Youth Kuwait Youth Trapped Government of Punjab

ਬਟਾਲਾ: ਅਕਸਰ ਹੀ ਰੋਜ਼ੀ ਰੋਟੀ ਕਮਾਉਣ ਲਈ ਪੰਜਾਬ ਦੇ ਲੋਕ ਵਿਦੇਸ਼ਾਂ ਨੂੰ ਕੂਚ ਕਰਦੇ ਹਨ ਤੇ ਅਪਣੇ ਪਰਿਵਾਰ ਦਾ ਵਧੀਆ ਪਾਲਣ-ਪੋਸ਼ਣ ਕਰਨ ਦੀ ਕੋਸ਼ਿਸ਼ ਕਰਦੇ ਨੇ। ਵਿਦੇਸ਼ਾਂ ਵਿਚ ਵੀ ਉਹਨਾਂ ਨੂੰ ਕਈ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅਜਿਹਾ ਹੀ ਸਾਹਮਣਾ ਕੀਤਾ ਹੈ ਜਸਬੀਰ ਸਿੰਘ ਨੇ। ਜਸਬੀਰ ਸਿੰਘ ਜ਼ਿਲ੍ਹਾ ਗੁਰਦਾਸਪੁਰ ਦੇ ਰਹਿਣ ਵਾਲੇ ਹਨ।

ਇਹਨਾਂ ਨੇ ਬਾਹਰਲੇ ਦੇਸ਼ ਤੋਂ ਇਕ ਵੀਡੀਉ ਜਾਰੀ ਕੀਤੀ ਸੀ ਕਿ ਉਹਨਾਂ ਦੇ ਪੈਰ ਵਿਚ ਮੁਸ਼ਕਿਲ ਹੋ ਗਈ ਹੈ ਪਰ ਉੱਥੇ ਉਸ ਦਾ ਕੋਈ ਹਾਲ ਨਹੀਂ ਪੁਛਦਾ ਨਾ ਹੀ ਉਸ ਦਾ ਇਲਾਜ ਹੁੰਦਾ ਹੈ। ਜਦੋਂ ਉਹਨਾਂ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਦਸਿਆ ਕਿ ਉਹ 6 ਮਹੀਨੇ ਪਹਿਲਾਂ ਛੁੱਟੀ ਕੱਟ ਕੇ ਗਏ ਸਨ ਉੱਥੇ ਉਹਨਾਂ ਨੂੰ ਪੇਟ ਨਾਲ ਸਬੰਧੀ ਪਰੇਸ਼ਾਨੀ ਹੋਣ ਲੱਗੀ ਅਤੇ ਫਿਰ ਨਾਲ-ਨਾਲ ਪੈਰ ਦੀ ਮੁਸ਼ਕਿਲ ਜ਼ਿਆਦਾ ਵਧ ਗਈ।

ਲਗਭਗ ਢਾਈ ਮਹੀਨੇ ਉਹਨਾਂ ਨੇ ਇਸ ਦਾ ਇਲਾਜ ਕਰਵਾਇਆ ਪਰ ਕਿਸੇ ਵੀ ਹਸਪਤਾਲ ਵਿਚ ਜਾਂ ਡਾਕਟਰ ਵੱਲੋਂ ਉਹਨਾਂ ਦੀ ਦੇਖਭਾਲ ਨਹੀਂ ਕੀਤੀ ਗਈ। ਉੱਥੋਂ ਦੇ ਡਾਕਟਰਾਂ ਦਾ ਕਹਿਣਾ ਸੀ ਕਿ ਉਹਨਾਂ ਦੀ ਲੱਤ ਵੱਢਣੀ ਪਵੇਗੀ। ਫਿਰ ਉਸ ਤੋਂ ਬਾਅਦ ਉਹਨਾਂ ਨੇ ਇਕ ਵੀਡੀਉ ਜਾਰੀ ਕੀਤੀ ਜਿਸ ਵਿਚ ਉਹਨਾਂ ਨੇ ਮਦਦ ਦੀ ਗੁਹਾਰ ਲਗਾਈ।

ਉਹਨਾਂ ਨੇ ਵੀਡੀਉ ਵਿਚ ਦਸਿਆ ਕਿ ਉਹਨਾਂ ਨੂੰ ਵਿਦੇਸ਼ ਵਿਚ ਬਹੁਤ ਮੁਸ਼ਕਿਲ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਤੇ ਉਹਨਾਂ ਨੂੰ ਜਲਦ ਤੋਂ ਜਲਦ ਉੱਥੋਂ ਕੱਢਿਆ ਜਾਵੇ। ਉਹਨਾਂ ਦੀ ਉਸ ਵੀਡੀਉ ਵਿਚ ਉਹਨਾਂ ਦਾ ਦੁੱਖ ਸਾਫ ਝਲਕ ਰਿਹਾ ਸੀ ਤੇ ਜਸਬੀਰ ਮਦਦ ਦੀ ਮੰਗ ਕਰ ਰਹੇ ਸਨ। ਉਹਨਾਂ ਨੂੰ ਕਿਸੇ ਤਰੀਕੇ ਨਾਲ ਭਾਰਤ ਲਿਆਂਦਾ ਗਿਆ ਤੇ ਉਹਨਾਂ ਦਾ ਇਲਾਜ ਸ਼ੁਰੂ ਕੀਤਾ ਗਿਆ।

ਪਰਿਵਾਰਕ ਮੈਂਬਰ ਨੇ ਦਸਿਆ ਕਿ ਉਹਨਾਂ ਨੇ ਉਹ ਵੀਡੀਉ ਇਕ ਨਿਊਜ਼ ਚੈਨਲ ਤੇ ਚਲਾਈ ਸੀ ਤੇ ਇਹ ਵੀਡੀਉ ਸਰਕਾਰ ਤਕ ਪਹੁੰਚਾਈ ਗਈ। ਫਿਰ ਸਰਕਾਰ ਦੀ ਮਦਦ ਨਾਲ ਜਸਬੀਰ ਨੂੰ ਭਾਰਤ ਲਿਆਂਦਾ ਗਿਆ ਤੇ ਬਟਾਲਾ ਹਸਪਤਾਲ ਵਿਚ ਸ਼ਿਫਟ ਕੀਤਾ ਗਿਆ ਹੈ ਤੇ ਉਹਨਾਂ ਦਾ ਇਲਾਜ ਚਲ ਰਿਹਾ ਹੈ।

ਬਟਾਲਾ ਹਸਪਤਾਲ ਦੇ ਚੇਅਰਪਰਸਨ ਨਾਲ ਗੱਲਬਾਤ ਕਰਨ ਤੇ ਉਹਨਾਂ ਦਸਿਆ ਕਿ ਜਸਬੀਰ ਦੇ ਪਿਤਾ ਉਹਨਾਂ ਕੋਲ ਆਏ ਸਨ ਕਿ ਉਹਨਾਂ ਦਾ ਬੱਚਾ ਕੂਵੈਤ ਵਿਚ ਹੈ ਤੇ ਉਸ ਦਾ ਪੈਰ ਵੀ ਬਹੁਤ ਖਰਾਬ ਹੋ ਚੁੱਕਾ ਹੈ ਤੇ ਉਹ ਲਾਕਡਾਊਨ ਤੇ ਕੋਰੋਨਾ ਵਾਇਰਸ ਕਰ ਕੇ ਵਿਦੇਸ਼ ਵਿਚ ਹੀ ਫਸ ਗਿਆ ਹੈ। ਹਸਪਤਾਲ ਵੱਲੋਂ ਉਹਨਾਂ ਨੂੰ ਟਿਕਟ ਦੇਣ ਦੀ ਵੀ ਗੱਲ ਆਖੀ ਗਈ ਸੀ।