ਬਾਦਲ ਕਿਸਾਨਾਂ ਦੀ ਬਜਾਏ ਉਦਯੋਗਪਤੀਆਂ ਦੇ ਨਾਲ ਹਨ : ਬੰਨੀ ਜੌਲੀ
ਅਕਾਲੀ ਦਲ ਡੈਮੋਕਰੈਟਿਕ ਨੇ ਕਿਸਾਨਾਂ ਨੂੰ ਕੀਤਾ ਸੁਚੇਤ
ਨਵੀਂ ਦਿੱਲੀ: ਸ਼੍ਰੋਮਣੀ ਅਕਾਲੀ ਦਲ ਡੈਮੋਕਰੈਟਿਕ ਨੇ ਖੇਤੀਬਾੜੀ ਬਿੱਲਾਂ ਉੱਤੇ ਬਾਦਲ ਪਰਵਾਰ ਵੱਲੋਂ ਆਪਣੇ ਆਪ ਦੇ ਕਿਸਾਨ ਸਮਰਥਕ ਹੋਣ ਦੇ ਕੀਤੇ ਜਾਂਦੇ ਦਾਅਵਿਆਂ ਨੂੰ ਗ਼ਲਤ ਦੱਸਿਆ ਹੈ। ਪਾਰਟੀ ਦੇ ਨੇਤਾ ਹਰਪ੍ਰੀਤ ਸਿੰਘ ਬੰਨੀ ਜੌਲੀ ਨੇ ਦਾਅਵਾ ਕੀਤਾ ਹੈ ਕਿ ਬਾਦਲਾਂ ਨੇ ਐਨਡੀਏ ਦੇ ਅੰਦਰ ਰਹਿੰਦੇ ਹੋਏ ਕਿਸਾਨ ਵਿਰੋਧੀ ਬਿੱਲਾਂ ਦੇ ਖ਼ਿਲਾਫ਼ ਸਰਕਾਰ ਦੇ ਨਾਲ ਇੱਕ ਨਕਲੀ ਲੜਾਈ ਦਾ ਮੰਚਨ ਕੀਤਾ ਹੈ ਤਾਂ ਕਿ ਕਿਸਾਨਾਂ ਦੇ ਵਿਰੋਧ ਪ੍ਰਦਰਸ਼ਨਾਂ ਵਿੱਚ ਸੌਖੇ ਤਰੀਕੇ ਨਾਲ ਪ੍ਰਵੇਸ਼ ਕਰਕੇ ਅੰਦੋਲਨ ਨੂੰ ਸ਼ਾਂਤ ਕੀਤਾ ਜਾ ਸਕੇ।
ਬੰਨੀ ਜੌਲੀ ਨੇ ਕਿਹਾ ਕਿ ਬਾਦਲ ਹੁਣ ਦਾਅਵਾ ਕਰਦੇ ਹਨ ਕਿ ਜੂਨ ਦੇ ਬਾਅਦ ਤੋਂ ਹੁਣ ਤੱਕ ਉਹ ਇਹਨਾਂ ਕਾਲੇ ਕਾਨੂੰਨਾਂ ਦਾ ਵਿਰੋਧ ਕਰ ਰਹੇ ਸਨ ਤਾਂ ਉਹ ਇਹ ਵੀ ਸਾਫ਼ ਕਰਨ ਕਿ ਹਰਸਿਮਰਤ ਕੌਰ ਬਾਦਲ ਨੇ ਤਦ ਅਸਤੀਫ਼ਾ ਕਿਉਂ ਨਹੀਂ ਦਿੱਤਾ ਸੀ ? ਹੁਣ ਬਾਦਲ ਸਾਵਧਾਨੀ ਨਾਲ ਤਿਆਰ ਕੀਤੇ ਗਏ ਆਪਣੇ ਅਸਤੀਫ਼ੇ ਦੇ ਡਰਾਮੇ ਨੂੰ ਕੁਰਬਾਨੀ ਦੇ ਤੌਰ ਉੱਤੇ ਪ੍ਰੋਜੇਕਟ ਕਰਨ ਦੀ ਕੋਸ਼ਿਸ਼ ਕਿਉਂ ਕਰ ਰਹੇ ਹਨ ?
ਸੰਸਦ ਸੁਖਦੇਵ ਸਿੰਘ ਢੀਂਡਸਾ ਦੇ ਕਰੀਬੀ ਬੰਨੀ ਜੌਲੀ ਨੇ ਕਿਹਾ ਕਿ ਲੋਕਾਂ ਨੇ ਬਾਦਲ ਪਰਵਾਰ ਨੂੰ ਖਾਰਿਜ ਕਰ ਦਿੱਤਾ ਹੈ, ਇਸ ਲਈ ਹੁਣ ਇਹ ਕਿਸਾਨਾਂ ਦੇ ਦਿਲਾਂ ਵਿੱਚ ਆਪਣੀ ਰਾਹ ਬਣਾਉਣ ਲਈ ਮੁੱਠੀ ਭਰ ਚਾਟੁਕਾਰਾਂ ਵੱਲੋਂ ਲਿਖੀ ਪਟਕਥਾ ਉੱਤੇ ਕੰਮ ਕਰ ਰਹੇ ਹਨ। ਬੰਨੀ ਜੌਲੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸੁਖਬੀਰ ਸਿੰਘ ਬਾਦਲ ਹਮੇਸ਼ਾ ਤੋਂ ਪੱਕੇ ਵਪਾਰੀ ਰਹੇ ਹਨ ਅਤੇ ਸੁਖਬੀਰ ਨੇ ਹਮੇਸ਼ਾ ਆਪਣੇ ਪਰਵਾਰ ਦੇ ਵਿੱਤੀ ਹਿਤਾਂ ਨੂੰ ਪੰਥ ਅਤੇ ਪੰਜਾਬ ਉੱਤੇ ਪਹਿਲ ਦਿੱਤੀ ਹੈ।
ਇਸ ਲਈ ਕਾਨੂੰਨ ਬਣਨ ਦੇ ਬਾਅਦ ਤਿੰਨਾਂ ਖੇਤੀਬਾੜੀ ਬਿੱਲਾਂ ਨਾਲ ਵੱਡੇ ਪੈਮਾਨੇ ਉੱਤੇ ਮੁਨਾਫ਼ਾ ਚੁੱਕਣ ਦੀ ਤਾਕ ਵਿੱਚ ਖੜੇ ਸੰਭਾਵੀ ਉਦਯੋਗਪਤੀਆਂ ਦੇ ਇਸ਼ਾਰੇ ਉੱਤੇ ਬਾਦਲ ਕਿਸਾਨਾਂ ਦੇ ਵਿਰੋਧ ਨੂੰ ਤੋੜਨ ਲਈ ਸਾਰਾ ਡਰਾਮਾ ਕਰ ਰਹੇ ਹਨ। ਜੌਲੀ ਨੇ ਕਿਸਾਨਾਂ ਨੂੰ ਆਗਾਹ ਕਰਦੇ ਹੋਏ ਕਿਹਾ ਕਿ ਵੱਡੇ ਕਾਰਪੋਰੇਟ ਘਰਾਣਿਆਂ ਦੀ ਦਲਾਲੀ ਕਰਨ ਦੀ ਫ਼ਿਰਾਕ ਵਿੱਚ ਲੱਗੇ ਬਾਦਲਾਂ ਨੂੰ ਆਪਣੇ ਪ੍ਰਦਰਸ਼ਨਾਂ ਦੇ ਕਰੀਬ ਨਾ ਆਉਣ ਦੇਣ, ਇਸ ਵਿੱਚ ਕਿਸਾਨਾਂ ਦੀ ਭਲਾਈ ਹੈਂ।
ਹਰਸਿਮਰਤ ਨੇ ਇੱਕ ਨਿੱਜੀ ਟੀਵੀ ਚੈਨਲ ਨਾਲ ਗੱਲਬਾਤ ਵਿੱਚ ਮੰਨਿਆ ਹੈ ਕਿ ਉਹ ਬਿੱਲਾਂ ਦੇ ਖ਼ਿਲਾਫ਼ ਨਹੀਂ ਹਨ, ਪਰ ਕਿਉਂਕਿ ਬਿਲ ਦਾ ਕਿਸਾਨ ਵਿਰੋਧ ਕਰ ਰਹੇ ਹਨ, ਇਸ ਲਈ ਮੈਂ ਅਸਤੀਫ਼ਾ ਦਿੱਤਾ ਹੈ। ਹਰਸਿਮਰਤ ਦੀ ਇਸ ਸਫ਼ਾਈ ਤੋਂ ਸਾਫ਼ ਹੈ ਕਿ ਬਾਦਲ ਬਿੱਲਾਂ ਨੂੰ ਹੁਣ ਵੀ ਠੀਕ ਮੰਨਦੇ ਹਨ।