Garbage burners not controlled pollution control board

ਜਲੰਧਰ: ਐਨਜੀਟੀ ਦੀ ਬੈਠਕ ਨੂੰ ਖੋਖਲਾ ਸਾਬਿਤ ਕਰਨ ਵਿਚ ਜਲੰਧਰ ਨਗਰ ਨਿਗਮ ਅਤੇ ਪ੍ਰਦੂਸ਼ਣ ਕੰਟਰੋਲ ਬੋਰਡ ਕੋਈ ਕਸਰ ਨਹੀਂ ਛੱਡ ਰਿਹਾ। ਐਨਜੀਟੀ ਦੇ ਗਠਨ ਤੋਂ ਲੈ ਕੇ ਉਸ ਦੀਆਂ ਬੈਠਕਾਂ ਤਕ ਸਰਕਾਰ ਦੇ ਖਾਤਿਆਂ ਨਾਲ ਆਮ ਜਨਤਾ ਦੀ ਕਰੋੜਾਂ ਰੁਪਏ ਦੀ ਖੂਨ ਪਸੀਨੇ ਦੀ ਕਮਾਈ ਖਰਚ ਹੁੰਦੀ ਹੈ ਪਰ ਨਾ ਤਾਂ ਸ਼ਹਿਰ ਵਿਚ ਪ੍ਰਦੂਸ਼ਣ ਦੀ ਮਾਤਰਾ ਵਿਚ ਕੋਈ ਕਮੀ ਆ ਰਹੀ ਹੈ ਅਤੇ ਨਾ ਹੀ ਪ੍ਰਦੂਸ਼ਣ ਫੈਲਾਉਣ ਵਾਲਿਆਂ ਤੇ ਕੋਈ ਸ਼ਿਕੰਜਾ ਕੱਸਿਆ ਜਾ ਰਿਹਾ ਹੈ।

ਸ਼ਹਿਰ ਵਿਚ ਸ਼ਰੇਆਮ ਕੂੜਾ ਜਲਾਉਣ ਦੇ ਮਾਮਲੇ ਸਾਹਮਣੇ ਆ ਰਹੇ ਹਨ ਅਤੇ ਪ੍ਰਦੂਸ਼ਣ ਨਿਯੰਤਰਣ ਬੋਰਡ ਕੂੜਾ ਜਲਾਉਣ ਵਾਲਿਆਂ ਨੂੰ ਰੋਕਣ ਵਿਚ ਪੂਰੀ ਤਰ੍ਹਾਂ ਅਸਫ਼ਲ ਸਿੱਧ ਹੋ ਰਿਹਾ ਹੈ। ਇੱਥੇ ਤਕ ਕਿ ਪ੍ਰਦੂਸ਼ਣ ਵਿਭਾਗ ਦੇ ਇਕ ਅਧਿਕਾਰੀ ਨੇ ਤਾਂ ਸਾਫ਼ ਕਹਿ ਦਿੱਤਾ ਕਿ ਉਹਨਾਂ ਦੇ ਹੱਥ ਖੜ੍ਹੇ ਹਨ। ਅਸੀਂ ਬੈਠਕਾਂ ਵਿਚ ਹੀ ਉਲਝੇ ਹੋਏ ਹਾਂ ਕੂੜਾ ਕਿੱਥੇ ਸਾੜਿਆ ਜਾ ਰਿਹਾ ਅਤੇ ਕੌਣ ਸਾੜ ਰਿਹਾ ਹੈ ਇਸ ਵੱਲ ਧਿਆਨ ਦੇਣ ਲਈ ਫੁਰਸਤ ਹੀ ਨਹੀਂ ਹੈ।

ਅਜਿਹੇ ਵਿਚ ਆਮ ਲੋਕ ਜ਼ਹਿਰੀਲੇ ਧੂੰਏ ਵਿਚ ਸਾਹ ਲੈਣ ਲਈ ਮਜ਼ਬੂਰ ਹਨ। ਅਜਿਹਾ ਹੀ ਨਜ਼ਾਰਾ ਫੋਕਲ ਪੁਆਇੰਟ ਦੇ ਸਾਮਹਣੇ ਵਾਲੀ ਰੋਡ ਤੇ ਦਿਖਾਈ ਦਿੱਤਾ। ਜਿੱਥੇ ਸੈਂਕੜੇ ਲਿਫਾਫ਼ਿਆਂ ਤੇ ਤੇਲ ਛਿੜਕ ਕੇ ਕਿਸੇ ਨੇ ਅੱਗ ਲਗਾ ਦਿੱਤੀ ਅਤੇ ਸਾਰੇ ਇਕਾਕਿਆਂ ਵਿਚ ਗੰਦਾ ਧੂੰਆਂ ਫੈਲ ਗਿਆ। ਇਸ ਰੋਡ ਤੋਂ ਗੁਜ਼ਰਨ ਵਾਲਿਆਂ ਨੂੰ ਉਸ ਗੰਦੇ ਧੂੰਏਂ ਵਿਚ ਸਾਹ ਲੈਣਾ ਪੈ ਰਿਹਾ ਸੀ। ਖਾਸ ਕਰ ਕੇ ਇਸ ਰੋਡ ਤੇ ਫੋਕਲ ਪੁਆਇੰਟ ਜਾਣ ਵਾਲੀ ਲੈਬਰ ਦਾ ਬੁਰਾ ਹਾਲ ਸੀ।

ਮਾਮਲੇ ਬਾਰੇ ਲੋਕਾਂ ਦਾ ਕਹਿਣਾ ਸੀ ਕਿ ਨਾ ਤਾਂ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨਹਿਰਾਂ ਦੀ ਸਫ਼ਾਈ ਕਰ ਰਿਹਾ ਹੈ ਅਤੇ ਨਾ ਹੀ ਹਵਾ ਨੂੰ ਪ੍ਰਦੂਸ਼ਿਤ ਹੋਣ ਤੋਂ ਰੋਕਣ ਵਿਚ ਸਮਰੱਥ ਹੈ ਤੇ ਫਿਰ ਸਰਕਾਰ ਇਸ ਵਿਭਾਗ ਨੂੰ ਬੰਦ ਕਿਉਂ ਨਹੀਂ ਕਰ ਦਿੰਦੀ ਕਿਉਂ ਜਨਤਾ ਦੇ ਕਰੋੜਾਂ ਰੁਪਏ ਇਸ ਇਕ ਵਿਭਾਗ ਤੇ ਖਰਚ ਕੀਤੇ ਜਾ ਰਹੇ ਹਨ।

ਉੱਥੇ ਹੀ ਜਦੋਂ ਮਾਮਲੇ ਬਾਰੇ ਪ੍ਰਦੂਸ਼ਣ ਨਿਯੰਤਰ ਬੋਰਡ ਦੇ ਇਕ ਕਰਮਚਾਰੀ ਨਾਲ ਗੱਲ ਕੀਤੀ ਗਈ ਤਾਂ ਉਹਨਾਂ ਦਾ ਕਹਿਣਾ ਸੀ ਕਿ ਜਲੰਧਰ ਨਗਰ ਨਿਗਮ ਅਪਣੇ ਸਾਰੇ ਮੁੱਦਿਆਂ ਤੇ ਫੈਲ ਰਿਹਾ ਹੈ। ਇਹ ਕੰਮ ਨਗਰ ਨਿਗਮ ਦਾ ਹੈ ਕਿ ਕੂੜਾ ਇਕੱਠਾ ਹੀ ਨਾ ਹੋਣ ਦਿੱਤਾ ਜਾਵੇ ਅਤੇ ਉਸ ਨੂੰ ਅੱਗ ਵੀ ਨਾ ਲਗਾਈ ਜਾਵੇ ਪਰ ਐਨਜੀਟੀ ਦੇ ਆਦੇਸ਼ਾਂ ਤੋਂ ਬਾਅਦ ਵੀ ਨਗਰ ਨਿਗਮ ਕੁੱਝ ਨਹੀਂ ਕਰ ਰਿਹਾ ਅਤੇ ਸਾਰਾ ਇਲਜ਼ਾਮ ਪ੍ਰਦੂਸ਼ਣ ਕੰਟਰੋਲ ਬੋਰਡ ਤੇ ਲਗਾਇਆ ਜਾ ਰਿਹਾ ਹੈ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ   Facebook  ਤੇ ਲਾਈਕ Twitter  ਤੇ follow  ਕਰੋ।