Union Minister accuses Arvind Kejriwal of insulting national flag

ਨਵੀਂ ਦਿੱਲੀ: ਕੇਂਦਰੀ ਸੱਭਿਆਚਾਰ ਅਤੇ ਸੈਰ ਸਪਾਟਾ ਮੰਤਰੀ ਪ੍ਰਹਿਲਾਦ ਸਿੰਘ ਪਟੇਲ ਦਾ ਦੋਸ਼ ਹੈ ਕਿ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਭਾਰਤ ਦੇ ਰਾਸ਼ਟਰੀ ਝੰਗੇ ਤਿਰੰਗੇ ਦਾ ਅਪਮਾਨ ਕੀਤਾ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਸੀਐਮ ਦੀ ਕੁਰਸੀ ਪਿੱਛੇ ਲੱਗੇ ਤਿਰੰਗੇ ਵਿਚ ਸਫੇਦ ਹਿੱਸਾ ਘੱਟ ਕਰਕੇ ਹਰਾ ਹਿੱਸਾ ਜੋੜਿਆ ਹੋਇਆ ਲੱਗਦਾ ਹੈ

ਉਹਨਾਂ ਨੇ ਇਸ ਸਬੰਧੀ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਅਤੇ ਦਿੱਲੀ ਦੇ ਉਪ ਰਾਜਪਾਲ ਨੂੰ ਚਿੱਠੀ ਲਿਖੀ ਹੈ। ਚਿੱਠੀ ਵਿਚ ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਪ੍ਰੈੱਸ ਕਾਨਫਰੰਸ ਦੌਰਾਨ ਬੈਕਗ੍ਰਾਊਂਡ ਵਿਚ ਜੋ ਤਿਰੰਗਾ ਲਗਾਇਆ ਹੈ, ਉਹ ਫਲੈਗ ਕੋਡ ਅਨੁਸਾਰ ਸਹੀ ਨਹੀਂ ਹੈ। ਕੇਂਦਰੀ ਮੰਤਰੀ ਨੇ ਅਪਣੀ ਚਿੱਠੀ ਵਿਚ ਇਸ ਗਲਤੀ ਨੂੰ ਤੁਰੰਤ ਸੁਧਾਰਨ ਦੀ ਮੰਗ ਕੀਤੀ ਹੈ।

ਉਹਨਾਂ ਦਾ ਕਹਿਣਾ ਹੈ ਕਿ ਕੇਜਰੀਵਾਲ ਦੀ ਪ੍ਰੈੱਸ ਕਾਨਫਰੰਸ ਦੌਰਾਨ ਬੈਕਗ੍ਰਾਊਂਡ ਵਿਚ ਰਾਸ਼ਟਰੀ ਤਿਰੰਗੇ ਵਿਚ ਜਿਸ ਤਰ੍ਹਾਂ ਸਫੇਰ ਰੰਗ ਨੂੰ ਘੱਟ ਕੀਤਾ ਗਿਆ ਹੈ ਅਤੇ ਹਰੇ ਰੰਗ ਨੂੰ ਵੱਡਾ ਕੀਤਾ ਗਿਆ ਹੈ, ਉਹ ਰਾਸ਼ਟਰੀ ਫਲੈਗ ਕੋਡ ਦਾ ਉਲੰਘਣ ਹੈ। ਸੈਰ ਸਪਾਟਾ ਮੰਤਰੀ ਨੇ ਉਪ ਰਾਜਪਾਲ ਨੂੰ ਭੇਜੀ ਚਿੱਠੀ ਵਿਚ ਲਿਖਿਆ, ‘ਅਰਵਿੰਦ ਕੇਜਰੀਵਾਲ, ਮਾਣਯੋਗ ਮੁੱਖ ਮੰਤਰੀ, ਦਿੱਲੀ ਜਦੋਂ ਵੀ ਟੀਵੀ ਚੈਨਲ ’ਤੇ ਸੰਬੋਧਨ ਕਰਦੇ ਹਨ ਤਾਂ ਉਹਨਾਂ ਦੀ ਕੁਰਸੀ ਪਿੱਛੇ ਲੱਗੇ ਰਾਸ਼ਟਰੀ ਝੰਗੇ ’ਤੇ ਧਿਆਨ ਜਾਂਦਾ ਹੈ ਕਿਉਂਕਿ ਉਹ ਕੁੱਝ ਵੱਖਰਾ ਲੱਗਦਾ ਹੈ’।

ਉਹਨਾਂ ਅੱਗੇ ਲਿਖਿਆ, ‘ਤਿਰੰਗੇ ਵਿਚ ਸਫੇਦ ਹਿੱਸੇ ਨੂੰ ਘੱਟ ਕਰਕੇ ਹਰੇ ਨੂੰ ਜੋੜ ਦਿੱਤਾ ਗਿਆ ਹੈ ਜੋ ਕਿ ਭਾਰਤ ਸਰਕਾਰ ਗ੍ਰਹਿ ਮੰਤਰਾਲੇ ਵੱਲੋਂ ਨਿਰਧਾਰਤ ਇੰਡੀਅਨ ਫਲੈਗ ਕੋਡ ਵਿਚ ਦੱਸੇ ਗਏ ਭਾਗ 1 ਦੇ 1.3 ਵਿਚ ਦਿੱਤੇ ਗਏ ਮਾਨਕਾਂ ਅਨੁਸਾਰ ਨਹੀਂ ਦਿਖਾਈ ਦਿੰਦਾ ਹੈ’।