Over 5,000 children abandon education in mica mines of Jharkhand

ਨਵੀਂ ਦਿੱਲੀ: ਬਿਹਾਰ ਅਤੇ ਝਾਰਖੰਡ ਦੀਆਂ ਅਬਰਕ ਮਾਇਨਾਂ ਵਾਲੇ ਜ਼ਿਲ੍ਹਿਆਂ ਵਿਚ ਛੇ ਤੋਂ 14 ਸਾਲ ਦੇ ਕਰੀਬ ਪੰਜ ਹਜ਼ਾਰ ਬੱਚੇ ਸਕੂਲੀ ਸਿੱਖਿਆ ਤੋਂ ਦੂਰ ਹਨ। ਕੁਝ ਬੱਚਿਆਂ ਨੇ ਪਰਿਵਾਰ ਦੀ ਆਮਦਨ ਬਣਾਉਣ ਲਈ ਬਾਲ ਮਜ਼ਦੂਰੀ ਸ਼ੁਰੂ ਕਰ ਦਿੱਤੀ ਹੈ। ਇਹ ਖ਼ੁਲਾਸਾ ਇਕ ਸਰਕਾਰੀ ਰਿਪੋਰਟ ਵਿਚ ਹੋਇਆ ਹੈ। ਰਾਸ਼ਟਰੀ ਬਾਲ ਅਧਿਕਾਰ ਸੁਰੱਖਿਆ ਕਮਿਸ਼ਨ (ਐਨਸੀਪੀਸੀਆਰ) ਨੇ ਇਹ ਸਰਵੇਖਣ ਭਾਰਤ ਵਿਚ ਕਾਰਜਕਾਰੀ ਅੰਤਰਰਾਸ਼ਟਰੀ ਵਿਕਾਸ ਏਜੰਸੀ ਦੀ ਰਿਪੋਰਟ ਤੋਂ ਬਾਅਦ ਕੀਤਾ ਹੈ।

ਇਸ ਵਿਚ ਕਿਹਾ ਗਿਆ ਸੀ ਕਿ ਬਿਹਾਰ ਅਤੇ ਝਾਰਖੰਡ ਦੀਆਂ ਮਾਇਨਾਂ ਵਿਚ 22,00 ਬਾਲ ਮਜ਼ਦੂਰ ਕੰਮ ਕਰ ਰਹੇ ਹਨ। ਐਨਸੀਪੀਸੀਆਰ ਦੇ ਸਰਵੇਖਣ ਵਿਚ ਪਾਇਆ ਗਿਆ ਕਿ ਅਬਰਕ ਮਾਇਨਾਂ ਵਾਲੇ ਇਲਾਕਿਆਂ ਵਿਚ ਬੱਚਿਆਂ ਲਈ ਮੌਕਿਆਂ ਦੀ ਕਮੀ ਹੈ। ਇਹਨਾਂ ਬੱਚਿਆਂ ਨੇ ਪਰਿਵਾਰ ਦੀ ਆਮਦਨ ਵਧਾਉਣ ਲਈ ਮਜ਼ਦੂਰੀ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਇਹ ਸਰਵੇਖਣ ਝਾਰਖੰਡ ਦੇ ਕੋਡਰਮਾ ਅਤੇ ਗਿਰੀਡੀਹ ਅਤੇ ਬਿਹਾਰ ਦੇ ਨਵਾਦਾ ਜ਼ਿਲ੍ਹੇ ਵਿਚ ਕੀਤਾ ਗਿਆ। ਐਨਸੀਪੀਆਰ ਨੇ ਕਿਹਾ ਕਿ ਸਰਵੇਖਣ ਮੁਤਾਬਕ ਝਾਰਖੰਡ ਦੇ ਇਹਨਾਂ ਇਲਾਕਿਆਂ ਵਿਚ ਛੇ ਤੋਂ 14 ਸਾਲ ਦੇ 4,545 ਬੱਚੇ ਸਕੂਲ ਨਹੀਂ ਜਾਂਦੇ ।

ਝਾਰਖੰਡ ਅਤੇ ਬਿਹਾਰ ਦੇ ਇਹਨਾਂ ਇਲਾਕਿਆਂ ਵਿਚ ਬੱਚਿਆਂ ਦੀ ਸਿੱਖਿਆ ਅਤੇ ਸਿਹਤ ‘ਤੇ ਕੀਤੇ ਗਏ ਸਰਵੇਖਣ ਮੁਤਾਬਕ ਬਿਹਾਰ ਦੇ ਨਵਾਦਾ ਜ਼ਿਲ੍ਹੇ ਵਿਚ ਵੀ ਇਸ ਉਮਰ ਦੇ 649 ਬੱਚੇ ਸਕੂਲ ਨਹੀਂ ਜਾਂਦੇ। ਅਧਿਕਾਰੀਆਂ ਨੇ ਦੱਸਿਆ ਕਿ ਅਬਰਕ ਦੇ ਟੁਕੜੇ ਵੇਚਣ ਕੇ ਹੋਣ ਵਾਲੀ ਆਮਦਨ ਨਾਲ ਇਲਾਕੇ ਦੇ ਕਈ ਪਰਿਵਾਰਾਂ ਦਾ ਗੁਜ਼ਾਰਾ ਚੱਲਦਾ ਹੈ। ਉਹਨਾਂ ਦੱਸਿਆ ਕਿ ਪਰਿਵਾਰਾਂ ਨੂੰ ਲੱਗਦਾ ਹੈ ਕਿ ਬੱਚਿਆਂ ਨੂੰ ਸਕੂਲ ਭੇਜਣ ਦਾ ਕੋਈ ਫਾਇਦਾ ਨਹੀਂ ਹੈ ਅਤੇ ਇਸ ਦੀ ਬਜਾਏ ਉਹ ਬੱਚਿਆਂ ਤੋਂ ਅਬਰਕ ਇਕੱਠੇ ਕਰਾਉਣ ਅਤੇ ਵੇਚਣ ਨੂੰ ਪਹਿਲ ਦਿੰਦੇ ਹਨ।

ਜ਼ਿਕਰਯੋਗ ਹੈ ਕਿ ਭਾਰਤ ਅਬਰਕ ਦੇ ਸਭ ਤੋਂ ਵੱਡੇ ਉਤਪਾਦਕਾਂ ਵਿਚੋਂ ਇਕ ਹੈ ਅਤੇ ਝਾਰਖੰਡ ਅਤੇ ਬਿਹਾਰ ਦੇਸ਼ ਦੇ ਪ੍ਰਮੁੱਖ ਅਬਰਕ ਉਤਪਾਦਕ ਸੂਬੇ ਹਨ। ਕਮਿਸ਼ਨ ਦਾ ਕਹਿਣਾ ਹੈ ਕਿ ਝਾਰਖੰਡ ਅਤੇ ਬਿਹਾਰ ਦੇ ਅਬਰਕ ਮਾਈਨਿੰਗ ਇਲਾਕਿਆਂ ਵਿਚ ਪ੍ਰਸ਼ਾਸਨ ਨੂੰ ਬਾਲ ਮਜ਼ਦੂਰੀ ਖ਼ਤਮ ਕਰਨ ਲਈ ਖ਼ਾਸ ਮੁਹਿੰਮ ਚਲਾਉਣੀ ਚਾਹੀਦੀ ਹੈ।

ਐਨਸੀਪੀਸੀਆਰ ਨੇ ਇਨ੍ਹਾਂ ਖੇਤਰਾਂ ਵਿੱਚ ਬੱਚਿਆਂ ਦੇ ਕੁਪੋਸ਼ਣ ਦੇ ਮੁੱਦੇ ਉੱਤੇ ਵੀ ਧਿਆਨ ਦਿਵਾਇਆ। ਸਰਵੇਖਣ ਮੁਤਾਬਕ ਗਿਰਿਹੀਡ ਅਤੇ ਕੋਡਰਮਾ ਦੀਆਂ 14 ਅਤੇ 19 ਫੀਸਦੀ ਬਸਤੀਆਂ ਵਿਚ ਕੁਪੋਸ਼ਣ ਦੇ ਮਾਮਲੇ ਦਰਜ ਕੀਤੇ ਗਏ। ਬਿਹਾਰ ਦੇ ਨਵਾਦਾ ਦੀਆਂ 69 ਫੀਸਦੀ ਬਸਤੀਆਂ ਵਿਚ ਕੁਪੋਸ਼ਣ ਦੇ ਮਾਮਲੇ ਸਾਹਮਣੇ ਆਏ ਹਨ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।