Union Minister Ram Vilas Paswan takes oath as Rajya Sabha member

ਨਵੀਂ ਦਿੱਲੀ : ਰਾਜ ਸਭਾ ਲਈ ਪਿਛਲੇ ਹਫ਼ਤੇ ਬਿਹਾਰ ਤੋਂ ਬਗੈਰ ਵਿਰੋਧ ਚੁਣੇ ਗਏ ਕੇਂਦਰੀ ਮੰਤਰੀ ਰਾਮਵਿਲਾਸ ਪਾਸਵਾਨ ਨੇ ਸੋਮਵਾਰ ਨੂੰ ਉੱਚ ਸਦਨ ਦੀ ਮੈਂਬਰਸ਼ਿਪ ਦੀ ਸਹੁੰ ਚੁੱਕੀ। ਬੀਜੂ ਜਨਤਾ ਦਲ (ਬੀਜਦ) ਦੇ ਸਮਰਥਨ ਤੋਂ ਉੱਚ ਸਦਨ ਲਈ ਓੜੀਸਾ ਤੋਂ ਚੁਣੇ ਗਏ ਭਾਜਪਾ ਦੇ ਅਸ਼ਵਨੀ ਵੈਸ਼ਣਵ ਨੇ ਵੀ ਰਾਜਸਭਾ ਦੀ ਮੈਂਬਰਸ਼ਿਪ ਦਾ ਹਲਫ਼ ਲਿਆ।

ਸਦਨ ਦੀ ਬੈਠਕ ਸ਼ੁਰੂ ਹੋਣ 'ਤੇ ਸਭਾਪਤੀ ਐਮ. ਵੈਂਕਈਆ ਨਾਇਡੂ ਨੇ ਪਾਸਵਾਨ ਨੂੰ ਸਹੁੰ ਚੁੱਕਣ ਲਈ ਸੱਦਾ ਦਿੱਤਾ। ਆਪਣੇ ਲੰਮੇ ਸਿਆਸੀ ਕਰੀਅਰ 'ਚ ਦੂਜੀ ਵਾਰ ਰਾਜ ਸਭਾ ਲਈ ਚੁਣੇ ਗਏ ਪਾਸਵਾਨ ਨੇ ਹਿੰਦੀ 'ਚ ਸਹੁੰ ਚੁੱਕੀ। ਲੋਕ ਜਨਸ਼ਕਤੀ ਪਾਰਟੀ ਨੇਤਾ ਪਾਸਵਾਨ ਬੀਤੇ ਸ਼ੁਕਰਵਾਰ ਨੂੰ ਬਗੈਰ ਵਿਰੋਧ ਚੁਣੇ ਗਏ। 

ਬਿਹਾਰ ਤੋਂ ਪਾਸਵਾਨ ਦੇ ਮੰਤਰੀ ਮੰਡਲ ਸਹਿਯੋਗੀ ਰਵੀਸ਼ੰਕਰ ਪ੍ਰਸਾਦ ਹਾਲ ਹੀ 'ਚ ਹੋਈਆਂ ਲੋਕ ਸਭਾ ਚੋਣਾਂ 'ਚ ਪਟਨਾ ਸਾਹਿਬ ਸੰਸਦੀ ਸੀਟ ਤੋਂ ਚੋਣ ਜਿੱਤੇ ਹਨ। ਉਨ੍ਹਾਂ ਦੇ ਰਾਜ ਸਭਾ ਤੋਂ ਅਸਤੀਫ਼ ਦੇਣ ਮਗਰੋਂ ਉੱਚ ਸਦਨ 'ਚ ਉਪ ਚੋਣ ਜ਼ਰੂਰੀ ਹੋ ਗਈ ਸੀ। ਪਾਸਵਾਨ, ਪ੍ਰਦਾਸ ਦੀ ਥਾਂ 'ਤੇ ਉੱਚ ਸਦਨ 'ਚ ਆਏ ਹਨ। ਪਾਸਵਾਨ ਦੇ ਸਹੁੰ ਚੁੱਕਣ ਤੋਂ ਬਾਅਦ ਉਨ੍ਹਾਂ ਨੂੰ ਸਭਾਪਤੀ ਐਮ. ਵੈਂਕਈਆ ਨੇ ਮੁਸਕੁਰਾਉਂਦੇ ਹੋਏ ਪੁੱਛਿਆ ਕਿ ਉਹ ਕਿੰਨੀ ਵਾਰ ਸੰਸਦ ਲਈ ਚੁਣੇ ਗਏ ਹਨ। ਇਸ 'ਤੇ ਪਾਸਵਾਨ ਨੇ ਜਵਾਬ ਦਿੱਤਾ '11 ਵਾਰ'। ਇਸ 'ਚ 9 ਵਾਰ ਉਹ ਲੋਕ ਸਭਾ ਅਤੇ 2 ਵਾਰ ਰਾਜ ਸਭਾ ਮੈਂਬਰ ਚੁਣੇ ਗਏ ਹਨ।

ਜ਼ਿਕਰਯੋਗ ਹੈ ਕਿ ਇਸ ਵਾਰ ਪਾਸਵਾਨ ਨੇ ਲੋਕ ਸਭਾ ਚੋਣ ਨਹੀਂ ਲੜੀ ਸੀ। ਹਾਜੀਪੁਰ ਲੋਕ ਸਭਾ ਸੀਟ ਤੋਂ ਕਈ ਵਾਰ ਜਿੱਤ ਦਰਜ ਕਰ ਚੁੱਕੇ ਪਾਸਵਾਨ ਦੀ ਥਾਂ ਇਸ ਵਾਰ ਇਹ ਸੰਸਦੀ ਸੀਟ ਉਨ੍ਹਾਂ ਨੇ ਛੋਟੇ ਭਰਾ ਅਤੇ ਲੋਕ ਜਨਸ਼ਕਤੀ ਪਾਰਟੀ ਦੀ ਸੂਬਾ ਇਕਾਈ ਦੇ ਪ੍ਰਧਾਨ ਪਸ਼ੁਪਤੀ ਕੁਮਾਰ ਪਾਰਸ ਨੇ ਜਿੱਤੀ ਹੈ।