Lakha sidhana's brother case

ਚੰਡੀਗੜ੍ਹ (ਗੁਰਉਪਦੇਸ਼ ਭੁੱਲਰ) : ਲੱਖਾ ਸਿਧਾਣਾ ਦੇ ਭਰਾ ਮੁੰਡੀ ਸਿਧਾਣਾ ਨੂੰ ਪਿਛਲੇ ਦਿਨੀਂ ਪਟਿਆਲਾ ਤੋਂ ਚੁੱਕ ਕੇ ਦਿੱਲੀ ਪੁਲਿਸ ਵਲੋਂ ਕੀਤੇ ਤਸ਼ੱਦਦ ਦਾ ਮਾਮਲਾ ਸਾਹਮਣੇ ਆਉਣ ਬਾਅਦ ਇਸ ਵਿਰੁਧ ਪੰਜਾਬ ਭਰ ਵਿਚ ਚਹੁੰ ਤਰਫ਼ੋਂ ਵੱਖ ਵੱਖ ਪਾਰਟੀਆਂ ਤੇ ਸੰਗਠਨਾਂ ਨੇ ਸਖ਼ਤ ਰੋਸ ਦਾ ਪ੍ਰਗਟਾਵਾ ਕੀਤਾ ਸੀ। ਇਸ ਨੂੰ ਦਿੱਲੀ ਪੁਲਿਸ ਦੀ ਪੰਜਾਬ ਵਿਚ ਵੜ ਕੇ ਕੀਤੀ ਗ਼ੈਰ ਕਾਨੂੰਨੀ ਕਾਰਵਾਈ ਦਸਦਿਆਂ ਐਫ਼.ਆਈ.ਆਰ. ਦਰਜ ਕਰਨ ਦੀ ਮੰਗ ਉਠ ਰਹੀ ਹੈ। ਕਿਸਾਨ ਮੋਰਚੇ ਦੇ ਆਗੂ ਵੀ ਮਾਮਲੇ ਵਿਚ ਇਕ ਦੋ ਦਿਨ ਵਿਚ ਕਾਰਵਾਈ ਨਾ ਹੋਣ ’ਤੇ ਕੋਈ ਫ਼ੈਸਲਾ ਲੈ ਸਕਦੇ ਹਨ। 

ਇਸ ਰੋਸ ਨੂੰ ਦੇਖਦਿਆਂ ਪੰਜਾਬ ਸਰਕਾਰ ਨੇ ਵੀ ਮੁੰਡੀ ਸਿਧਾਣਾ ’ਤੇ ਹੋਈ ਦਿੱਲੀ ਪੁਲਿਸ ਦੀ ਇਸ ਕਾਰਵਾਈ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਇਸ ਸਬੰਧ ਵਿਚ ਸਰਕਾਰ ਵਲੋਂ ਮਿਲੀਆਂ ਹਦਾਇਤਾ ਬਾਅਦ ਬਠਿੰਡਾ ਜ਼ੋਨ ਦੇ ਆਈ.ਜੀ. ਪੱਧਰ ਦੇ ਅਧਿਕਾਰੀ ਵਲੋਂ ਸਾਰੇ ਮਾਮਲੇ ਬਾਰੇ ਤੱਥ ਇਕੱਠੇ ਕੀਤੇ ਜਾ ਰਹੇ ਹਨ।

ਇਸ ਲਈ ਜੇਕਰ ਪੰਜਾਬ ਪੁਲਿਸ ਜਾਂਚ ਬਾਅਦ ਇਸ ਮਾਮਲੇ ਵਿਚ ਕੋਈ ਐਫ਼.ਆਈ.ਆਰ. ਦਰਜ ਕਰਦੀ ਹੈ ਤਾਂ ਦਿੱਲੀ ਪੁਲਿਸ ਦੀ ਪੰਜਾਬ ਵਿਚ ਆਈ ਟੀਮ ਲਈ ਮੁਸ਼ਕਲ ਖੜੀ ਹੋ ਸਕਦੀ ਹੈ। ਇਸ ਸਮੇਂ ਮੁੰਡੀ ਸਿਧਾਣਾ ਬਠਿੰਡਾ ਦੇ ਹਸਪਤਾਲ ਵਿਚ ਇਲਾਜ ਅਧੀਨ ਹੈ ਤੇ ਪੁਲਿਸ ਕੁੱਟਮਾਰ ਨਾਲ ਲੱਗੀਆਂ ਸੱਟਾਂ ਆਦਿ ਦਾ ਮੈਡੀਕਲ ਵੀ ਹੋ ਚੁੱਕਾ ਹੈ ਜੋ ਦਿੱਲੀ ਪੁਲਿਸ ਵਿਰੁਧ ਤਸ਼ੱਦਦ ਦਾ ਅਹਿਮ ਸਬੂਤ ਬਣਦਾ ਹੈ। 

ਦਿੱਲੀ ਪੁਲਿਸ ਕੁੱਟਮਾਰ ਦੀ ਗੱਲ ਤੋਂ ਸਾਫ਼ ਮੁਕਰੀ

ਇਸੇ ਦੌਰਾਨ ਪੰਜਾਬ ਵਿਚ ਰੋਸ ਦੀਆਂ ਖ਼ਬਰਾਂ ਬਾਅਦ ਦਿੱਲੀ ਦੇ ਸਪੈਸ਼ਲ ਸੈੱਲ ਨੇ ਜਿਥੇ ਇਹ ਗੱਲ ਤਾਂ ਮੰਨ ਲਈ ਹੈ ਕਿ ਉਸ ਨੇ ਮੁੰਡੀ ਸਿਧਾਣਾ ਨੂੰ ਪੁੱਛਗਿੱਛ ਲਈ ਹਿਰਾਸਤ ਵਿਚ ਲਿਆ ਸੀ ਪਰ ਉਹ ਕੁੱਟਮਾਰ ਦੀ ਦੋਸ਼ਾਂ ਤੋਂ ਸਾਫ਼ ਮੁਕਰ ਗਏ ਹਨ। ਇਕ ਟਵੀਟ ਰਾਹੀਂ ਦਿੱਲੀ ਪੁਲਿਸ ਨੇ ਸਫ਼ਾਈ ਦਿੰਦਿਆਂ ਕਿਹਾ ਕਿ ਲੱਖਾ ਸਿਧਾਣਾ ਦੇ ਮਾਮਲੇ ਵਿਚ ਸਿਰਫ਼ ਪੁਛ ਪੜਤਾਲ ਲਈ ਮੁੰਡੀ ਸਿਧਾਣਾ ਨੂੰ ਫੜਿਆ ਗਿਆ ਸੀ ਪਰ ਭਵਿੱਖ ਵਿਚ ਵੀ ਬੁਲਾਉਣ ’ਤੇ ਹਾਜ਼ਰ ਹੋਣ ਦੀ ਸ਼ਰਤ ਤੇ ਸਿਰਫ਼ ਪੁਛ ਪੜਤਾਲ ਬਾਅਦ ਛੱਡ ਦਿਤਾ ਗਿਆ। ਦਿੱਲੀ ਪੁਲਿਸ ਨੇ ਕਿਹਾ ਕਿ ਕਿਸੇ ਤਰ੍ਹਾਂ ਦੀ ਕੁੱਟਮਾਰ ਨਹੀਂ ਕੀਤੀ ਗਈ ਅਤੇ ਕਾਨੂੰਨ ਮੁਤਾਬਕ ਹੀ ਕਾਰਵਾਈ ਕੀਤੀ ਹੈ।