Sonu sood became pride of punjab and will give 13 children of philippines new life

ਮੋਗਾ: ਕੋਰੋਨਾ ਦੇ ਦੌਰ ’ਚ ਰੀਲ ਲਾਈਫ ਤੋਂ ਨਿਕਲ ਕੇ ਰੀਅਲ ਲਾਈਫ ਵਿਚ ਲੋਕਾਂ ਦੇ ਹੀਰੋ ਬਣੇ ਸੋਨੂੰ ਸੂਦ ਪੰਜਾਬ ਦੀ ਸ਼ਾਨ ਬਣ ਗਏ ਹਨ। ਹੁਣ ਉਹ ਤਕ ਦੇਸ਼ ਹੀ ਨਹੀਂ ਬਲਕਿ ਵਿਦੇਸ਼ਾਂ ਵਿਚ ਫਸੇ ਹਜ਼ਾਰਾਂ ਲੋਕਾਂ ਦੀ ਮਦਦ ਕਰ ਚੁੱਕੇ ਹਨ। ਉਹਨਾਂ ਨੇ ਹੁਣ ਇਕ ਅਜਿਹਾ ਕੰਮ ਕੀਤਾ ਹੈ ਜਿਸ ਨਾਲ ਫਿਲੀਪੀਂਸ ਦੇ ਮਨੀਲਾ ਸ਼ਹਿਰ ਦੇ ਰਹਿਣ ਵਾਲੇ 13 ਬੱਚਿਆਂ ਨੂੰ ਨਵੀਂ ਜ਼ਿੰਦਗੀ ਮਿਲਣ ਦੀ ਆਸ ਬੱਝ ਗਈ ਹੈ।

ਉਹ ਇਹਨਾਂ ਬੱਚਿਆਂ ਦੇ ਲੀਵਰ ਟ੍ਰਾਂਸਪਲਾਂਟ ਕਰਵਾਉਣਗੇ। ਲੀਵਰ ਡੈਮੇਜ ਦੀ ਸਮੱਸਿਆ ਨਾਲ ਜੂਝ ਰਹੇ ਇਕ ਤੋਂ ਸਾਢੇ ਤਿੰਨ ਸਾਲ ਦੇ 13 ਮਾਸੂਮਾਂ ਨੂੰ ਲੀਵਰ ਟ੍ਰਾਂਸਪਲਾਂਟ ਲਈ ਮਨੀਲਾ ਤੋਂ ਭਾਰਤ ਲਿਆਇਆ ਗਿਆ ਹੈ। ਸੋਨੂੰ ਦੇ ਯਤਨਾਂ ਨਾਲ ਵਿਸ਼ੇਸ਼ ਜਹਾਜ਼ ਰਾਹੀਂ ਇਹ ਬੱਚੇ ਦੋ ਦਿਨ ਪਹਿਲਾਂ ਭਾਰਤ ਪਹੁੰਚੇ ਹਨ। ਅਗਲੇ ਦੋ-ਤਿੰਨ ਦਿਨ ਵਿਚ ਉਹਨਾਂ ਦਾ ਦਿੱਲੀ ਦੇ ਅਪੋਲੋ ਅਤੇ ਮੈਕਸ ਹਸਪਤਾਲ ਵਿਚ ਲੀਵਰ ਟ੍ਰਾਂਸਪਲਾਂਟ ਹੋਵੇਗਾ।

ਸੋਨੂੰ ਸੂਦ ਨੇ ਕਿਹਾ ਕਿ ਕੋਰੋਨਾ ਕਾਲ ਵਿਚ ਲੋਕਾਂ ਨੂੰ ਉਹਨਾਂ ਦੇ ਘਰ ਪਹੁੰਚਾਉਣ ਲਈ ਜਦੋਂ ਉਹਨਾਂ ਨੇ ਕੋਸ਼ਿਸ਼ ਕੀਤੀ ਹੈ ਤਾਂ ਵਿਦੇਸ਼ ਵਿਚ ਫਸੇ ਭਾਰਤੀ ਵਿਦਿਆਰਥੀ ਵੀ ਉਹਨਾਂ ਨੂੰ ਉੱਥੋਂ ਨਿਕਲਣ ਲਈ ਫੋਨ ਕਰ ਰਹੇ ਸਨ। ਕਿਗ੍ਰਿਸਤਾਨ ਵਿਚ ਫਸੇ ਮੈਡੀਕਲ ਦੀ ਪੜ੍ਹਾਈ ਕਰ ਰਹੇ ਵਿਦਿਆਰਥੀਆਂ ਸਮੇਤ ਉਜਬੇਕਿਸਤਾਨ, ਰੂਸ, ਕਜਾਕਿਸਤਾਨ, ਜਾਰਜੀਆ ਤੋਂ ਵੀ ਕਈ ਲੋਕਾਂ ਨੂੰ ਭਾਰਤ ਲਿਆਉਣ ਦਾ ਪ੍ਰਬੰਧ ਕੀਤਾ ਗਿਆ ਹੈ।

ਇਸ ਤੋਂ ਬਾਅਦ ਜਦੋਂ ਫਿਲੀਪੀਂਸ ਤੋਂ ਭਾਰਤੀ ਵਿਦਿਆਰਥੀਆਂ ਦੀ ਵਤਨ ਵਾਪਸੀ ਕਰਵਾਈ ਜਾ ਰਹੀ ਸੀ ਤਾਂ ਕੁੱਝ ਲੋਕਾਂ ਨੇ ਲੀਵਰ ਦੀ ਬਿਮਾਰੀ ਨਾਲ ਜੂਝ ਰਹੇ ਬੱਚਿਆਂ ਦੀ ਮਦਦ ਲਈ ਵੀ ਗੁਹਾਰ ਲਗਾਈ। ਉਹਨਾਂ ਨੂੰ ਦਸਿਆ ਗਿਆ ਕਿ ਮਨੀਲਾ ਵਿਚ 18 ਬੱਚੇ ਸਨ ਜਿਹਨਾਂ ਦਾ ਮਾਰਚ ਵਿਚ ਦਿੱਲੀ ਦੇ ਅਪੋਲੋ ਅਤੇ ਮੈਕਸ ਹਸਪਤਾਲ ਵਿਚ ਅਪਰੇਸ਼ਨ ਹੋਣਾ ਸੀ। ਪਰ ਲਾਕਡਾਊਨ ਕਾਰਨ ਉਹ ਨਹੀਂ ਹੋ ਸਕਿਆ।

ਉਹਨਾਂ ਵਿਚੋਂ ਪੰਜ ਬੱਚਿਆਂ ਦੀ ਮੌਤ ਹੋ ਚੁੱਕੀ ਹੈ। ਸੋਨੂੰ ਅਨੁਸਾਰ ਇਸ ਦੇ ਤੁਰੰਤ ਬਾਅਦ ਉਹਨਾਂ ਨੇ  ਭਾਰਤ ਅਤੇ ਫਿਲੀਪੀਂਸ ਸਰਕਾਰ ਤੋਂ ਆਗਿਆ ਲੈ ਕੇ ਬੱਚਿਆਂ ਲਈ ਵਿਸ਼ੇਸ਼ ਜਹਾਜ਼ ਦਾ ਪ੍ਰਬੰਧ ਕਰਵਾਇਆ। 13 ਬੱਚੇ, 13 ਡੋਨਰ ਅਤੇ 13 ਅਟੈਂਡੈਂਟ, ਕੁੱਲ 39 ਲੋਕ ਮਨੀਲਾ ਤੋਂ ਦੋ ਦਿਨ ਪਹਿਲਾਂ ਦਿੱਲੀ ਆ ਚੁੱਕੇ ਹਨ। ਬੱਚਿਆਂ ਦੇ ਪਰਿਵਾਰ ਬੇਹੱਦ ਖੁਸ਼ ਹਨ ਕਿਉਂ ਕਿ ਅਗਲੇ ਦੋ ਤੋਂ ਤਿੰਨ ਦਿਨਾਂ ਵਿਚ ਉਹਨਾਂ ਦੇ ਲੀਵਰ ਟ੍ਰਾਂਸਪਲਾਂਟ ਹੋਣਗੇ।

ਸੋਨੂੰ ਨੇ ਕਿਹਾ ਕਿ ਉਹ ਖੁਦ ਅਰਦਾਸ ਕਰ ਰਹੇ ਹਨ ਕਿ ਬੱਚਿਆਂ ਦੇ ਆਪ੍ਰੇਸ਼ਨ ਸਫਲ ਹੋਣ ਅਤੇ ਉਹ ਤੰਦਰੁਸਤ ਹੋ ਕੇ ਘਰ ਪਰਤ ਸਕਣ। ਜੇ ਉਨ੍ਹਾਂ ਨੂੰ ਪਹਿਲਾਂ ਬੱਚਿਆਂ ਦੇ ਭਾਰਤ ਆਉਣ ਬਾਰੇ ਜਾਣਕਾਰੀ ਮਿਲ ਗਈ ਹੁੰਦੀ, ਤਾਂ ਇਹ ਸੰਭਵ ਹੁੰਦਾ ਕਿ ਅੱਜ ਵੀ ਪੰਜ ਬੱਚੇ ਇਸ ਦੁਨੀਆਂ ਵਿਚ ਹੁੰਦੇ ਜੋ ਆਪਣੇ ਪਰਿਵਾਰ ਛੱਡ ਕੇ ਚਲੇ ਗਏ ਹਨ।

ਜਦੋਂ ਸੇਵਾ ਜਾਰੀ ਰੱਖਣ ਬਾਰੇ ਪੁੱਛਿਆ ਗਿਆ ਤਾਂ ਸੋਨੂੰ ਨੇ ਕਿਹਾ ਕਿ ਉਸ ਦੀ ਮਾਂ ਪ੍ਰੋ. ਸਰੋਜ ਸੂਦ ਅਤੇ ਪਿਤਾ ਸ਼ਕਤੀ ਸਾਗਰ ਸੂਦ ਤੋਂ ਪ੍ਰਾਪਤ ਸੰਸਕਾਰ ਉਨ੍ਹਾਂ ਨੂੰ ਬਲ ਪ੍ਰਦਾਨ ਕਰਦੇ ਹਨ। ਮਾਪਿਆਂ ਦੇ ਪ੍ਰੇਰਕ ਸ਼ਬਦ ਅਜੇ ਵੀ ਉਨ੍ਹਾਂ ਦੇ ਦਿਲਾਂ ਅਤੇ ਦਿਮਾਗ ਵਿਚ ਰਹਿੰਦੇ ਹਨ। ਇਸ ਲਈ ਉਹ ਇਹ ਸਭ ਕਰਨ ਦੇ ਯੋਗ ਹੈ ਅਤੇ ਕਰਦਾ ਰਹੇਗਾ। ਸੋਨੂੰ ਨੇ ਕਿਹਾ ਕਿ ਜਿਹੜਾ ਵੀ ਉਨ੍ਹਾਂ ਨੂੰ ਮਦਦ ਲਈ ਆਵਾਜ਼ ਦਿੰਦਾ ਹੈ, ਉਹ ਮਦਦ ਲਈ ਮੌਜੂਦ ਹੋਵੇਗਾ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook  ਤੇ  ਲਾਈਕ Twitter  ਤੇ follow ਕਰੋ।