ਲੁਧਿਆਣਾ ਪੁਲਿਸ ਨੂੰ ਮਿਲੀ ਵੱਡੀ ਸਫ਼ਲਤਾ, ਭਾਰੀ ਮਾਤਰਾ ’ਚ ਨਕਲੀ ਸੈਨੀਟਾਈਜ਼ਰ ਬਰਾਮਦ, 1 ਗ੍ਰਿਫ਼ਤਾਰ
ਫੈਕਟਰੀ ਮਾਲਕ ਦਾ ਦਾਅਵਾ- ਸਭ ਕੁਝ ਅਸਲੀ ਹੈ ਤੇ ਸਾਡੇ ਕੋਲ ਲਾਈਸੈਂਸ ਵੀ ਹੈ
ਲੁਧਿਆਣਾ (ਰਾਜਵਿੰਦਰ ਸਿੰਘ): ਲੁਧਿਆਣਾ ਪੁਲਿਸ ਨੂੰ ਉਸ ਸਮੇਂ ਵੱਡੀ ਸਫਲਤਾ ਹਾਸਲ ਹੋਈ ਜਦੋਂ ਤਿੰਨ ਨੰਬਰ ਡਵੀਜ਼ਨ ਹਲਕੇ ਵਿਚ ਸੈਨੀਟਾਈਜ਼ਰ ਬਣਾਉਣ ਵਾਲੀ ਫੈਕਟਰੀ ਵਿਚ ਰੇਡ ਕੀਤੀ ਗਈ। ਇੱਥੋਂ ਪੁਲਿਸ ਨੇ ਭਾਰੀ ਮਾਤਰਾ ਵਿਚ ਸੈਨੇਟਾਈਜ਼ਰ ਦੇ ਭਰੇ ਡਰੰਮ, ਭਰੀਆਂ ਹੋਈਆਂ ਕੈਨੀਆਂ ਅਤੇ ਖਾਲੀ ਕੈਨੀਆਂ ਵੀ ਬਰਾਮਦ ਕੀਤੀਆਂ।
ਏਐਸਆਈ ਦਲਜੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਇਲਾਕੇ ਦੀ ਇਸ ਫੈਕਟਰੀ ਵਿਚ ਰੇਡ ਮਾਰੀ ਗਈ ਸੀ। ਪੁਲਿਸ ਨੇ ਕਿਹਾ ਕਿ ਇਹ ਸੈਨੇਟਾਈਜ਼ਰ ਨਕਲੀ ਹੈ। ਪੁਲਿਸ ਨੇ ਫੈਕਟਰੀ ਦੇ ਮਾਲਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਵੱਡੀ ਮਾਤਰਾ ਵਿਚ ਖੇਪ ਫੜਨ ਦਾ ਦਾਅਵਾ ਕੀਤਾ ਹੈ।
ਉਧਰ ਫੈਕਟਰੀ ਮਾਲਕ ਦਾ ਕਹਿਣਾ ਹੈ ਕਿ ਉਹਨਾਂ ਕੋਲ ਲਾਇਸੈਂਸ ਅਤੇ ਮਾਨਤਾ ਪ੍ਰਾਪਤ ਸਰਟੀਫਿਕੇਟ ਵੀ ਹੈ। ਇਸ ਲਈ ਕੁਝ ਵੀ ਨਕਲੀ ਨਹੀਂ ਹੈ। ਦੱਸ ਦਈਏ ਕਿ ਇਕ ਪਾਸੇ ਜਿੱਥੇ ਦੇਸ਼ ਭਰ ਵਿਚ ਮਹਾਂਮਾਰੀ ਫੈਲੀ ਹੋਈ ਹੈ ਉਥੇ ਹੀ ਕੁਝ ਲੋਕ ਅਪਣੇ ਫਾਇਦੇ ਲਈ ਨਕਲੀ ਸਮਾਨ ਬਣਾ ਕੇ ਵੇਚ ਰਹੇ ਹਨ ਅਤੇ ਲੋਕਾਂ ਦੀ ਜਾਨ ਨਾਲ ਖਿਲਵਾੜ ਕਰ ਰਹੇ ਹਨ।