File Photo

ਨਵੀਂ ਦਿੱਲੀ- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇਨ੍ਹੀਂ ਦਿਨੀਂ ਦੋ ਦਿਨਾ ਦੌਰੇ 'ਤੇ ਭਾਰਤ ਆਏ ਹੋਏ ਸਨ। ਉਨ੍ਹਾਂ ਦੇ ਨਾਲ ਉਨ੍ਹਾਂ ਦੀ ਪਤਨੀ ਮੇਲਾਨੀਆ ਟਰੰਪ ਵੀ ਆਈ ਹੋਈ ਸੀ। ਮੇਲਾਨੀਆ ਅਮਰੀਕਾ ਦੀ ਫਸਟ ਲੇਡੀ ਹੈ। ਅੱਜ ਅਸੀਂ ਤੁਹਾਨੂੰ ਦੱਸਦੇ ਹਾਂ ਕਿ ਕੀ ਹੁੰਦੀ ਹੈ ਫਸਟ ਲੇਡੀ ਦੀ ਪਰਿਭਾਸ਼ਾ ਅਤੇ ਕੀ ਹੁੰਦੀਆਂ ਨੇ ਫਸਟ ਲੇਡੀ ਦੀਆਂ ਜ਼ਿੰਮੇਵਾਰੀਆਂ?

ਰਾਸ਼ਟਰਪਤੀ ਦੇਸ਼ ਦਾ ਪਹਿਲਾ ਨਾਗਰਿਕ ਹੁੰਦਾ ਹੈ। ਉਨ੍ਹਾਂ ਦੀ ਪਤਨੀ ਦੇਸ਼ ਦੀ ਪਹਿਲੀ ਮਹਿਲਾ ਹੁੰਦੀ ਹੈ ਪਰ ਜੇਕਰ ਰਾਸ਼ਟਰਪਤੀ ਸ਼ਾਦੀਸ਼ੁਦਾ ਨਾ ਹੋਵੇ ਤਾਂ ਉਨ੍ਹਾਂ ਦੀ ਕੋਈ ਹੋਰ ਕਰੀਬੀ ਰਿਸ਼ਤੇਦਾਰ ਇਹ ਜ਼ਿੰਮੇਵਾਰੀ ਉਠਾ ਸਕਦੀ ਹੈ। ਜਿਵੇਂ ਭਾਰਤ ਵਿਚ ਜਦੋਂ ਪ੍ਰਣਬ ਮੁਖ਼ਰਜੀ ਦੇਸ਼ ਦੇ ਰਾਸ਼ਟਰਪਤੀ ਸਨ ਤਾਂ ਉਨ੍ਹਾਂ ਦੀ ਪਤਨੀ ਸੁਵਰਾ ਮੁਖ਼ਰਜੀ ਦੇਸ਼ ਦੀ ਫਸਟ ਲੇਡੀ ਸੀ ਪਰ ਜਦੋਂ ਸੁਵਰਾ ਮੁਖ਼ਰਜੀ ਦੀ ਤਬੀਅਤ ਖ਼ਰਾਬ ਹੋ ਗਈ ਸੀ ਤਾਂ ਉਨ੍ਹਾਂ ਦੀ ਬੇਟੀ ਸ਼ਰਮਿਸ਼ਠਾ ਮੁਖ਼ਰਜੀ ਉਨ੍ਹਾਂ ਦੇ ਨਾਲ ਆਫੀਸ਼ੀਅਲ ਪ੍ਰੋਗਰਾਮ ਹੋਸਟ ਕਰਦੀ ਸੀ।

ਅਮਰੀਕਾ ਦੇ ਤੀਜੇ ਰਾਸ਼ਟਰਪਤੀ ਥਾਮਸ ਜੈਫਰਸਨ ਦੀ ਬੇਟੀ ਮਾਰਥਾ ਜੈਫਰਸਨ ਨੇ ਵੀ ਅਮਰੀਕਾ ਵਿਚ ਫਸਟ ਲੇਡੀ ਦੀ ਜ਼ਿੰਮੇਵਾਰੀ ਸੰਭਾਲੀ ਸੀ। ਉਂਝ ਭਾਰਤ ਵਿਚ ਫਸਟ ਲੇਡੀ ਦੀ ਕੋਈ ਆਫੀਸ਼ੀਅਲ ਪੋਸਟ ਨਹੀਂ ਹੈ ਪਰ ਅਮਰੀਕਾ ਵਿਚ ਹੁੰਦੀ ਹੈ। ਕਿੱਥੋਂ ਆਇਆ ਇਹ ਸ਼ਬਦ 'ਫਸਟ ਲੇਡੀ, ਆਓ ਤੁਹਾਨੂੰ ਇਸ ਬਾਰੇ ਵੀ ਦੱਸਦੇ ਹਾਂ। ਅਮਰੀਕਾ ਤੋਂ ਹੀ ਇਸ ਸ਼ਬਦ ਦੀ ਸ਼ੁਰੂਆਤ ਹੋਈ ਸੀ। ਪਹਿਲਾਂ ਇਸ ਦੀ ਥਾਂ 'ਤੇ ਲੇਡੀ ਪ੍ਰੈਜੀਡੈਂਟ ਜਾਂ ਮਿਸੇਜ਼ ਪ੍ਰੈਜੀਡੈਂਟ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ ਜਾਂਦੀ ਸੀ। ਬਾਅਦ ਵਿਚ 'ਫਸਟ ਲੇਡੀ' ਦਾ ਰੁਝਾਨ ਹੋ ਗਿਆ।

ਜਦੋਂ ਬਿਲ ਕਲਿੰਟਨ ਅਮਰੀਕਾ ਦੇ ਰਾਸ਼ਟਰਪਤੀ ਸਨ ਤਾਂ ਉਨ੍ਹਾਂ ਦੀ ਪਤਨੀ ਹਿਲੇਰੀ ਕਲਿੰਟਨ ਅਮਰੀਕਾ ਦੀ ਫਸਟ ਲੇਡੀ ਸੀ। ਜਦੋਂ ਹਿਲੇਰੀ ਨੇ ਵੀ ਸਰਕਾਰੀ ਦਫ਼ਤਰ ਜੁਆਇਨ ਕਰ ਲਿਆ ਸੀ ਤਾਂ ਉਨ੍ਹਾਂ ਦੀ ਬੇਟੀ ਚੇਲਸੀ ਫਸਟ ਲੇਡੀ ਦੀਆਂ ਜ਼ਿੰਮੇਵਾਰੀਆਂ ਸੰਭਾਲਦੀ ਸੀ। ਆਓ ਹੁਣ ਜਾਣਦੇ ਆਂ ਕਿ ਕੀ ਹੁੰਦੀਆਂ ਨੇ ਫਸਟ ਲੇਡੀ ਦੀਆਂ ਜ਼ਿੰਮੇਵਾਰੀਆਂ?

 

ਫਸਟ ਲੇਡੀ ਰਾਸ਼ਟਰਪਤੀ ਦੇ ਨਾਲ ਜਾਂ ਉਨ੍ਹਾਂ ਤੋਂ ਬਿਨਾਂ ਅਧਿਕਾਰਕ ਪ੍ਰੋਗਰਾਮ ਹੋਸਟ ਕਰਦੀ ਹੈ। ਇਸ ਵਿਚ ਆਫੀਸ਼ੀਅਲ ਸਟੇਟ ਲੰਚ ਅਤੇ ਡਿਨਰ ਸ਼ਾਮਲ ਹਨ। ਬਾਹਰ ਤੋਂ ਆਉਣ ਵਾਲੇ ਵਿਦੇਸ਼ੀ ਮਹਿਮਾਨਾਂ ਦਾ ਖ਼ਿਆਲ ਰੱਖਣਾ ਅਤੇ ਉਨ੍ਹਾਂ ਲਈ ਪ੍ਰੋਗਰਾਮ ਸ਼ਡਿਊਲ ਕਰਨਾ ਵੀ ਫਸਟ ਲੇਡੀ ਦੀਆਂ ਜ਼ਿੰਮੇਵਾਰੀਆਂ ਵਿਚ ਸ਼ਾਮਲ ਹੈ। ਫਸਟ ਲੇਡੀ ਮਹੱਤਵਪੂਰਨ ਮੌਕਿਆਂ 'ਤੇ ਰਾਸ਼ਟਰਪਤੀ ਦੇ ਨਾਲ ਮੌਜੂਦ ਹੁੰਦੀ ਹੈ, ਇਨ੍ਹਾਂ ਵਿਚ ਵਿਦੇਸ਼ੀ ਦੌਰੇ ਵੀ ਸ਼ਾਮਲ ਹਨ।

ਰਾਜਨੀਤੀ ਵਿਚ ਮਹੱਤਵਪੂਰਨ ਮੁੱਦਿਆਂ ਵਿਚੋਂ ਕੋਈ ਇਕ ਮੁੱਦਾ ਚੁਣ ਕੇ ਉਸ ਨੂੰ ਪ੍ਰਮੋਟ ਕਰਨਾ ਫਸਟ ਲੇਡੀ ਦਾ ਕੰਮ ਹੈ। ਹਾਲਾਂਕਿ ਇਹ ਜ਼ਰੂਰੀ ਨਹੀਂ, ਪਰ ਪਿਛਲੇ ਕੁੱਝ ਸਮੇਂ ਤੋਂ ਫਸਟ ਲੇਡੀਜ਼ ਨੇ ਇਸ ਮਾਮਲੇ ਵਿਚ ਕੁੱਝ ਜ਼ਿਆਦਾ ਹੀ ਸਰਗਰਮੀ ਦਿਖਾਈ ਹੈ। ਜਿਵੇਂ ਕਿ ਵਾਤਾਵਰਣ ਨਾਲ ਜੁੜੇ ਮੁੱਦਿਆਂ 'ਤੇ ਕੰਮ ਕਰਨਾ। ਫ਼ੌਜੀ ਪਰਿਵਾਰਾਂ ਦੇ ਅਧਿਕਾਰਾਂ ਅਤੇ ਉਨ੍ਹਾਂ ਦੇ ਹਿੱਤਾਂ ਦੀ ਗੱਲ ਕਰਨਾ।

ਕਈ ਮਾਮਲਿਆਂ ਵਿਚ ਫਸਟ ਲੇਡੀ ਨੂੰ ਇਕ ਸਿਆਸੀ ਸੈਲੀਬ੍ਰਿਟੀ ਦੇ ਤੌਰ 'ਤੇ ਵੀ ਦੇਖਿਆ ਜਾਂਦਾ ਹੈ। ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਜੌਨ ਐਫ ਕੈਨੇਡੀ ਦੀ ਪਤਨੀ ਜੈਕੀ ਕੈਨੇਡੀ ਨੂੰ ਫੈਸ਼ਨ ਅਤੇ ਸਲੀਕੇ ਦੇ ਮਾਮਲਿਆਂ ਵਿਚ ਆਈਕਾਨ ਮੰਨਿਆ ਜਾਂਦਾ ਹੈ। ਇਸ ਤਰ੍ਹਾਂ ਅਮਰੀਕਾ ਵਿਚ ਫਸਟ ਲੇਡੀ ਮੀਡੀਆ ਦੀ ਨਜ਼ਰ ਵਿਚ ਜ਼ਿਆਦਾ ਰਹਿੰਦੀ ਹੈ।

ਅਮਰੀਕਾ ਵਿਚ ਫਸਟ ਲੇਡੀ ਲਈ ਖ਼ਾਸ ਤੌਰ 'ਤੇ ਆਫਿਸ ਆਫ਼ ਫਸਟ ਲੇਡੀ ਵੀ ਬਣਾਇਆ ਗਿਆ ਹੈ। ਇਹ ਵਾਈਟ ਹਾਊਸ ਦੇ ਪੂਰਬੀ ਵਿੰਗ ਵਿਚ ਸਥਿਤ ਹੈ। ਇਕ ਵੱਡਾ ਸਟਾਫ਼ ਫਸਟ ਲੇਡੀ ਦੇ ਲਈ ਹਮੇਸ਼ਾ ਡੈਡੀਕੇਟਡ ਰਹਿੰਦਾ ਹੈ।ਫਸਟ ਲੇਡੀ ਲਈ ਇਹ ਜ਼ਿੰਮੇਵਾਰੀਆਂ ਅਤੇ ਸਹੂਲਤਾਂ ਸਿਰਫ਼ ਅਮਰੀਕਾ ਵਿਚ ਹੀ ਨਹੀਂ ਬਲਕਿ ਹੋਰ ਕਈ ਮੁਲਕਾਂ ਵਿਚ ਅਜਿਹਾ ਕੀਤਾ ਜਾਂਦਾ ਹੈ।