H.D. Kumaraswamy

ਕਰਨਾਟਕ : ਮਹਾਗਠਬੰਧਨ ਫਾਰਮੂਲੇ ਤੋਂ ਬਣੀ ਕਰਨਾਟਕ ਦੀ ਕਾਂਗਰਸ ਅਤੇ ਜੇਡੀਐਸ ਸਰਕਾਰ 'ਤੇ ਇਕ ਵਾਰ ਫਿਰ ਭੰਬਲ ਭੂਸਿਆਂ ਦੇ ਬੱਦਲ ਮੰਡਰਾ ਰਹੇ ਹਨ। ਲਗਾਤਾਰ ਮੱਚ ਰਹੀ ਸਿਆਸੀ ਹਲਚਲ ਦੇ ਵਿਚ ਮੁੱਖ ਮੰਤਰੀ ਐਚਡੀ ਕੁਮਾਰਸਵਾਮੀ ਨੇ ਬਿਆਨ ਦਿਤਾ ਹੈ ਕਿ ਉਹ ਅਹੁਦਾ ਛੱਡਣ ਲਈ ਤਿਆਰ ਹਨ। ਕਾਂਗਰਸ ਦੇ ਵਿਧਾਇਕ ਅਪਣੀ ਲਕੀਰ ਪਾਰ ਕਰ ਰਹੇ ਹਨ।

ਉਨ੍ਹਾਂ ਨੇ ਕਿਹਾ ਕਿ ਕਾਂਗਰਸ ਨੇਤਾਵਾਂ ਨੂੰ ਅਪਣੇ ਵਿਧਾਇਕਾਂ ਨੂੰ ਕੰਟਰੋਲ ਕਰਨਾ ਚਾਹੀਦਾ ਹੈ। ਦੱਸ ਦਈਏ ਕਿ ਕਾਂਗਰਸ ਦੇ ਕੁੱਝ ਵਿਧਾਇਕਾਂ ਨੇ ਬਿਆਨ ਦਿਤਾ ਸੀ ਕਿ ਉਨ੍ਹਾਂ ਦੇ ਨੇਤਾ ਕੁਮਾਰ ਸਵਾਮੀ ਨਹੀਂ ਸਗੋਂ ਕਾਂਗਰਸ ਦੇ ਸਿੱਧਰਮਈਆ ਹਨ। ਜਿਸ 'ਤੇ ਐਚਡੀ ਕੁਮਾਰਸਵਾਮੀ ਨੇ ਜਵਾਬ ਦਿਤਾ ਹੈ। ਕੁਮਾਰਸਵਾਮੀ ਨੇ ਕਿਹਾ ਕਿ ਕਾਂਗਰਸ ਨੂੰ ਸਾਰੇ ਮੁੱਦਿਆਂ ਨੂੰ ਦੇਖਣਾ ਚਾਹੀਦਾ ਹੈ, ਜੇਕਰ ਉਹ ਇਹ ਸਭ ਜਾਰੀ ਰੱਖਣਾ ਚਾਹੁੰਦੇ ਹਨ ਤਾਂ ਮੈਂ ਅਹੁਦਾ ਛੱਡਣ ਲਈ ਤਿਆਰ ਹਾਂ। ਜ਼ਿਕਰਯੋਗ ਹੈ ਕਿ ਪਿਛਲੇ ਕੁੱਝ ਦਿਨਾਂ ਤੋਂ ਕਰਨਾਟਕ ਦੀ ਸਰਕਾਰ 'ਤੇ ਸੰਕਟ ਮੰਡਰਾ ਰਿਹਾ ਹੈ।

ਹਲੇ ਕੁੱਝ ਦਿਨ ਪਹਿਲਾਂ ਹੀ ਦੋ ਆਜ਼ਾਦ ਵਿਧਾਇਕਾਂ ਨੇ ਕੁਮਾਰ ਸਵਾਮੀ ਸਰਕਾਰ ਤੋਂ ਅਪਣਾ ਸਮਰਥਨ ਵਾਪਸ ਲੈ ਲਿਆ ਸੀ। ਇਸ ਤੋਂ ਪਹਿਲਾਂ ਕਾਂਗਰਸ ਦੇ ਹੀ ਕੁੱਝ ਵਿਧਾਇਕ ਨਰਾਜ ਚੱਲ ਰਹੇ ਸਨ ਅਤੇ ਕਿਹਾ ਜਾ ਰਿਹਾ ਸੀ ਕਿ ਉਹ ਸਾਰੇ ਭਾਰਤੀ ਜਨਤਾ ਪਾਰਟੀ ਦੇ ਸੰਪਰਕ ਵਿਚ ਸਨ। ਬੀਤੇ ਦਿਨੀਂ ਖ਼ਬਰਾਂ ਸਨ ਕਿ ਕਾਂਗਰਸ ਦੇ ਕੁੱਝ ਵਿਧਾਇਕ ਨਰਾਜ ਹਨ ਅਤੇ ਮੁੰਬਈ ਵਿਚ ਡੇਰਾ ਪਾਏ ਹੋਏ ਹਨ। ਇਸ ਵਿਚ ਬੀਜੇਪੀ ਦੇ ਨੇਤਾਵਾਂ ਦੇ ਵੱਲੋਂ ਲਗਾਤਾਰ ਬਿਆਨਬਾਜੀ ਕੀਤੀ ਜਾ ਰਹੀ ਸੀ ਕਿ ਕੁੱਝ ਹੀ ਦਿਨਾਂ ਵਿਚ ਕਰਨਾਟਕ ਵਿਚ ਵੀ ਬੀਜੇਪੀ ਦੀ ਸਰਕਾਰ ਹੋਵੇਗੀ।

ਜਿਸ ਦੌਰਾਨ ਕਾਂਗਰਸ ਵਿਧਾਇਕ ਮੁੰਬਈ ਵਿਚ ਸਨ, ਉਦੋਂ ਬੀ.ਐਸ. ਯੇਦੀਯੁਰੱਪਾ ਅਪਣੇ ਸਾਰੇ 104 ਵਿਧਾਇਕਾਂ ਦੇ ਨਾਲ ਗੁਰੂਗਰਾਮ ਵਿਚ ਡੇਰਾ ਜਮਾਏ ਹੋਏ ਸਨ। ਇੱਥੇ ਉਹ ਪਾਰਟੀ ਦੇ ਮੁਖੀ ਅਮਿਤ ਸ਼ਾਹ ਨਾਲ ਮੁਲਾਕਾਤ ਕਰਨ ਆਏ ਸਨ ਪਰ ਕਿਆਸਰਾਈਆਂ ਦਾ ਬਾਜ਼ਾਰ ਗਰਮ ਸੀ ਕਿ ਇਹ ਸਭ ਸਰਕਾਰ ਬਣਾਉਣ ਦੀਆਂ ਕੋਸ਼ਿਸ਼ਾਂ ਹਨ। ਜ਼ਿਕਰਯੋਗ ਹੈ ਕਿ ਕਰਨਾਟਕ ਵਿਚ ਬੀਤੇ ਸਾਲ ਅਪ੍ਰੈਲ - ਮਈ ਵਿਚ ਚੋਣ ਹੋਏ ਸਨ, ਉਦੋਂ ਤੋਂ ਹੁਣ ਤੱਕ ਕਈ ਵਾਰ ਕਾਂਗਰਸ ਅਤੇ ਜੇਡੀਐਸ  ਦੇ ਵਿੱਚ ਤਲਖੀ ਦੇਖਣ ਨੂੰ ਮਿਲੀ ਹੈ।

ਕਰਨਾਟਕ ਵਿਚ ਸਰਕਾਰ ਬਣਾਉਣ ਲਈ 113 ਵਿਧਾਇਕਾਂ ਦੀ ਜ਼ਰੂਰਤ ਹੈ। ਇਸ ਸਮੇਂ ਕੁਮਾਰਸਵਾਮੀ ਸਰਕਾਰ ਦੇ ਨਾਲ ਕਾਂਗਰਸ ਦੇ 80 ਅਤੇ ਜੇਡੀਐਸ ਦੇ 37 ਮਤਲਬ ਕੁਲ 117 ਵਿਧਾਇਕ ਹਨ। ਜਦੋਂ ਕਿ 2 ਆਜ਼ਾਦ ਵਿਧਾਇਕਾਂ ਨੇ ਸਮਰਥਨ ਵਾਪਸ ਲੈ ਲਿਆ ਹੈ, ਉਥੇ ਹੀ ਬਸਪਾ ਦਾ 1 ਵਿਧਾਇਕ ਪਹਿਲਾਂ ਹੀ ਸਮਰਥਨ ਵਾਪਸ ਲੈ ਚੁੱਕਿਆ ਹੈ। ਬੀਜੇਪੀ ਦੇ ਕੋਲ 104 ਵਿਧਾਇਕ ਹਨ ਅਜਿਹੇ ਵਿਚ ਉਸ ਨੂੰ 9 ਵਿਧਾਇਕਾਂ ਦੀ ਜ਼ਰੂਰਤ ਹੈ।