Guru Kirat Trust Uk Help Sikh Boy

ਅੰਮ੍ਰਿਤਸਰ: ਐਨਕਾਂ ਵੇਚਣ ਵਾਲਾ ਬੱਚਾ ਤਾਂ ਤੁਹਾਨੂੰ ਯਾਦ ਹੀ ਹੋਵੇਗਾ ਜਿਸ ਦੇ ਦੋ ਬੋਲਾਂ ਨਾਲ ਹੀ ਪੂਰੀ ਦੁਨੀਆ ਨੂੰ ਅਪਣਾ ਫ਼ੈਨ ਬਣਾ ਲਿਆ। ਇਸ ਬੱਚੇ ਨੇ ਕਿਹਾ ਸੀ ਕਿ ਸਿੱਖ ਕਦੇ ਭੀਖ ਨਹੀਂ ਮੰਗਦੇ ਤੇ ਅੱਜ ਇਹੀ ਬੋਲ ਇਸ ਬੱਚੇ ਦਾ ਘਰ ਬਣਵਾ ਰਹੇ ਹਨ। ਦਰਅਸਲ ਗੁਰੂ ਪੰਥ ਟ੍ਰਸਟ ਯੂਕੇ ਵੱਲੋਂ ਬੱਚੇ ਅਤੇ ਉਸ ਦੇ ਪਿਤਾ ਦੀ ਮਦਦ ਕੀਤੀ ਜਾ ਰਹੀ ਹੈ।

ਗੁਰੂ ਪੰਥ ਟ੍ਰਸਟ ਯੂਕੇ ਦੇ ਮੈਂਬਰ ਗੁਰਪ੍ਰਤਾਪ ਸਿੰਘ ਨੇ ਦਸਿਆ ਕਿ ਉਹਨਾਂ ਨੂੰ ਜਦੋਂ ਇਸ ਬੱਚੇ ਦੀ ਹਾਲਤ ਬਾਰੇ ਪਤਾ ਲੱਗਿਆ ਤਾਂ ਉਹਨਾਂ ਨੇ ਤੁਰੰਤ ਉਹਨਾਂ ਦੀ ਮਦਦ ਕਰਨ ਬਾਰੇ ਸੋਚ ਲਿਆ। ਉਹਨਾਂ ਵੱਲੋਂ ਇਸ ਬੱਚੇ ਦੇ ਰਹਿਣ ਲਈ ਘਰ, ਉਸ ਦੀ ਪੜ੍ਹਾਈ ਦਾ ਖਰਚ ਅਤੇ ਰੁਜ਼ਗਾਰ ਕਰਨ ਲਈ ਇਕ ਰੇਹੜੀ ਵੀ ਦਿੱਤੀ ਗਈ ਹੈ।

ਉਸ ਵਿਚ ਵੇਚਣ ਲਈ ਬੱਚਿਆਂ ਦੇ ਕੱਪੜੇ, ਐਨਕਾਂ ਅਤੇ ਹੋਰ ਕਈ ਸਮਾਨ ਸ਼ਾਮਲ ਕੀਤਾ ਗਿਆ ਹੈ। ਉੱਥੇ ਹੀ ਬੱਚੇ ਦੇ ਪਿਤਾ ਨੇ ਦਸਿਆ ਕਿ ਉਹ ਤਕਰੀਬਨ 5 ਸਾਲ ਤੋਂ ਐਨਕਾਂ ਤੇ ਹੋਰ ਛੋਟਾ-ਛੋਟਾ ਸਮਾਨ ਵੇਚਣ ਦਾ ਕੰਮ ਕਰ ਰਹੇ ਹਨ। ਲਾਕਡਾਊਨ ਵਿਚ ਵੀ ਉਹਨਾਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ ਸੀ।

ਉੱਥੇ ਹੀ ਗੁਰਪ੍ਰਤਾਪ ਸਿੰਘ ਨੇ ਦਸਿਆ ਕਿ ਉਹਨਾਂ ਦੇ ਘਰ ਲਈ 3 ਮਰਲੇ ਥਾਂ ਲੈ ਲਈ ਗਈ ਹੈ ਤੇ ਘਰ ਦਾ ਕੰਮ ਜਲਦ ਹੀ ਸ਼ੁਰੂ ਕਰ ਦਿੱਤਾ ਜਾਵੇਗਾ। ਇਸ ਦੇ ਨਾਲ ਹੀ ਉਹਨਾਂ ਨੇ ਭੀਖ ਮੰਗਣ ਵਾਲਿਆਂ ਨੂੰ ਇਹੀ ਸੁਝਾਅ ਦਿੱਤਾ ਹੈ ਕਿ ਉਹ ਮੰਗਣ ਦੀ ਥਾਂ ਮਿਹਨਤ ਕਰਨ ਜੇ ਕਿਸੇ ਨੂੰ ਮਿਹਨਤ ਕਰਨ ਵਿਚ ਕੋਈ ਮੁਸ਼ਕਿਲ ਹੋ ਰਹੀ ਹੈ ਤਾਂ ਉਹ ਉਹਨਾਂ ਦੀ ਜ਼ਰੂਰ ਮਦਦ ਕਰਨਗੇ।

ਪਰ ਸਿੱਖ ਇਤਿਹਾਸ ਵਿਚ ਮੰਗਣ ਖਾਣ ਦੀ ਗੱਲ ਨਹੀਂ ਆਖੀ ਗਈ ਸਗੋਂ ਅਪਣੀ ਮਿਹਨਤ ਤੇ ਵਿਸ਼ਵਾਸ ਰੱਖਣਾ ਚਾਹੀਦਾ ਹੈ। ਜਿੱਥੇ ਵੀ ਕੋਈ ਲੋੜਵੰਦ ਪਰਿਵਾਰ ਮਿਲਦਾ ਹੈ ਉਸ ਦੀ ਮਦਦ ਜ਼ਰੂਰ ਕਰਨੀ ਚਾਹੀਦੀ ਹੈ। ਬੱਚੇ ਦੇ ਬੋਲਾਂ ਨੇ ਲੋਕਾਂ ਨੂੰ ਅਸਲ ਸਿੱਖ ਹੋਣ ਦਾ ਅਹਿਸਾਸ ਕਰਵਾਇਆ ਹੈ ਕਿ ਸਿੱਖ ਕਦੇ ਭੀਖ ਨਹੀਂ ਮੰਗਦੇ ਤੇ ਉਹ ਹਮੇਸ਼ਾ ਮਿਹਨਤ ਦੀ ਰੋਟੀ ਹੀ ਖਾਂਦੇ ਹਨ।

ਅਪਣੀ ਮਿਹਨਤ ਵਿਚੋਂ ਗਰੀਬਾਂ ਲਈ ਦਾਨ ਜ਼ਰੂਰ ਦੇਣਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਉਹਨਾਂ ਕਿਹਾ ਕਿ, “ਜਿਹੜੇ ਅਜਿਹੇ ਬੇਸਹਾਰਾ ਲੋਕ ਹੁੰਦੇ ਹਨ ਉਹਨਾਂ ਦੀ ਬਾਂਹ ਫੜਨ ਦੀ ਲੋੜ ਹੈ।”