ਨਵੀਂ ਦਿੱਲੀ: ਰੂਪਨਗਰ ਸ਼ਹਿਰ ਵਿਚਲੇ ਪਾਵਰ ਕਲੋਨੀ ਦੇ ਸਕੂਲ ਨੂੰ ਨੂੰਹੋਂ ਕਲੋਨੀ ਸਕੂਲ ਵਿੱਚ merge ਕਰਨ ਦੇ ਸਰਕਾਰੀ ਫ਼ੈਸਲੇ ਵਿਰੁੱਧ ਪਾਵਰ ਕਲੋਨੀ ਸਕੂਲ ਦੇ ਮੂਹਰੇ ਇਲਾਕਾ ਨਿਵਾਸੀਆਂ ਵੱਲੋਂ ਰੋਸ ਧਰਨਾ ਦਿੱਤਾ ਗਿਆ। ਸਾਬਕਾ ਪ੍ਰਧਾਨ ਨਗਰ ਕੌਂਸਲ ਰੂਪਨਗਰ ਪਰਮਜੀਤ ਸਿੰਘ ਮੱਕੜ ਦੀ ਅਗੁਵਾਈ ਹੇਠ ਦਿੱਤੇ ਗਏ ਇਸ ਧਰਨੇ ਮੌਕੇ ਧਰਨਾ ਦੇਣ ਵਾਲਿਆਂ ਨੇ ਰੋਸ ਪ੍ਰਗਟ ਕਰਦਿਆਂ ਕਿਹਾ ਕਿ ਇਸ ਸਮੇਂ ਇਸ ਸਕੂਲ ਵਿੱਚ ਤਕਰੀਬਨ 250 ਬੱਚੇ ਪੜ੍ਹਾਈ ਕਰ ਰਹੇ ਹਨ।

ਇਹ ਸਾਰੇ ਬੱਚੇ ਗਰੀਬ ਪਰਿਵਾਰਾਂ ਦੇ ਹਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਬੱਚਿਆਂ ਨੂੰ ਨੁੰਹੋਂ ਕਲੋਨੀ ਦੇ ਸਕੂਲ ਵਿੱਚ ਜਾਣਾ ਬਹੁਤ ਦੂਰ ਪਵੇਗਾ ਅਤੇ ਹੁਣ ਇਹ ਬੱਚੇ ਆਪਣੇ ਘਰਾਂ ਕੋਲ ਪੜ੍ਹ ਰਹੇ ਹਨ ਪਰੰਤੂ ਨੂਹੋਂ ਕਲੋਨੀ ਦਾ ਫਾਸਲਾ ਇੱਥੋਂ ਤਕਰੀਬਨ 15 ਕਿਲੋਮੀਟਰ ਦਾ ਹੈ।

ਉਨ੍ਹਾ ਕਿਹਾ ਕਿ ਸਰਕਾਰ ਨੇ ਪਿਛਲੇ ਸੈਸ਼ਨ ਵਿੱਚ ਹੀ ਸਕੂਲ ਨੂੰ ਸ਼ਿਫਟ ਕਰਨ ਦਾ ਫੈਸਲਾ ਕੀਤਾ ਸੀ ਪਰੰਤੂ ਲੋਕਾਂ ਦੇ ਵਿਰੋਧ ਕੀਤਾ ਸੀ ਅਤੇ ਹੁਣ ਸਰਕਾਰ ਇਸ ਨਵੇਂ ਸੈਸ਼ਨ ਤੋਂ ਫੇਰ ਇਸ ਸਕੂਲ ਨੂੰ ਸ਼ਿਫਟ ਕਰਨ ਜਾ ਰਹੀ ਹੈ। ਇਲਾਕਾ ਨਿਵਾਸੀਆਂ ਨੇ ਮੰਗ ਕੀਤੀ ਕਿ ਇਸ ਸਕੂਲ ਨੂੰ ਇੱਥੋਂ ਤਬਦੀਲ ਨਾ ਕੀਤਾ ਜਾਵੇ।