ਤਰਨਤਾਰਨ- ਖਡੂਰ ਸਾਹਿਬ ਚ ਬੀਬੀ ਜਗੀਰ ਕੌਰ ਦੇ ਹੱਕ ਚ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਵੱਲੋਂ ਪ੍ਰਚਾਰ ਕੀਤਾ ਗਿਆ। ਜਾਣਕਾਰੀ ਅਨੁਸਾਰ ਇਸ ਰੈਲੀ ਵਿਚ ਦਿਲ ਖੋਲ੍ਹ ਕੇ ਪੱਖੇ ਤੇ ਲਾਊਡ ਸਪੀਕਰ ਚੱਲਦੇ ਸਨ ਜਿਸ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਰੈਲੀ 'ਚ ਕੁੰਡੀ ਕੁਨੈਕਸ਼ਨ ਸੀ। ਜੀ ਹਾਂ, ਕਾਂਗਰਸ ਤੋਂ ਬਾਅਦ ਹੁਣ ਅਕਾਲੀ ਦਲ ਨੇ ਵੀ ਚੋਰੀ ਦੀ ਬਿਜਲੀ ਤੇ ਰੈਲੀਆਂ ਦਾ ਸਿਲਸਿਲਾ ਸ਼ੁਰੂ ਕਰ ਦਿੱਤਾ ਹੈ।

ਪਾਰਟੀ ਦੇ ਆਗੂਆਂ ਦਾ ਕਹਿਣਾ ਹੈ ਕਿ ਰੈਲੀ ਵਿਚ ਬਿਜਲੀ ਨਿਰੋਲ ਜਨਰੈਟਰ ਤੇ ਚਲਾਈ ਗਈ ਹੈ। ਦੂਜੇ ਪਾਸੇ ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਪਿਛਲੇ 6 ਦਿਨਾਂ ਤੋਂ ਇਸੇ ਤਰਾਂ ਕੁੰਡੀਆਂ ਤੇ ਬਿਜਲੀ ਚਲਾਈ ਜਾ ਰਹੀ ਹੈ ਪਰ ਕਿਸੇ ਨੇ ਕੋਈ ਕਾਰਵਾਈ ਨਹੀਂ ਕੀਤੀ। ਸਿਰਫ਼ ਚੋਰੀ ਦੀ ਬੱਤੀ ਹੀ ਨਹੀਂ, ਜਗੀਰ ਕੌਰ ਦੀ ਰੈਲੀ ਵਿਚ ਅਜਿਹਾ ਕੁੱਝ ਖ਼ਾਸ ਦੇਖਣ ਨੂੰ ਮਿਲਿਆ ਜੋ ਅੱਜ ਤੱਕ ਕਿਸੇ ਹੋਰ ਪਾਰਟੀ ਦੀ ਰੈਲੀ ਵਿਚ ਦੇਖਣ ਨੂੰ ਨਹੀਂ ਮਿਲਿਆ।

ਰੈਲੀ ਵਿਚ ਜਦੋਂ ਬਾਦਲ ਅਤੇ ਹੋਰ ਸੀਨੀਅਰ ਆਗੂ ਲੀਡਰਸ਼ਿਪ ਸਟੇਜ ਤੇ ਬੈਠੀ ਸੀ ਤਾਂ ਅਚਾਨਕ ਪਾਰਟੀ ਦਾ ਫਲੈਕਸ ਡਿੱਗ ਗਿਆ, ਜਿਸਨੂੰ ਕੁੱਝ ਵਰਕਰਾਂ ਨੇ ਸਹਾਰਾਂ ਦੇ ਕੇ ਲੀਡਰਾਂ ਤੇ ਡਿੱਗਣ ਤੋਂ ਬਚਾ ਲਿਆ। ਇਸ ਰੈਲੀ ਵਿਚ ਜ਼ਿਆਦਾਤਰ ਕੁਰਸੀਆਂ ਖਾਲੀ ਹੀ ਦਿਖਾਈ ਦਿੱਤੀਆਂ ਜਦਕਿ ਪ੍ਰਕਾਸ਼ ਸਿੰਘ ਬਾਦਲ ਨੇ ਇਸ ਰੈਲੀ ਨੂੰ ਰੈਲਾ ਕਹਿ ਕੇ ਸੰਬੋਧਨ ਕੀਤਾ।