file photo

ਨਵੀਂ ਦਿੱਲੀ : ਮੋਦੀ ਸਰਕਾਰ ਇਕ ਅਜਿਹੇ ਪ੍ਰੋਜੈਕਟ 'ਤੇ ਕੰਮ ਕਰ ਰਹੀ ਹੈ, ਜਿਸ ਦੇ ਸਫ਼ਲ ਹੋਣ ਨਾਲ 'ਨਾਲੇ ਫੁੱਲ ਨਾਲੇ ਫਲੀਆਂ' ਵਾਲੀ ਕਹਾਵਤ ਸੱਚ ਸਾਬਤ ਹੋ ਸਕਦੀ ਹੈ। ਇਸ ਦੀ ਸਫ਼ਲਤਾ ਤੋਂ ਬਾਅਦ ਜਿੱਥੇ ਪਟਰੌਲ ਦੀ ਕੀਮਤ 10 ਰੁਪਏ ਤਕ ਥੱਲੇ ਆ ਜਾਵੇਗੀ, ਉਥੇ ਸਰਕਾਰੀ ਖਜ਼ਾਨੇ ਨੂੰ ਵੀ 5000 ਕਰੋੜ ਦਾ ਲਾਭ ਹੋ ਜਾਵੇਗਾ। ਜਾਣਕਾਰੀ ਅਨੁਸਾਰ ਮੋਦੀ ਸਰਕਾਰ ਇਕ ਵੱਡੇ ਪ੍ਰਾਜੈਕਟ 'ਤੇ ਕੰਮ ਕਰ ਰਹੀ ਹੈ। ਜੇਕਰ ਸਰਕਾਰ ਦੀ ਇਹ ਕੋਸ਼ਿਸ਼ ਸਫ਼ਲ ਹੋ ਗਈ ਤਾਂ ਇਸ ਨਾਲ ਪਟਰੌਲ ਦੀ ਕੀਮਤ 10 ਰੁਪਏ ਤਕ ਘੱਟਣ ਦੇ ਨਾਲ ਨਾਲ ਸਰਕਾਰੀ ਖਜ਼ਾਨੇ ਨੂੰ 5 ਹਜ਼ਾਰ ਕਰੋੜ ਦਾ ਲਾਭ ਪੁੱਜਣ ਦੀ ਉਮੀਦ ਹੈ। ਦੇਸ਼ ਦੀ ਇਕਨੋਮੀ ਨੂੰ 5 ਟ੍ਰਿਲੀਅਨ ਡਾਲਰ ਕਰਨ ਦੇ ਟੀਚੇ ਨੂੰ ਪੂਰਾ ਕਰਨ 'ਚ ਇਹ ਪ੍ਰਾਜੈਕਟ ਲਾਹੇਵੰਦ ਸਾਬਤ ਹੋ ਸਕਦਾ ਹੈ।

ਅਸਲ ਵਿਚ ਸਰਕਾਰ ਦੇਸ਼ ਅੰਦਰ ਮਿਥੇਨਾਲ ਬਲੇਂਡਿਡ ਫਿਊਲ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ। ਇਸ ਲਈ ਬਕਾਇਦਾ ਰੋਡ ਟਰਾਂਸਪੋਰਟ ਐਂਡ ਹਾਈਵੇਅ ਮੰਤਰੀ ਨਿਤਿਨ ਗਡਕਰੀ ਨੇ ਪਟਰੋਲੀਅਮ ਮੰਤਰੀ ਧਰਮਿੰਦਰ ਪ੍ਰਧਾਨ ਨੂੰ ਖਤ ਲਿਖਿਆ ਹੈ ਕਿ ਉਹ ਦੇਸ਼ ਭਰ ਅੰਦਰ ਮਿਥੇਨਾਲ ਬਲੇਂਡਿਡ ਫਿਊਲ ਉਪਲਬਧ ਕਰਵਾਉਣ ਲਈ ਕਦਮ ਚੁਕਣ। ਸਰਕਾਰ ਦੇ ਇਸ ਕਦਮ ਨਾਲ ਪ੍ਰਦੂਸ਼ਣ ਦੇ ਸਮੱਸਿਆ ਹੱਲ ਹੋਣ ਦੀ ਵੀ ਉਮੀਦ ਹੈ। ਇਸ ਨਾਲ ਪ੍ਰਦੂਸ਼ਣ 'ਚ 30 ਫ਼ੀ ਸਦੀ ਤਕ ਕਮੀ ਆ ਸਕਦੀ ਹੈ। ਮਿਥੇਨਾਲ ਦੀ ਕੀਮਤ 20 ਰੁਪਏ ਪ੍ਰਤੀ ਲਿਟਰ ਹੈ। ਇੰਡੀਅਨ ਆਇਲ ਪਹਿਲਾਂ ਹੀ ਮਿਥੇਨਾਲ ਬਲੇਂਡਿਡ ਫਿਊਲ ਬਣਾ ਰਿਹਾ ਹੈ। ਇਸ ਵਿਚ 15 ਫ਼ੀਸਦੀ ਮਿਥੇਨਾਲ ਅਤੇ 85 ਫ਼ੀਸਦੀ ਤਕ ਪਟਰੌਲ ਹੁੰਦਾ ਹੈ।

ਇਕਨੋਮਿਕ ਟਾਈਮਜ਼  ਦੀ ਇਕ ਰਿਪੋਰਟ ਅਨੁਸਾਰ ਨੀਤੀ ਅਯੋਗ ਦੇ ਮੈਂਬਰ ਵੀਕੇ ਸਾਰਸਵਤ ਨੇ ਦਸਿਆ ਕਿ ਐਮ15 'ਤੇ 65000 ਕਿਲੋਮੀਟਰ ਦਾ ਟਰਾਈਲ ਰਨ ਪੂਰਾ ਕਰ ਲਿਆ ਗਿਆ ਹੈ। ਨੀਤੀ ਆਯੋਗ ਅਨੁਸਾਰ ਫਿਊਲ 'ਚ 15 ਫ਼ੀ ਸਦੀ ਮਿਥੇਨ ਬਲੇਂਡ ਕਰਨ ਨਾਲ 2030 ਤਕ 100 ਅਰਬ ਡਾਲਰ ਦੀ ਬਚਤ ਹੋਵੇਗੀ।
ਤਜਰਬੇ ਦੇ ਤੌਰ 'ਤੇ ਪੂਨੇ ਵਿਚ 15 ਫ਼ੀ ਸਦੀ ਮਿਥੇਨਾਲ ਮਿਲੇ ਪਟਰੌਲ ਗੱਡੀਆਂ ਚਲਾਈਆਂ ਗਈਆਂ।

ਖ਼ਬਰਾਂ ਮੁਤਾਬਕ ਪੂਨੇ 'ਚ ਮਾਰੂਤੀ ਤੇ ਹੁੰਦਈ ਦੀਆਂ ਗੱਡੀਆਂ ਵਿਚ ਮਿਥੇਨਾਲ ਮਿਲਿਆ ਪਟਰੋਲ ਪਾ ਕੇ ਗੱਡੀਆਂ ਚਲਾਈਆਂ ਗਈਆਂ। ਸਰਕਾਰ ਜਿਸ ਤੇਜੀ ਨਾਲ ਇਸ ਪ੍ਰਾਜੈਕਟ 'ਤੇ ਕੰਮ ਕਰ ਰਹੀ ਹੈ, ਉਹ ਹਿਸਾਬ ਨਾਲ ਦੇਸ਼ ਭਰ ਅੰਦਰ ਛੇਤੀ ਹੀ ਪਟਰੌਲ ਪੰਪਾਂ 'ਤੇ ਮਿਥੇਨਾਲ ਰਲਿਆ ਪਟਰੌਲ ਮਿਲਣਾ ਸ਼ੁਰੂ ਹੋ ਜਾਵੇਗਾ।

ਦੱਸ ਦਈਏ ਕਿ ਫ਼ਿਲਹਾਲ ਪਟਰੌਲ ਵਿਚ ਈਥੇਨਾਲ ਰਲਾਇਆ ਜਾਂਦਾ ਹੈ, ਪਰ ਮਿਥੇਨਾਲ ਦੇ ਮੁਕਾਬਲੇ ਈਨੇਨਾਲ ਬਹੁਤ ਮਹਿੰਗਾ ਪੈਂਦਾ ਹੈ। ਈਥੇਨਲ ਦੀ ਕੀਮਤ ਤਰਕੀਬਨ 40 ਰੁਪਏ ਪ੍ਰਤੀ ਲਿਟਰ ਹੈ ਜਦਕਿ ਮਿਥੇਨਾਲ 20 ਰੁਪਏ ਤਕ ਮਿਲ ਜਾਂਦਾ ਹੈ। ਮਿਥੇਨਾਲ ਕੋਇਲੇ ਤੋਂ ਬਣਦਾ ਹੈ, ਜਦਕਿ ਈਥੇਨਾਲ ਗੰਨੇ ਤੋਂ ਬਣਦਾ ਹੈ।

ਜਿਥੋਂ ਤਕ ਮਿਥੇਨਾਲ ਦੀ ਉਪਲਬਧਤਾ ਦਾ ਸਵਾਲ ਹੈ ਸਰਕਾਰ ਈਪੋਰਟ 'ਤੇ ਵੀ ਵਿਚਾਰ ਕਰ ਰਹੀ ਹੈ। ਚੀਨ ਮੈਕਸੀਕੋ ਅਤੇ ਮਿਡਲ ਈਸਟ ਤੋਂ ਮਿਥੇਨਾਲ ਮੰਗਵਾਇਆ ਜਾ ਸਕਦਾ ਹੈ। ਉਥੇ ਹੀ ਦੇਸ਼ ਅੰਦਰ ਰਾਸ਼ਟਰੀ ਕੈਮਿਕਲ ਐਂਡ ਫਰਟੀਲਾਈਜ਼ਰ, ਗੁਜਰਾਤ ਨਰਮਦਾ ਵੈਲੀ ਫਰਟੀਲਾਈਜ਼ਰ ਕਾਰਪੋਰੇਸ਼ਨ ਅਤੇ ਅਸਮ ਪੈਟਰੋਕੈਮਿਕਲ  ਵਰਗੀਆਂ ਕੰਪਨੀਆਂ ਦੀ ਸਮਰੱਥਾ ਵਧਾਉਣ ਦੀ ਤਿਆਰੀ ਵੀ ਚੱਲ ਰਹੀ ਹੈ। ਕਾਬਲੇਗੌਰ ਹੈ ਕਿ ਆਉਣ ਵਾਲੇ ਸਮੇਂ ਵਿਚ ਮਿਥੇਨਾਲ ਨੂੰ ਘਰਾਂ ਅੰਦਰ ਖਾਣਾ ਪਕਾਉਣ ਲਈ ਵੀ ਵਰਤਿਆ ਜਾ ਸਕਦਾ ਹੈ। ਇਸ ਲਈ ਸਰਕਾਰ ਵਲੋਂ ਖਾਸ ਤਿਆਰ ਕੀਤੀ ਜਾ ਰਹੀ ਹੈ, ਜਿਸ ਦੀ ਸ਼ੁਰੂਆਤ ਅਸਾਮ ਤੋਂ ਹੋ ਚੁੱਕੀ ਹੈ।