Prem Singh Chandumajra

ਸ਼੍ਰੀ ਆਨੰਦਪੁਰ ਸਾਹਿਬ : ਲੋਕ ਸਭਾ ਸੀਟ ਸ਼੍ਰੀ ਆਨੰਦਪੁਰ ਸਾਹਿਬ ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਉਮੀਦਵਾਰ ਪ੍ਰੋ. ਪ੍ਰੇਮ ਸਿੰਘ ਚੰਦੂਮਾਜਰਾ ਦੇ ਗੋਦ ਲਏ ਪਿੰਡ ਅਤੇ ਹਲਕੇ ਦੇ ਲੋਕਾਂ ਦਾ ਕੀ ਕਹਿਣਾ ਹੈ, ਚੰਦੂਮਾਜਰਾ ਬਾਰੇ ਤੁਸੀਂ ਵੀ ਜਾਣ ਲਓ। ‘ਸਪੋਕਸਮੈਨ ਟੀਵੀ’ ਤੇ ਹਲਕੇ ਦੇ ਲੋਕਾਂ ਨਾਲ ਇਕ ਖ਼ਾਸ ਮੁਲਾਕਾਤ ਦੌਰਾਨ ਅਪਣੇ ਹਲਕੇ ਦੇ ਵੱਡੇ ਮੁੱਦਿਆਂ ਅਤੇ ਸਿਆਸਤ ਬਾਰੇ ਕੁਝ ਅਹਿਮ ਤੱਥ ‘ਸਪੋਕਸਮੈਨ ਟੀਵੀ’ ਜ਼ਰੀਏ ਲੋਕਾਂ ਨੇ ਅਪਣੇ ਹਲਕੇ ਦਾ ਵਿਕਾਸ ਜਾਂ ਕੰਮ ਨਾਲ ਹੋਣ ‘ਤੇ ਜਮ ਕੇ ਭੜਾਸ ਕੱਢੀ ਹੈ। ਇਸ ਦੌਰਾਨ ਹਲਕੇ ਦੇ ਲੋਕਾਂ ਵੱਲੋਂ ਦੱਸੇ ਗਏ ਅਹਿਮ ਸਵਾਲਾਂ ਦੇ ਜਵਾਬ ਇਸ ਤਰ੍ਹਾਂ ਹਨ।

ਨੌਜਵਾਨ ਨੇ ਗੱਲਬਾਤ ਦੌਰਾਨ ਕਿਹਾ ਕਿ ਚੰਦੂਮਾਜਰਾ ਸਾਬ੍ਹ ਨੇ ਪਿਛਲੇ ਪੰਜ ਸਾਲਾਂ ਵਿਚ ਕੁਝ ਨਹੀਂ ਕੀਤਾ ਤੇ ਝੂਠੇ ਵਾਅਦੇ ਹੀ ਕੀਤੇ ਹਨ। ਐਮ.ਪੀ ਬਣਨ ਤੋਂ ਬਾਅਦ ਸਾਨੂੰ ਮੁੜ ਕੇ ਉਨ੍ਹਾਂ ਨੇ ਮੂੰਹ ਵੀ ਨਹੀਂ ਦਿਖਾਇਆ। ਸਾਨੂੰ ਉਨ੍ਹਾਂ ਨੇ ਵੋਟਾਂ ਤੋਂ ਪਹਿਲਾਂ ਕਿਹਾ ਸੀ ਕਿ ਤੁਹਾਡੇ ਪਿੰਡ ਦੀਆਂ ਸੜਕਾਂ ਗਲੀਆਂ-ਨਾਲੀਆਂ ਬਣਾਵਾਂਗੇ। ਸੜਕਾਂ ਤੇ ਗਲੀਆਂ ਉਸੇ ਤਰ੍ਹਾਂ ਟੁੱਟੀਆਂ ਪਈਆਂ ਹਨ ਪਰ ਅੱਜ ਤੱਕ ਉਨ੍ਹਾਂ ਨੇ ਇੱਥੇ ਇਕ ਵਾਰ ਵੀ ਪੈਰ ਨਹੀਂ ਪਾਇਆ। ਨੌਜਵਾਨਾਂ ਲਈ ਜਿੰਮ ਬਣਾਉਣ ਨੂੰ ਕਿਹਾ ਸੀ, ਇਕ ਵੀ ਪੈਸਾ ਜਿੰਮ ਵਾਸਤੇ ਨਹੀਂ ਦਿੱਤਾ।

ਗੱਲਬਾਤ ਦੌਰਾਨ ਇਕ ਹੋਰ ਨੌਜਵਾਨ ਨੇ ਦੱਸਿਆ ਕਿ ਸਾਡੇ ਨੇੜੇ ਹੀ ਦਾਊਂ ਮਾਜਰਾ ਪਿੰਡ ਹੈ ਜੋ ਕਿ ਚੰਦੂਮਾਜਰਾ ਸਾਬ੍ਹ ਨੇ ਗੋਦ ਲਿਆ ਹੋਇਆ ਸੀ। ਉੱਥੇ 5 ਸਾਲਾਂ ਦੌਰਾਨ ਇਕ ਵੀ ਇੱਟ ਤੱਕ ਨਹੀਂ ਲੱਗੀ। ਅੱਜ ਤੁਸੀਂ ਵੀ ਉਸ ਪਿੰਡ ਦੀ ਹਾਲਤ ਦੇਖ ਸਕਦੇ ਹੋ ਕਿੰਨੀ ਕੁ ਨਾਜ਼ੁਕ ਬਣੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਇਕ ਗੋਦ ਲਏ ਹੋਏ ਪਿੰਡ ਦਾ ਵਿਕਾਸ ਨਹੀਂ ਕਰ ਸਕਦੇ ਫਿਰ ਇਸ ਤੋਂ ਬਾਅਦ ਦੱਸੋ ਕੀ ਉਮੀਦ ਲਗਾਈ ਜਾ ਸਕਦੀ ਹੈ। ਹਲਕੇ ਦੇ ਲੋਕ ਚੰਦੂਮਾਜਰਾ ਨੂੰ ਮੂੰਹ ਨੀ ਲਗਾ ਰਹੇ। ਗੱਲਬਾਤ ਦੌਰਾਨ ਇਕ ਬਜੁਰਗ ਨੇ ਕਿਹਾ ਕਿ ਹਲਕੇ ‘ਚ ਪਾਣੀ ਦੀ ਬਹੁਤ ਔਖ ਹੈ ਜੇ ਇਨ੍ਹਾਂ ਨੇ ਕਿਤੇ-ਕਿਤੇ ਪਾਣੀ ਵਾਲੇ ਟੈਂਕਰ ਵੀ ਦਿੱਤਾ ਹੈ।

ਉਸ ਨਾਲ ਪਿੰਡਾਂ ‘ਚ ਕੋਈ ਗੁਜ਼ਾਰਾ ਨਹੀਂ ਹੁੰਦਾ। ਕੋਈ ਇਨ੍ਹਾਂ ਨੇ ਪਾਣੀ ਦੀ ਟੈਂਕੀ ਨੀ ਬਣਵਾਈ। ਗੱਲਬਾਤ ਦੌਰਾਨ ਪਿੰਡ ਪਡਿਆਲਾ ਦੇ ਨੌਜਵਾਨ ਨੇ ਕਿਹਾ ਕਿ ਪਿਛਲੀਆਂ ਵੋਟਾਂ ਤੋਂ ਪਹਿਲਾਂ ਚੰਦੂਮਾਜਰਾ ਸਾਬ੍ਹ ਨੇ ਵਾਅਦਾ ਕੀਤਾ ਸੀ ਕਿ ਮੈਂ ਬਣਦੇ ਸਾਰ ਹੀ ਪਿੰਡ ਪਡਿਆਲਾ ‘ਚ ਸਟੇਡੀਅਮ ਬਣਾਵਾਂਗਾ ਪਰ ਹੁਣ ਤੱਕ ਇੱਥੇ ਕੁਝ ਨਹੀਂ ਬਣਿਆ। ਕੋਈ ਸਾਡੇ ਪਿੰਡ ਨੂੰ ਗਰਾਂਟ ਨੀ ਦਿੱਤੀ, ਅਸੀਂ ਇਨ੍ਹਾਂ ਦੇ ਦਫ਼ਤਰ ਜਾ ਕੇ ਮਿਣਤਾਂ-ਤਰਲੇ ਵੀ ਕੀਤੇ ਪਰ ਅੱਜ ਤੱਕ ਕੁਝ ਵੀ ਸਾਡੇ ਪਿੰਡ ਨੂੰ ਨਹੀਂ ਦਿੱਤਾ। ਜੇ ਸਾਡੇ ਪਿੰਡ ਨੂੰ ਇਕ ਵੀ ਰੁਪਿਆ ਦਿੱਤੇ ਹੋਵੇ ਤਾਂ ਸਾਡੇ ਨਾਲ ਬਹਿਸ ਕਰ ਸਕਦੇ ਆ ਕੇ, ਪਿੰਡ ਦੀ ਹਾਲਤ ਬਹੁਤ ਨਾਜ਼ੁਕ ਹੈ।

ਪਿਛਲੀ ਵਾਰ ਚੰਦੂਮਾਜਰਾ ਨੂੰ ਕੁਰਾਲੀ ਦੇ ਸਾਰੇ ਵਾਰਡਾਂ ‘ਚ ਹਾਰ ਦਾ ਮੂੰਹ ਦੇਖਣਾ ਪਿਆ ਸੀ। ਇਕ ਹੋਰ ਬਜੁਰਗ ਨਾਲ ਗੱਲਬਾਤ ਦੌਰਾਨ ਉਨ੍ਹਾਂ ਦੱਸਿਆ ਕਿ ਪਿਛਲੇ ਪੰਜ ਸਾਲਾਂ ਦੌਰਾਨ ਬਿਨ੍ਹਾਂ ਫ਼ਿਰਕਾਪ੍ਰਸਤੀ ਫੈਲਾਏ, ਬਿਨ੍ਹਾ ਲੋਕਾਂ ਦੇ ਵਿਚ ਵਿਚਰੇ ਤੇ ਜਿਹੜਾ ਬਣਦਾ ਫੰਡ ਸੀ ਉਹ ਵੀ ਆਪਣੇ ਹਲਕਾ ਖੇਤਰ ਲਈ ਨਾ ਵਿਚਾਰਦੇ ਹੋਏ, ਅਪਣੇ ਬੇਟੇ ਨੂੰ ਜਿਤਾਉਣ ਵਾਸਤੇ ਜ਼ਿਆਦਾ ਤੋਂ ਜ਼ਿਆਦਾ ਫੰਡ ਸਨੌਰ ਹਲਕੇ ਵਿਚ ਲਗਾ ਕੇ ਲੋਕਾਂ ਨਾਲ ਬਹੁਤ ਵੱਡਾ ਧੋਖਾਂ ਕੀਤਾ ਹੈ।

ਹਲਕੇ ਦੇ ਲੋਕਾਂ ਨਾਲ ਗੱਲਬਾਤ ਤੋਂ ਬਾਅਦ ਹੁਣ ਦੇਖਣਾ ਇਹ ਹੋਵੇਗਾ ਕਿ 19 ਮਈ ਨੂੰ ਸ਼੍ਰੀ ਆਨੰਦਪੁਰ ਸਾਹਿਬ ਹਲਕੇ ਦੇ ਲੋਕ ਕਿਸ ਪਾਰਟੀ ਦੇ ਹੱਕ ਵਿਚ ਭੁਗਤਦੇ ਹਨ ਤੇ 23 ਮਈ ਨੂੰ ਜਿਹੜੇ ਨਤੀਜੇ ਆਉਣੇ ਹਨ ਕਿਸ ਦੇ ਹੱਕ ਵਿਚ ਹੁੰਦੇ ਹਨ।