ਦਾਣਾ ਮੰਡੀ ਪੱਟੀ ਨੇੜੇ ਬੈਂਕ ਵਿਚ ਨਕਾਬਪੋਸ਼ ਲੁਟੇਰਿਆਂ ਨੇ ਹਥਿਆਰਾਂ ਦੀ ਨੋਕ ’ਤੇ ਕੀਤੀ ਲੁੱਟ
ਕਰੀਬ ਪੰਜ ਲੱਖ ਰੁਪਏ ਅਤੇ ਗਾਰਡ ਦੀ ਬੰਦੂਕ ਲੈ ਕੇ ਹੋਏ ਫਰਾਰ
ਪੱਟੀ (ਅਜੀਤ ਸਿੰਘ ਘਰਿਆਲਾ/ਪ੍ਰਦੀਪ): ਸ਼ਹਿਰ ਦੀ ਦਾਣਾ ਮੰਡੀ ਨੇੜੇ ਬੈਂਕ ਆਫ ਬੜੌਦਾ ਬ੍ਰਾਂਚ ਪੱਟੀ ਵਿਖੇ ਦੁਪਿਹਰ ਵੇਲੇ ਚਾਰ ਹਥਿਆਰ ਬੰਦ ਲੁਟੇਰਿਆਂ ਨੇ ਬੈਂਕ ਅੰਦਰ ਦਾਖਲ ਹੋ ਕੇ ਸਟਾਫ਼ ਨੂੰ ਬੰਦੀ ਬਨਾਉਣ ਉਪਰੰਤ ਕੈਸ਼ੀਅਰ ਕੋਲੋਂ ਕਰੀਬ ਪੰਜ ਲੱਖ ਰੁਪਏ ਨਗਦੀ ਖੋਹ ਲਈ ਅਤੇ ਜਾਂਦੇ ਹੋਏ ਬੈਂਕ ਗਾਰਡ ਕੋਲੋਂ 12 ਬੋਰ ਦੁਨਾਲੀ ਬੰਦੂਕ ਵੀ ਖੋਹ ਕੇ ਫਰਾਰ ਹੋ ਗਏ। ਇਸ ਦੌਰਾਨ ਕਿਸੇ ਕਿਸਮ ਦਾ ਕੋਈ ਜਾਨੀ ਨੁਕਸਾਨ ਨਹੀ ਹੋਇਆ।
Bank Employees
ਇਸ ਮੌਕੇ ਬੈਂਕ ਮੈਨੇਜਰ ਕਮਲਦੀਪ ਸਿੰਘ ਨੇ ਦੱਸਿਆ ਕਿ ਚਾਰ ਹਥਿਆਰਬੰਦ ਲੁਟੇਰਿਆਂ ਨੇ ਬੈਂਕ ਅੰਦਰ ਦਾਖਲ਼ ਹੋ ਕੇ ਸਟਾਫ ਨੂੰ ਬੰਦੀ ਬਣਾ ਕੇ ਗਾਰਡ ਕੋਲੋਂ ਬੰਦੂਕ ਖੋਹ ਲਈ। ਉਹਨਾਂ ਦੱਸਿਆ ਜਾਂਦੇ-ਜਾਂਦੇ ਲੁਟੇਰੇ ਬੈਂਕ ਵਿਚ ਸੀਸੀਟੀਟੀਵੀ ਦੀ ਡੀਵੀਆਰ ਅਤੇ ਇੰਟਰਨੈੱਟ ਸਿਸਟਮ ਵੀ ਉਖਾੜ ਕੇ ਨਾਲ ਲੈ ਗਏ ਹਨ। ਇਸ ਦੌਰਾਨ ਬੈਂਕ ਵਿਚ ਗਾਹਕ ਵੀ ਮੌਜੂਦ ਸਨ ਹਾਲਾਂਕਿ ਕੋਈ ਵੀ ਜਾਨੀ ਨੁਕਸਾਨ ਨਹੀਂ ਹੋਇਆ।
Bank Employees
ਬੈਂਕ ਮੈਨਜਰ ਨੇ ਦੱਸਿਆ ਕਿ ਉਹਨਾਂ ਵਲੋਂ ਤਰੁੰਤ ਪੁਲਿਸ ਥਾਣ ਸਿਟੀ ਪੱਟੀ ਅਤੇ ਪੀਸੀਆਰ ਨੂੰ ਸੂਚਿਤ ਕੀਤਾ ਗਿਆ ਹੈ। ਪੁਲਿਸ ਮੌਕੇ ’ਤੇ ਪਹੁੰਚ ਕੇ ਜਾਂਚ ਕਰ ਰਹੀ ਹੈ। ਪੁਲਿਸ ਪਾਰਟੀ ਸਮੇਤ ਘਟਨਾ ਦਾ ਜਾਇਜ਼ਾ ਲੈਣ ਆਏ ਮਨਿੰਦਰਪਾਲ ਸਿੰਘ ਡੀਐਸਪੀ ਨੇ ਦੱਸਿਆ ਕਿ ਉਕਤ ਲੁਟੇਰੇ ਅਪੋਲੋ ਕਾਰ ਵਿਚ ਆਏ ਸਨ, ਅੱਗੇ ਜਾ ਕੇ ਉਹ ਕਾਰ ਛੱਡ ਕੇ ਫਰਾਰ ਹੋ ਗਏ। ਪੁਲਿਸ ਨੇ ਲੁਟੇਰਿਆਂ ਦੀ ਕਾਰ ਬਰਾਮਦ ਕਰ ਲਈ ਹੈ, ਪੁਲਿਸ ਦਾ ਕਹਿਣਾ ਹੈ ਕਿ ਦੋਸ਼ੀ ਵੀ ਜਲਦ ਹੀ ਪੁਲਿਸ ਦੀ ਗ੍ਰਿਫ਼ਤ ਵਿਚ ਹੋਣਗੇ।