ਲੁਟੇਰਿਆਂ ਨੇ ਦਿਵਿਆਂਗ ਗੁਰਸਿੱਖ ਨੌਜੁਆਨ ਤੋਂ ਖੋਹਿਆ ਮੋਬਾਈਲ, ਇਕ ਮਹੀਨੇ 'ਚ ਦੂਜੀ ਵਾਰ ਬਣਾਇਆ ਨਿਸ਼ਾਨਾ

ਅੰਮ੍ਰਿਤਸਰ : ਅੰਮ੍ਰਿਤਸਰ 'ਚ ਇਕ ਅੰਗਹੀਣ ਗੁਰਸਿੱਖ ਨੌਜੁਆਨ ਤੋਂ  ਦੋ ਵਾਰ ਮੋਬਾਈਲ ਖੋਹਣ ਦੀ ਘਟਨਾ ਸਾਹਮਣੇ ਆਈ ਹੈ। ਪਹਿਲਾਂ ਔਰਤਾਂ ਵਲੋਂ ਅਤੇ ਦੂਜੀ ਵਾਰ ਉਹ ਲੁਟੇਰਿਆਂ ਦਾ ਸ਼ਿਕਾਰ ਹੋ ਗਿਆ। ਇਸ ਘਟਨਾ ਦੀ ਸ਼ਿਕਾਇਤ ਪੁਲਿਸ ਕੋਲ ਪਹੁੰਚ ਗਈ ਹੈ, ਪਰ ਉਹ ਹੱਥੋਪਾਈ ਕਰਨ ਵਾਲੇ ਦਾ ਚਰਿੱਤਰ ਵੀ ਦੱਸਣ ਤੋਂ ਅਸਮਰੱਥ ਹੈ। 

ਇਹ ਵੀ ਪੜ੍ਹੋ: ਪੀ.ਟੀ.ਸੀ. ਵਲੋਂ ਕੀਤਾ ਜਾ ਰਿਹਾ ਕੂੜ ਪ੍ਰਚਾਰ ਉਨ੍ਹਾਂ ਦੀ ਬੁਖਲਾਹਟ ਦਾ ਨਤੀਜਾ ਹੈ : ਨਾਇਬ ਸਿੰਘ

ਜਾਣਕਾਰੀ ਅਨੁਸਾਰ ਰਜਿੰਦਰ ਸਿੰਘ ਬਚਪਨ ਤੋਂ ਹੀ ਅਪਾਹਜ ਹੈ। ਕੁਝ ਸਾਲ ਪਹਿਲਾਂ, ਉਸ ਨੇ ਪ੍ਰਵਾਰ ਦਾ ਢਿੱਡ ਭਰਨ ਲਈ ਸੈਲੀਬ੍ਰੇਸ਼ਨ ਮਾਲ ਦੇ ਸਾਹਮਣੇ ਅਪਣੇ ਟ੍ਰਾਈ ਸਾਈਕਲ 'ਤੇ ਧੂਪ ਸਟਿਕਸ ਵੇਚਣੇ ਸ਼ੁਰੂ ਕੀਤੇ। ਅੰਮ੍ਰਿਤਸਰ ਦੇ ਲੋਕਾਂ ਨੇ ਉਸ ਦੀ ਮਿਹਨਤ ਨੂੰ ਪਛਾਣਦਿਆਂ ਉਸ ਨੂੰ ਛੋਟੀ ਕੋਠੀ ਬਣਾ ਦਿਤੀ। ਰਜਿੰਦਰ ਨੇ ਰੋਜ਼ ਇਸ ਵਿਚ ਧੂਪ ਸਟਿਕ ਰੱਖ ਕੇ ਖਾਣ-ਪੀਣ ਦਾ ਸਾਮਾਨ ਵੇਚਣਾ ਸ਼ੁਰੂ ਕਰ ਦਿਤਾ ਸੀ ਪਰ ਹੁਣ ਲੁਟੇਰਿਆਂ ਨੇ ਇਸ ਨੌਜੁਆਨ ਨੂੰ ਵੀ ਨਾ ਬਖ਼ਸ਼ਿਆ। ਰਜਿੰਦਰ ਨੇ ਦਸਿਆ ਕਿ ਪਿਛਲੇ ਮਹੀਨੇ ਇਕ ਲੜਕੀ ਉਸ ਦੀ ਦੁਕਾਨ 'ਤੇ ਆਈ ਸੀ ਅਤੇ ਕੁਰਕੁਰੇ ਮੰਗੇ। ਜਦੋਂ ਉਹ ਉਸ ਨੂੰ ਕੁਰਕੁਰੇ ਦੇਣ ਲਈ ਪਿੱਛੇ ਮੁੜਿਆ ਤਾਂ ਕੁੜੀ ਬਿਨ੍ਹਾਂ ਕੁਰਕੁਰੇ ਲਏ ਹੀ ਚਲੀ ਗਈ। ਬਾਅਦ ਵਿਚ ਪਤਾ ਲੱਗਾ ਕਿ ਉਸ ਦਾ ਮੋਬਾਈਲ ਚੋਰੀ ਹੋ ਗਿਆ ਸੀ।

ਅੰਗਹੀਣ ਹੋਣ ਦੇ ਬਾਵਜੂਦ ਸਾਰਾ ਦਿਨ ਖੜ੍ਹੇ ਹੋ ਕੇ ਅਪਣਾ ਪੇਟ ਪਾਲ ਰਹੇ ਰਜਿੰਦਰ ਨੂੰ ਸਨੈਚਰਾਂ ਨੇ ਨਹੀਂ ਬਖ਼ਸ਼ਿਆ। ਸਨੈਚਰ ਬੀਤੀ ਦੁਪਹਿਰ ਉਸ ਦੇ ਖੋਖੇ 'ਤੇ ਆਏ ਅਤੇ ਮੋਬਾਈਲ ਖੋਹ ਕੇ ਫ਼ਰਾਰ ਹੋ ਗਏ। ਅਜਿਹਾ ਇਕ ਮਹੀਨੇ ਵਿਚ ਦੂਜੀ ਵਾਰ ਹੋਇਆ ਹੈ।ਤੁਰਨ-ਫਿਰਨ ਤੋਂ ਅਸਮਰੱਥ ਰਜਿੰਦਰ ਨੇ ਅਪਣੀ ਸ਼ਿਕਾਇਤ ਪੁਲਿਸ ਨੂੰ ਦਿਤੀ। ਪੁਲਿਸ ਨੇ ਸ਼ਿਕਾਇਤ ਦੇ ਆਧਾਰ 'ਤੇ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਰਜਿੰਦਰ ਤੋਂ ਮੋਬਾਈਲ ਖੋਹਣ ਵਾਲਿਆਂ ਦੀ ਪਛਾਣ ਕੀਤੀ ਜਾ ਰਹੀ ਹੈ। ਦਸਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਲੁਟੇਰਿਆਂ ਨੇ ਅੱਗੇ ਵਧ ਕੇ ਇਕ ਔਰਤ ਦਾ ਪਰਸ ਵੀ ਖੋਹ ਲਿਆ। ਪੁਲਿਸ ਵਲੋਂ ਲੁਟੇਰਿਆਂ ਬਾਰੇ ਜਾਣਕਾਰੀ ਹਾਸਲ ਕਰਨ ਲਈ ਇਲਾਕੇ ਵਿਚ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।