Salary

ਨਵੀਂ ਦਿੱਲੀ: ਕੇਂਦਰ ਦੀ ਨਰਿੰਦਰ ਮੋਦੀ ਸਰਕਾਰ ਨੌਕਰੀ ਪੇਸ਼ਾ ਲੋਕਾਂ ਲਈ ਵੱਡੇ ਐਲਾਨ ਕਰਨ ਦੀ ਤਿਆਰੀ ਵਿਚ ਹੈ। ਮੀਡੀਆ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਜਲਦ ਹੀ 21,000 ਤੋਂ ਜ਼ਿਆਦਾ ਸੈਲਰੀ ਹੋਣ ‘ਤੇ ਵੀ ਈਐਸਆਈਸੀ ਦਾ ਫਾਇਦਾ ਮਿਲ ਸਕੇਗਾ। ਕੋਰੋਨਾ ਸੰਕਟ ਵਿਚ ਜ਼ਿਆਦਾ ਤੋਂ ਜ਼ਿਆਦਾ ਵਰਕਰਾਂ ਨੂੰ ਰਾਹਤ ਦੇਣ ਲਈ ਈਐਸਆਈਸੀ ਦੀ ਨਿਯਮਾਂ ਵਿਚ ਬਦਲਾਅ ਕਰਨ ਦੀ ਤਿਆਰੀ ਹੈ।

ਇਸ ਦੇ ਤਹਿਤ ਮੈਡੀਕਲ ਅਤੇ ਆਰਥਕ ਮਦਦ ਦੇ ਨਿਯਮ ਬਦਲ ਜਾਣਗੇ। ਇਸ ਦੇ ਲਈ ਰੱਖੇ ਗਏ ਪ੍ਰਸਤਾਵ ਮੁਤਾਬਕ 21,000 ਤੋਂ ਜ਼ਿਆਦਾ ਸੈਲਰੀ ਹੋਣ ‘ਤੇ ਵੀ ਸਹੂਲਤਾਂ ਮਿਲਣਗੀਆਂ। ਸੂਤਰਾਂ ਨੇ ਦੱਸਿਆ 30,000 ਰੁਪਏ ਤੱਕ ਸੈਲਰੀ ਵਾਲਿਆਂ ਨੂੰ ਵੀ ਈਐਸਆਈਸੀ ਦਾ ਫਾਇਦਾ ਮਿਲੇਗਾ।

ਕਿਰਤ ਮੰਤਰਾਲੇ ਨਿਯਮਾਂ ਵਿਚ ਬਦਲਾਅ ਦੀ ਤਿਆਰੀ ਕਰ ਰਿਹਾ ਹੈ। ਜ਼ਿਆਦਾ ਸੈਲਰੀ ਵਾਲਿਆਂ ਨੂੰ ਸਕੀਮ ਨਾਲ ਜੁੜੇ ਰਹਿਣ ਦਾ ਵਿਕਲਪ ਹੋਵੇਗਾ। ਬੇਰੁਜ਼ਗਾਰ ਹੋਣ ‘ਤੇ ਆਰਥਕ ਮਦਦ ਤੈਅ ਲਿਮਟ ਦੇ ਹਿਸਾਬ ਨਾਲ ਹੋਵੇਗੀ। ਈਐਸਆਈਸੀ ਬੋਰਡ ਨੂੰ ਜਲਦ ਇਹ ਪ੍ਰਸਤਾਵ ਭੇਜਿਆ ਜਾਵੇਗਾ।

ਕੇਂਦਰੀ ਕਿਰਤ ਮੰਤਰੀ ਸੰਤੋਸ਼ ਗੰਗਵਾਰ ਨੇ ਪਿਛਲੇ ਹਫਤੇ ਕਰਮਚਾਰੀ ਰਾਜ ਬੀਮਾ ਨਿਗਮ (ਈਐਸਆਈਸੀ) ਦੀ ਅਟਲ ਬੀਮਾ ਵਿਅਕਤੀ ਭਲਾਈ ਸਕੀਮ ਤਹਿਤ ਬੇਰੁਜ਼ਗਾਰੀ ਲਾਭ ਦਾਅਵੇ ਦਾ ਨਿਪਟਾਰਾ ਕਰਨ ਦੇ 15 ਦਿਨਾਂ ਦੇ ਅੰਦਰ ਅੰਦਰ ਨਿਪਟਾਰਾ ਕਰ ਦਿੱਤਾ ਸੀ।

ਈਐਸਆਈਸੀ ਦੇ ਬੋਰਡ ਆਫ਼ ਡਾਇਰੈਕਟਰ ਨੇ ਕੋਰੋਨਾ ਵਾਇਰਸ ਮਹਾਂਮਾਰੀ ਦੇ ਮੱਦੇਨਜ਼ਰ ਰੁਜ਼ਗਾਰ ਗੁਆਉਣ ਵਾਲਿਆਂ ਨੂੰ ਰਾਹਤ ਪ੍ਰਦਾਨ ਕਰਦੇ ਹੋਏ ਇਸ ਸਾਲ 24 ਮਾਰਚ ਤੋਂ 31 ਦਸੰਬਰ ਤੱਕ ਬੇਰੁਜ਼ਗਾਰੀ ਦੇ ਲਾਭ ਅਧੀਨ ਅਦਾਇਗੀ ਨੂੰ ਦੁੱਗਣਾ ਕਰ ਦਿੱਤਾ ਹੈ। ਯੋਜਨਾ ਦੇ ਤਹਿਤ ਹੁਣ ਤਿੰਨ ਮਹੀਨਿਆਂ ਦੀ ਔਸਤਨ ਸੈਲਰੀ ਦਾ ਪੰਜਾਹ ਪ੍ਰਤੀਸ਼ਤ ਲਾਭ ਦਿੱਤਾ ਜਾਵੇਗਾ। ਹੁਣ ਰੁਜ਼ਗਾਰ ਜਾਣ ਤੋਂ 30 ਦਿਨਾਂ ਬਾਅਦ ਲਾਭ ਦਾ ਦਾਅਵਾ ਦਰਜ ਕੀਤਾ ਜਾ ਸਕਦਾ ਹੈ। ਪਹਿਲਾਂ ਇਸ ਦੇ ਲਈ 90 ਦਿਨ ਸਨ।