Bambiha Bambiha Bole Boliyan Punjabi Word Bambiha

ਚੰਡੀਗੜ੍ਹ: ਬੰਬੀਹਾ ਜਿਸ ਨੂੰ ਕਿ ਬਬੀਹਾ, ਪਪੀਹਾ ਵੀ ਕਿਹਾ ਜਾਂਦਾ ਹੈ ਤੇ ਇਹ ਇਕ ਪ੍ਰਵਾਸੀ ਪੰਛੀ ਹੈ। ਪਰ ਇਕ ਸ਼ਬਦ ਹੈ ਬੰਬੀਹਾ ਬੋਲੇ ਜੋ ਕਿ ਪੰਜਾਬੀ ਲੋਕਧਾਰਾ ਦਾ ਅਹਿਮ ਸ਼ਬਦ ਹੈ। ਬੰਬੀਹੇ ਦੀ ਆਵਾਜ਼ ਕਾਫੀ ਸੁਰੀਲੀ ਹੁੰਦੀ ਹੈ ਤੇ ਇਸ ਦੀ ਖਾਸ ਗੱਲ ਇਹ ਹੈ ਕਿ ਇਸ ਦੀ ਚੁੰਝ ਦਾ ਆਕਾਰ ਵੱਖਰੀ ਕਿਸਮ ਦਾ ਹੁੰਦਾ ਹੈ, ਬਾਕੀ ਪੰਛੀਆਂ ਦੀ ਚੁੰਝ ਦੀ ਢਾਲ ਹੇਠਾਂ ਨੂੰ ਬਣੀ ਹੁੰਦੀ ਹੈ ਇਸ ਦੀ ਚੁੰਝ ਸਿੱਧੀ ਹੁੰਦੀ ਹੈ ਜਿਸ ਕਾਰਨ ਇਹ ਅਪਣੀ ਚੁੰਝ ਨਾਲ ਪਾਣੀ ਨਹੀਂ ਪੀ ਸਕਦਾ।

ਜਦੋਂ ਬਰਸਾਤ ਹੁੰਦੀ ਹੈ ਤਾਂ ਇਹ ਪੰਛੀ ਅਪਣੀ ਚੁੰਝ ਆਸਮਾਨ ਵੱਲ ਕਰ ਕੇ ਪਾਣੀ ਪੀਂਦਾ ਹੈ, ਤੇ ਇਹ ਅਪਣੀ ਚੁੰਝ ਨਾਲ ਪਾਣੀ ਨਹੀਂ ਪੀ ਸਕਦਾ ਸਗੋਂ ਅਪਣੇ ਸਿਰ ਰਾਹੀਂ ਪਾਣੀ ਪੀਂਦਾ ਹੈ। ਧਾਰਮਿਕ ਪ੍ਰਸੰਗ ਅਤੇ ਭਜਨਾਂ ਵਿਚ ਬੰਬੀਹਾ ਸ਼ਬਦ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਹ ਇਕ ਵੱਖਰੀ ਕਿਸਮ ਦਾ ਪੰਛੀ ਹੈ ਜੋ ਕਿ ਬਰਸਾਤੀ ਦਿਨਾਂ ਵਿਚ ਬਾਹਰ ਨਿਕਲਦਾ ਹੈ।

ਜਿਹਨਾਂ ਔਰਤਾਂ ਦੇ ਪਤੀ ਪ੍ਰਦੇਸੀ ਹੁੰਦੇ ਹਨ ਉਹ ਵੀ ਇਸ ਸੁਹਾਵਣੀ ਰੁੱਤ ਵਿਚ ਉਹਨਾਂ ਨੂੰ ਯਾਦ ਕਰਦੀਆਂ ਹਨ। ਇਸ ਸਮੇਂ ਉਹ ਬੰਬੀਹੇ ਦਾ ਜ਼ਿਕਰ ਕਰਦੀਆਂ ਹੋਈਆਂ ਕਹਿੰਦੀਆਂ ਹਨ ਕਿ ਉਹਨਾਂ ਦਾ ਦਿਲ ਅਪਣੇ ਪ੍ਰੀਤਮ ਨੂੰ ਮਿਲਣ ਲਈ ਲੋਚ ਰਿਹਾ ਹੈ। ਬੰਬੀਹਾ ਬੋਲਣਾ ਪੰਜਾਬੀ ਲੋਕਧਾਰਾ ਵਿਚ ਇਕ ਰਸਮ ਹੈ ਤੇ ਇਹ ਨਾਨਕਿਆਂ ਵੱਲੋਂ ਬਲਾਇਆ ਜਾਂਦਾ ਹੈ। ਨਾਨਕਿਆਂ ਵੱਲੋਂ ਬੰਬੀਹਾ ਉਦੋਂ ਬਲਾਇਆ ਜਾਂਦਾ ਹੈ ਜਦੋਂ ਉਹਨਾਂ ਦੇ ਕਿਸੇ ਪੁੱਤ ਜਾਂ ਧੀ ਦਾ ਵਿਆਹ ਰੱਖਿਆ ਜਾਂਦਾ ਹੈ।

ਫਿਰ ਜਦੋਂ ਉਹਨਾਂ ਦੀ ਧੀ ਦੇ ਕਿਸੇ ਪੁੱਤ ਜਾਂ ਧੀ ਦਾ ਵਿਆਹ ਹੁੰਦਾ ਸੀ ਤਾਂ ਉਹ ਅਪਣੇ ਪੇਕਿਆਂ ਨੂੰ ਸੱਦਾ ਦੇਣ ਜਾਂਦੀ ਸੀ। ਉਸ ਤੋਂ ਬਾਅਦ ਪੇਕਿਆਂ ਵੱਲੋਂ ਅਪਣੇ ਦੋਹਤੇ ਜਾਂ ਦੋਹਤੀ ਦੇ ਵਿਆਹ ਤੇ ਨਾਨਕੀ ਸ਼ੱਕ ਲਿਆਇਆ ਜਾਂਦਾ ਸੀ। ਉਹ ਛੱਜ ਨੂੰ ਪੂਰੀ ਤਰ੍ਹਾਂ ਸ਼ਿੰਗਾਰ ਕੇ ਤੇ ਇਕ ਡੰਡਾ ਲੈ ਕੇ ਜਾਂਦੇ ਸਨ ਤੇ ਹੋਰ ਕਈ ਚੀਜ਼ਾਂ ਨੂੰ ਸ਼ਿੰਗਾਰ ਕੇ ਇਸ ਦਾ ਹਿੱਸਾ ਬਣਾਇਆ ਜਾਂਦਾ ਸੀ ਤੇ ਜਦੋਂ ਇਹ ਨਾਨਕੀ ਸ਼ੱਕ ਦਾਦਕਿਆਂ ਦੇ ਪਿੰਡ ਦੇ ਬਾਰ ਵਿਚ ਆਉਂਦਾ ਸੀ ਤਾਂ ਉਹਨਾਂ ਵੱਲੋਂ ਬੰਬੀਹਾ ਬਲਾਇਆ ਜਾਂਦਾ ਸੀ।

ਬੰਬੀਹਾ ਬੋਲੇ ਦਾ ਜ਼ਿਕਰ ਬੋਲੀਆਂ ਵਿਚ ਕੀਤਾ ਜਾਂਦਾ ਹੈ, ਉਹਨਾਂ ਵੱਲੋਂ ਦਰਸਾਇਆ ਜਾਂਦਾ ਸੀ ਕਿ ਨਾਨਕੀ ਸ਼ੱਕ ਵੱਲੋਂ ਵਿਆਹ ਦੀਆਂ ਰਸਮਾਂ ਸ਼ੁਰੂ ਹੋ ਚੁੱਕੀਆਂ ਹਨ। ਇਸ ਸਮੇਂ ਸਭ ਤੋਂ ਪ੍ਰਧਾਨਗੀ ਵੀ ਨਾਨਕਿਆਂ ਦੀ ਹੁੰਦੀ ਸੀ ਤੇ ਮੇਲ ਵੀ। ਹਾਲ ਹੀ ਵਿਚ ਇਕ ਗੀਤ ਪੰਜਾਬੀ ਗਾਇਕ ਅੰਮ੍ਰਿਤ ਮਾਨ ਤੇ ਸਿੱਧੂ ਮੂਸੇਵਾਲਾ ਵੱਲੋਂ ਗਾਇਆ ਗਿਆ ਹੈ ਜਿਸ ਵਿਚ ਉਹ ਬੰਬੀਹਾ ਬੋਲੇ ਦਾ ਜ਼ਿਕਰ ਕਰਦੇ ਹਨ।

ਇਸ ਗੀਤ ਵਿਚ ਹਥਿਆਰਾਂ ਤੇ ਮਾਰਨ ਦੀ ਗੱਲ ਆਖੀ ਗਈ ਹੈ, ਉਹ ਪੰਜਾਬੀਅਤ ਨਾਲ ਕਿਤੇ ਵੀ ਸਬੰਧ ਨਹੀਂ ਰੱਖਦਾ। ਇਹੀ ਕਿਹਾ ਜਾ ਸਕਦਾ ਹੈ ਕਿ ਇਹ ਨਾਨਕਿਆਂ ਵੱਲੋਂ ਬਲਾਇਆ ਜਾਂਦਾ ਸੀ ਤੇ ਨਾਨਕਿਆਂ ਦੀ ਠੁੱਕ ਦਾ ਪ੍ਰਤੀਕ ਸੀ।