਾ ਕਿ ਉਹ ਈਮਾਨਦਾਰੀ ਨਾਲ ਨਿਆਇਕ ਸੇਵਾ ਦੇਣਗੇ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।