ਸੰਗਰੂਰ : ਭਾਰਤੀ ਕਿਸਾਨ ਯੂਨੀਅਨ ਉਗਰਾਹਾਂ ਨੇ ਦੱਸਿਆ ਕਿ ਬੇਨੜਾ ਟੋਲ ਪਲਾਜੇ 'ਤੇ ਯੂਨੀਅਨ ਦਾ ਰੋਸ ਧਰਨਾ ਲਾਇਆ ਹੋਇਆ ਸੀ। ਉਸ ਵਿਚ ਅਚਾਨਕ ਦਿਲ ਦਾ ਦੌਰਾ ਪੈਣ ਕਰਕੇ ਮੇਘ ਰਾਜ ਨਾਗਰੀ ਕਿਸਾਨ ਦੀ ਮੌਤ ਹੋ ਗਈ ਸੀ ਅਤੇ ਯੂਨੀਅਨ ਨੇ ਉਸਦੀ ਮੌਤ ਦੇ ਮੁਆਵਜ਼ੇ ਵੱਜੋਂ ਦਸ ਲੱਖ ਰੁਪਏ ਦੀ ਮੰਗ ਕੀਤੀ ਸੀ, ਪਰਿਵਾਰ ਦੇ ਇਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਅਤੇ ਕਿਸਾਨ ਸਿਰ ਸਾਰੇ ਚੜ੍ਹੇ ਕਰਜ਼ੇ ਨੂੰ ਮੁਆਫ਼ ਕਰਨ ਦੀ ਮੰਗ ਕੀਤੀ ਸੀ ਪਰ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਇਹ ਮੰਗ ਮੰਨਣ ਦੀ ਲੋੜ ਨਹੀਂ ਸੀ ਸਮਝੀ ।

ਇਸ ਲਈ ਯੂਨੀਅਨ ਨੇ ਅੱਜ ਤੋਂ ਦਸ ਦਿਨ ਪਹਿਲਾਂ ਡੀ ਸੀ ਦਫ਼ਤਰ ਸੰਗਰੂਰ ਅੱਗੇ ਪੱਕਾ ਰੋਸ ਧਰਨਾ ਲਾ ਦਿੱਤਾ ਸੀ ਅਤੇ ਡੀ ਸੀ ਸਮੇਤ ਕਿਸੇ ਵੀ ਮੁਲਾਜ਼ਮ ਨੂੰ ਦਫ਼ਤਰ ਵਿਚ ਜਾਣ ਨਹੀਂ ਸੀ ਦਿੱਤਾ । ਡੀ ਸੀ ਦਫ਼ਤਰ ਤੇ ਤਿੰਨੇ ਗੇਟਾਂ 'ਤੇ ਰੋਸ ਧਰਨੇ ਲਾਉਣ ਕਾਰਨ ਡੀ ਸੀ ਦਫ਼ਤਰ ਦਾ ਕੰਮ ਇਕ ਤਰ੍ਹਾਂ ਠੱਪ ਹੋ ਕੇ ਰਹਿ ਗਿਆ ਸੀ। ਤੀਜੇ ਕੁ ਦਿਨ ਡੀ ਸੀ ਸੰਗਰੂਰ ਰਾਮਵੀਰ ਨੇ ਸੁਨਾਮ ਰੋਡ 'ਤੇ ਕਿਸੇ ਪ੍ਰਰਾਈਵੇਟ ਥਾਂ 'ਤੇ ਯੂਨੀਅਨ ਨਾਲ ਮੀਟਿੰਗ ਕਰਕੇ ਤਿੰਨ ਲੱਖ ਰੁਪਏ ਦੇ ਕੇ ਮੇਘ ਰਾਜ ਨਾਗਰੀ ਦੀ ਦੇਹ ਦਾ ਸੰਸਕਾਰ ਕਰਨ ਲਈ ਕਿਹਾ ਸੀ, ਪਰ ਯੂਨੀਅਨ ਨੇ ਸਾਫ਼ ਇਨਕਾਰ ਦਿੱਤਾ ਸੀ।

ਪਰ ਸੰਘਰਸ਼ ਲੰਬਾ ਅਤੇ ਫ਼ੈਸਲਾਕੁਨ ਮੋੜ 'ਤੇ ਆ ਜਾਣ ਕਾਰਨ ਪ੍ਰਸ਼ਾਸਨ ਨੂੰ ਅੱਜ ਸਾਰੀਆਂ ਮੰਗਾਂ ਮੰਨਣੀਆਂ ਪਈਆਂ। ਸਿੱਖਿਆ ਮੰਤਰੀ ਵਿਜੈਇੰਦਰ ਸਿੰਗਲਾ ਦੀ ਕੋਠੀ ਅੱਗੇ ਰੋਸ ਧਰਨਾ ਡੀ ਸੀ ਦਫ਼ਤਰ ਤੋਂ ਤਬਦੀਲ ਹੋਣ ਕਰਕੇ ਅੱਜ ਰੋਸ ਧਰਨੇ ਦੌਰਾਨ ਧੂਰੀ ਦੇ ਐਸ ਡੀ ਐਮ ਲਤੀਫ਼ ਅਹਿਮਦ ਪਹੰਚੇ । ਉਨ੍ਹਾਂ ਤਿੰਨ ਲੱਖ ਦਾ ਚੈੱਕ ਦੇ ਦਿੱਤਾ। ਦੋ ਲੱਖ ਰੁਪਏ ਨਕਦ ਅਤੇ ਪੰਜ ਲੱਖ ਦਾ ਚੈੱਕ ਭੋਗ ਵਾਲੇ ਦਿਨ ਦਾ ਵਾਅਦਾ ਕੀਤਾ ਅਤੇ ਸਰਕਾਰੀ ਨੌਕਰੀ ਲਈ ਬਿਨੇ ਪੱਤਰ ਲੈਣ ਅਤੇ ਕਰਜ਼ੇ ਸਬੰਧੀ ਪੜਤਾਲ ਕਰਨ ਦਾ ਵਾਅਦਾ ਕੀਤਾ। ਇਹ ਸਭ ਕੁਝ ਹੋਣ 'ਤੇ ਕਿਸਾਨਾਂ ਨੇ ਰੋਸ ਧਰਨਾ ਚੁੱਕ ਲਿਆ। ਰੋਸ ਧਰਨੇ ਦੀ ਅਗਵਾਈ ਜ਼ਿਲ੍ਹਾ ਪ੍ਰਧਾਨ ਅਮਰੀਕ ਸਿੰਘ ਗੰਢੂਆਂ ਅਤੇ ਬਲਾਕ ਪ੍ਰਧਾਨ ਗੋਬਿੰਦਰ ਸਿੰਘ ਗੰਢੂਆਂ ਨੇ ਕੀਤੀ। ਇਸ ਮੌਕੇ ਭਾਰੀ ਗਿਣਤੀ ਵਿਚ ਅੌਰਤਾਂ , ਮਰਦ ਅਤੇ ਬੱਚੇ ਹਾਜ਼ਰ ਸਨ