ਸੜਕ ਹਾਦਸੇ 'ਚ ਦੋ ਮੌਤਾਂ, ਅੱਧਾ ਦਰਜਨ ਰਾਹਗੀਰ ਜ਼ਖ਼ਮੀ
ਇਕ ਘੰਟੇ ਤਕ ਫਸੀ ਰਹੀ ਸਰਹੱਦ-ਏ-ਭਾਰਤ ਪਾਕਿਸਤਾਨ ਬੱਸ
ਲੁਧਿਆਣਾ (ਅੰਮ੍ਰਿਤਪਾਲ ਸਿੰਘ ਸੋਨੂੰ, ਮਨੌਜ ਸ਼ਰਮਾ) : ਬੀਤੇ ਵੀਰਵਾਰ ਸਵੇਰੇ ਲੁਧਿਆਣਾ-ਸ਼ੇਰਪੁਰ ਚੌਕ ਨੇੜੇ ਇਕ ਦਰਦਨਾਕ ਹਾਦਸਾ ਵਾਪਰ ਗਿਆ ਜਿਸ ਵਿਚ ਦੋ ਲੋਕਾਂ ਦੀ ਮੌਤ ਅਤੇ ਅੱਧਾ ਦਰਜਨ ਦੇ ਕਰੀਬ ਲੋਕ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਏ। ਹਾਦਸਾ ਇਨਾਂ ਭਿਆਨਕ ਸੀ ਕਿ ਆਸ ਪਾਸ ਖੜ੍ਹੇ ਲੋਕਾਂ ਦਾ ਦਿਲ ਦਹਿਲ ਗਿਆ। ਪੁਲਿਸ ਨੇ ਜ਼ਖ਼ਮੀਆਂ ਨੂੰ ਇਲਾਜ ਲਈ ਤੁਰਤ ਨਜ਼ਦੀਕੀ ਹਸਪਤਾਲਾਂ ਵਿਚ ਪਹੁੰਚਾਇਆ। ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਚੌਕੀ ਸ਼ੇਰਪੁਰ ਇੰਚਾਰਜ ਕ੍ਰਿਸ਼ਨ ਲਾਲ ਨੇ ਦਸਿਆ ਕਿ ਸਾਹਨੇਵਾਲ ਪਾਸੋਂ ਇਕ ਕੰਟੇਨਰ ਤੇਜ਼ ਰਫ਼ਤਾਰ ਨਾਲ ਆ ਰਿਹਾ ਸੀ।
ਜਦੋਂ ਉਹ ਡਾਬਾ ਮੋੜ ਤੋਂ ਸ਼ੇਰਪੁਰ ਚੌਕ ਲਈ ਮੁੜਨ ਲੱਗਾ ਤਾਂ ਅਚਾਨਕ ਕੰਟੇਨਰ ਦਾ ਸੰਤੁਲਨ ਵਿਗੜ ਗਿਆ ਤਾਂ ਉਹ ਅੱਗੇ ਜਾ ਰਹੀ ਮਹਿੰਦਰਾ ਜੀਪ ਨਾਲ ਟਕਰਾ ਗਿਆ ਜਿਸ ਨਾਲ ਕੰਟਨੇਰ ਚੌਕ ਵਿਚ ਖੜੇ ਸਵਾਰੀਆਂ ਵਾਲੇ ਇਕ ਆਟੋ ਉਪਰ ਢਹਿ ਪਿਆ, ਜਿਸ ਕਾਰਨ ਆਟੋ ਚਾਲਕ ਗੰਭੀਰ ਜ਼ਖ਼ਮੀ ਹੋ ਗਿਆ। ਆਟੋ ਚਾਲਕ ਦੀ ਪਛਾਣ ਭੋਲਾ ਗੁਪਤਾ ਵਜੋਂ ਹੋਈ ਹੈ। ਇਸ ਦੇ ਨਾਲ ਹੀ ਇਕ ਸਾਈਕਲ ਸਵਾਰ ਦੀ ਕੰਟੇਨਰ ਹੇਠਾਂ ਆਉਣ ਨਾਲ ਮੌਤ ਹੋ ਗਈ ਜਿਸ ਦੀ ਪਛਾਣ ਨਹੀਂ ਹੋ ਸਕੀ।
ਜਦਕਿ ਇਕ ਵਿਅਕਤੀ ਦੀ ਹਸਪਤਾਲ ਵਿਚ ਇਲਾਜ ਦੌਰਾਨ ਮੌਤ ਹੋ ਗਈ ਜਿਸ ਦੀ ਪਛਾਣ ਅਰਜਨ ਸਿੰਘ (ਉਮਰ 40 ਸਾਲ) ਪੁੱਤਰ ਨੇਤਰ ਸਿੰਘ ਵਾਸੀ ਅਮਰਦਾਸ ਕਲੌਨੀ ਗਿਆਸਪੁਰਾ ਦੇ ਰੂਪ ਵਿਚ ਹੋਈ ਹੈ ਜਦਕਿ 4 ਵਿਅਕਤੀ ਹੋਰ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਏ। ਫ਼ੈਕਟਰੀ ਵਿਚ ਕੰਮ 'ਤੇ ਜਾ ਰਹੇ ਇਕ ਵਿਅਕਤੀ ਦਾ ਕੰਟੇਨਰ ਹੇਠਾਂ ਆਉਣ ਨਾਲ ਸੱਜਾ ਪੈਰ ਫਿਸ ਗਿਆ ਹੈ ਅਤੇ ਡਾਕਟਰਾਂ ਮੁਤਾਬਕ ਉਸਦਾ ਪੈਰ ਕੱਟਣਾ ਵੀ ਪੈ ਸਕਦਾ ਹੈ ਪੀੜਤ ਦੀ ਪਛਾਣ ਕਮੇਸ਼ਵਰ ਮਿਸ਼ਰਾ ਵਜੋਂ ਹੋਈ ਹੈ। ਬਾਕੀ ਦੇ ਜ਼ਖ਼ਮੀ ਤਿੰਨ ਵਿਅਕਤੀਆਂ ਨੂੰ ਮਾਮੂਲੀ ਖਰੋਚਾਂ ਆਇਆਂ। ਪੁਲਿਸ ਨੇ ਅਣਪਛਾਤੇ ਡਰਾਈਵਰ ਵਿਰੁਧ ਕੇਸ ਦਰਜ ਕਰ ਕੇ ਉਸਦੀ ਭਾਲ ਸ਼ੁਰੂ ਕਰ ਦਿਤੀ ਹੈ।
ਹਾਦਸੇ ਤੋਂ ਕੁਝ ਦੇਰ ਬਾਅਦ ਦਿੱਲੀ-ਅੰਮ੍ਰਿਤਸਰ ਹਾਈਵੇ ਪੂਰੀ ਤਰ੍ਹਾਂ ਜਾਮ ਹੋ ਗਿਆ ਸੀ। ਇਸ ਦੌਰਾਨ ਰੋਜ਼ਾਨਾ ਦੀ ਤਰ੍ਹਾਂ ਦਿੱਲੀ ਰੋਡ ਤੋਂ ਆਉਣ ਵਾਲੀ ਸਰਹਦ-ਏ-ਭਾਰਤ ਪਾਕਿਸਤਾਨ ਵਾਲੀ ਬੱਸ ਇਸ ਜਾਮ ਵਿਚ ਫਸ ਗਈ ਜਿਸ ਨੂੰ ਵੀ ਕੱਢਣ ਲਈ ਆਸਪਾਸ ਦੇ ਥਾਣਿਆਂ ਦੀ ਸਾਰੀ ਫ਼ੋਰਸ ਲੱਗ ਗਈ। ਇਕ ਘੰਟੇ ਦੀ ਮੁਸ਼ੱਕਤ ਕਰਨ ਤੋਂ ਬਾਅਦ ਬੱਸ ਨੂੰ ਰਵਾਨਾ ਕੀਤਾ ਗਿਆ। ਇਸ ਮੌਕੇ ਪੁਲਿਸ ਪ੍ਰਸ਼ਾਸਨ ਨੇ ਬੜੀ ਹੀ ਮੁਸਤੈਦੀ ਨਾਲ ਮਾਹੌਲ ਨੂੰ ਤਣਾਅ ਪੂਰਨ ਹੋਣ ਤੋਂ ਬਚਾ ਲਿਆ।
Punjab News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ