ਅਤਿਵਾਦੀ ਭਾਰਤ ’ਚ ਆਉਣ ਲਈ ਕੰਟਰੋਲ ਰੇਖਾ ਦੇ ਲਾਂਚ ਪੈਡਾਂ ਉਤੇ ਉਡੀਕ ਕਰ ਰਹੇ ਹਨ : ਬੀ.ਐਸ.ਐਫ. 

ਸ੍ਰੀਨਗਰ : ਬੀ.ਐਸ.ਐਫ. ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਸਨਿਚਰਵਾਰ ਨੂੰ ਕਿਹਾ ਕਿ ਅਤਿਵਾਦੀ ਕਸ਼ਮੀਰ ਵਾਦੀ ’ਚ ਘੁਸਪੈਠ ਕਰਨ ਲਈ ਕੰਟਰੋਲ ਰੇਖਾ ਦੇ ਪਾਰ ਲਾਂਚ ਪੈਡਾਂ ਉਤੇ ਇੰਤਜ਼ਾਰ ਕਰ ਰਹੇ ਸਨ ਪਰ ਸੁਰੱਖਿਆ ਬਲ ਚੌਕਸ ਹਨ ਅਤੇ ਅਜਿਹੀ ਕਿਸੇ ਵੀ ਕੋਸ਼ਿਸ਼ ਨੂੰ ਨਾਕਾਮ ਕਰਨ ਲਈ ਤਿਆਰ ਹਨ।

ਬੀ.ਐਸ.ਐਫ. ਕਸ਼ਮੀਰ ਫਰੰਟੀਅਰ ਦੇ ਇੰਸਪੈਕਟਰ ਜਨਰਲ (ਆਈ.ਜੀ.) ਅਸ਼ੋਕ ਯਾਦਵ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਘਾਟੀ ਵਿਚ ਅਤਿਵਾਦੀਆਂ ਨੂੰ ਘੁਸਪੈਠ ਕਰਨ ਦੀਆਂ ਕੋਸ਼ਿਸ਼ਾਂ ਸਰਦੀਆਂ ਦੀ ਸ਼ੁਰੂਆਤ ਤੋਂ ਪਹਿਲਾਂ ਹੀ ਰਹਿੰਦੀਆਂ ਹਨ। 

ਉਨ੍ਹਾਂ ਕਿਹਾ, ‘‘ਬਰਫਬਾਰੀ ਤੋਂ ਪਹਿਲਾਂ ਹਮੇਸ਼ਾਂ ਘੁਸਪੈਠ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਅਜੇ ਵੀ ਲਗਭਗ ਦੋ ਮਹੀਨੇ ਹਨ, ਅਤੇ ਨਵੰਬਰ ਤਕ ਘੁਸਪੈਠ ਦੀ ਸੰਭਾਵਨਾ ਹੈ ਕਿਉਂਕਿ ਉਹ ਜਾਣਦੇ ਹਨ ਕਿ ਅਗਲੇ ਛੇ ਮਹੀਨਿਆਂ ਲਈ ਉਨ੍ਹਾਂ ਕੋਲ ਘੱਟ ਸੰਭਾਵਨਾ ਹੋਵੇਗੀ। ਇਸ ਲਈ, ਉਹ ਹਮੇਸ਼ਾ ਘੁਸਪੈਠ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ, ਪਰ ਫੋਰਸਾਂ ਦੀ ਚੌਕਸੀ ਦੇ ਕਾਰਨ, ਘੁਸਪੈਠ ਕਰਨਾ ਬਹੁਤ ਮੁਸ਼ਕਲ ਹੈ।’’

ਉਨ੍ਹਾਂ ਕਿਹਾ ਕਿ ਅਤਿਵਾਦੀ ਕੰਟਰੋਲ ਰੇਖਾ (ਐਲ.ਓ.ਸੀ.) ਦੇ ਪਾਰ ਲਾਂਚਪੈਡਾਂ ਉਤੇ ਘਾਟੀ ਵਿਚ ਘੁਸਪੈਠ ਕਰਨ ਦੇ ਮੌਕੇ ਦੀ ਉਡੀਕ ਕਰ ਰਹੇ ਹਨ। ਉਨ੍ਹਾਂ ਕਿਹਾ, ‘‘ਬਾਂਦੀਪੋਰਾ ਅਤੇ ਕੁਪਵਾੜਾ ਸੈਕਟਰਾਂ ’ਚ ਸਾਡੇ ਏ.ਓ.ਆਰ. ਦੇ ਸਾਹਮਣੇ ਕੰਟਰੋਲ ਰੇਖਾ ਦੇ ਪਾਰ ਲਾਂਚ ਪੈਡਾਂ ਉਤੇ ਅਤਿਵਾਦੀਆਂ ਦੀ ਮੌਜੂਦਗੀ ਹੈ। ਉਹ ਘੁਸਪੈਠ ਕਰਨ ਦੇ ਮੌਕੇ ਦਾ ਇੰਤਜ਼ਾਰ ਕਰ ਰਹੇ ਹਨ, ਪਰ ਸੁਰੱਖਿਆ ਬਹੁਤ ਸਖਤ ਹੈ। ਕਈ ਵਾਰ ਉਹ ਖਰਾਬ ਮੌਸਮ ਦੀ ਉਡੀਕ ਕਰਦੇ ਹਨ. ਇਸ ਲਈ, ਕੋਸ਼ਿਸ਼ਾਂ ਹਮੇਸ਼ਾ ਮੌਜੂਦ ਰਹਿੰਦੀਆਂ ਹਨ, ਪਰ ਅਸੀਂ ਕਿਸੇ ਵੀ ਸਥਿਤੀ ਲਈ ਤਿਆਰ ਅਤੇ ਚੌਕਸ ਹਾਂ।’’

ਯਾਦਵ ਨੇ ਕਿਹਾ ਕਿ ਫੌਜ ਅਤੇ ਬੀ.ਐਸ.ਐਫ. ਚੌਕਸ ਹਨ ਅਤੇ ਹਾਈ-ਟੈਕ ਨਿਗਰਾਨੀ ਉਪਕਰਣਾਂ ਦੀ ਮਦਦ ਨਾਲ ਕੰਟਰੋਲ ਰੇਖਾ ਉਤੇ ਬਹੁਤ ਚੰਗੀ ਤਰ੍ਹਾਂ ਦਬਦਬਾ ਬਣਾ ਰਹੇ ਹਨ। ਉਨ੍ਹਾਂ ਕਿਹਾ, ‘‘ਫੌਜ ਦੇ ਨਾਲ-ਨਾਲ ਅਸੀਂ ਵੀ ਐੱਲ.ਸੀ. ਉਤੇ ਬਹੁਤ ਵਧੀਆ ਦਬਦਬਾ ਬਣਾ ਰਹੇ ਹਾਂ। ਸੁਰੱਖਿਆ ਬਲਾਂ ਨੇ ਇਸ ਸਾਲ ਹੁਣ ਤਕ ਘੁਸਪੈਠ ਦੀਆਂ ਦੋ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰ ਦਿਤਾ ਹੈ। ਸਾਡੇ ਏ.ਓ.ਆਰ. ਵਿਚ ਘੁਸਪੈਠ ਕਰਨਾ ਬਹੁਤ ਮੁਸ਼ਕਲ ਹੈ ਕਿਉਂਕਿ ਜਿਸ ਚੌਕਸੀ ਨਾਲ ਅਸੀਂ ਅਪਣੇ ਫਰਜ਼ਾਂ ਨੂੰ ਨਿਭਾਉਂਦੇ ਹਾਂ ਅਤੇ ਸਾਡੇ ਕੋਲ ਨਵੀਂ ਵਿਧੀ ਅਤੇ ਨਵੇਂ ਨਿਗਰਾਨੀ ਉਪਕਰਣ ਹਨ।’’