Hoshiarpur's Dancer Priya, found dead in Sadiq's house

ਕੋਟਕਪੂਰਾ : ਪੁਲਿਸ ਨੇ ਜ਼ਿਲ੍ਹਾ ਹੁਸ਼ਿਆਰਪੁਰ ਦੀ ਇਕ ਆਰਕੈਸਟਰਾ ਗਰੁਪ ਵਿਚ ਕੰਮ ਕਰਨ ਵਾਲੀ ਡਾਂਸਰ ਲੜਕੀ ਦੀ ਲਾਸ਼ ਸਾਦਿਕ ਦੇ ਇਕ ਘਰ ਵਿਚੋਂ ਬਰਾਮਦ ਕਰਨ ਵਿਚ ਸਫ਼ਲਤਾ ਹਾਸਲ ਕੀਤੀ ਹੈ। ਪੁਲਿਸ ਸੂਤਰਾਂ ਅਨੁਸਾਰ ਫ਼ਿਰੋਜ਼ਪੁਰ ਦੇ ਇਕ ਗਰੁਪ ਵਿਚ ਕੰਮ ਕਰਨ ਵਾਲੀ ਨੌਜਵਾਨ ਲੜਕੀ ਪ੍ਰਿਯਾ ਪੁੱਤਰੀ ਵਿਜੇ ਸਿੰਘ ਵਾਸੀ ਮਾਨਕ ਢੇਰੀ ਜ਼ਿਲ੍ਹਾ ਹੁਸ਼ਿਆਰਪੁਰ ਜੋ ਬੀਤੀ 12 ਅਗੱਸਤ ਤੋਂ ਅਪਣੇ ਘਰ ਤੋਂ ਗਰੁਪ ਦੇ ਕਿਸੇ ਪ੍ਰੋਗਰਾਮ ਲਈ ਗਈ ਪਰ ਘਰ ਵਾਪਸ ਨਾ ਪਰਤੀ। ਬੀਤੇ ਕਲ ਉਸ ਦੀ ਲਾਸ਼ ਨੂੰ ਆਰਕੈਸਟਰਾ ਗਰੁਪ ਦੇ ਡੀ.ਜੀ ਅਪ੍ਰੇਟਰ ਦੇ ਘਰੋਂ ਪੁਲਿਸ ਨੇ ਬਰਾਮਦ ਕਰ ਲਿਆ ਹੈ। 

ਮ੍ਰਿਤਕ ਦੇ ਵਾਰਸਾਂ ਨੇ ਦਸਿਆ ਕਿ ਪ੍ਰਿਯਾ ਇਹ ਕਹਿ ਕੇ ਘਰੋਂ ਗਈ ਸੀ ਕਿ ਉਹ ਗੁਰਵਿੰਦਰ ਸਿੰਘ ਨਾਲ ਪ੍ਰੋਗਰਾਮ 'ਤੇ ਜਾ ਰਹੀ ਹੈ। ਅਗਲੇ ਦਿਨ ਉਸ ਦਾ ਫ਼ੋਨ ਵੀ ਬੰਦ ਆ ਰਿਹਾ ਸੀ। ਇਕ ਦਿਨ ਪ੍ਰਿਯਾ ਨੇ ਗੁਰਵਿੰਦਰ ਸਿੰਘ ਦੇ ਫ਼ੋਨ ਤੋਂ ਕਾਲ ਕੀਤੀ ਕਿ ਉਸ ਨੂੰ ਕੁੱਟਿਆ ਮਾਰਿਆ ਜਾ ਰਿਹਾ ਹੈ ਤੇ ਉਸ ਨੂੰ ਜਾਨੋਂ ਮਾਰ ਦਿਤਾ ਜਾਵੇਗਾ। ਇਸ ਤੋਂ ਬਾਅਦ ਗੁਰਵਿੰਦਰ ਸਿੰਘ ਦਾ ਫ਼ੋਨ ਆਇਆ ਕਿ ਪ੍ਰਿਯਾ ਦੀ ਤਬੀਅਤ ਖਰਾਬ ਹੈ ਤੇ ਫਿਰ ਉਸ ਨੇ ਫ਼ੋਨ ਕੱਟ ਦਿਤਾ।

ਕੇਸ ਦੀ ਤਫ਼ਤੀਸ਼ ਕਰ ਰਹੇ ਏ.ਐਸ.ਆਈ. ਧਰਮ ਸਿੰਘ ਨੇ ਦਸਿਆ ਕਿ ਮੈਡੀਕਲ ਰੀਪੋਰਟ ਆਉਣ ਤੋਂ ਬਾਅਦ ਬਲਾਤਕਾਰ ਵਗੈਰਾ ਬਾਰੇ ਸਪੱਸ਼ਟ ਹੋ ਸਕੇਗਾ। ਫਿਲਹਾਲ ਪੁਲਿਸ ਇਹ ਪਤਾ ਲਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਲੜਕੀ ਦੀ ਮੌਤ ਕਿਥੇ ਤੇ ਕਿਵੇਂ ਹੋਈ ਹੈ। ਮ੍ਰਿਤਕਾ ਦੇ ਪਿਤਾ ਦੇ ਬਿਆਨਾਂ 'ਤੇ ਪੁਲਿਸ ਨੇ ਗੁਰਵਿੰਦਰ ਸਿੰਘ ਪੁੱਤਰ ਮਲੂਕ ਸਿੰਘ ਵਾਸੀ ਸਾਦਿਕ ਵਿਰੁਧ ਧਾਰਾ 302 ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਹੈ।