Actor dies in ramlila

ਮਲੇਰਕੋਟਲਾ : ਰਾਮਲੀਲਾ ਸੰਕੀਰਤਨ ਮੰਡਲ ਮੁਹੱਲਾ, ਤਪਾ ਦੀ ਰਾਮਲੀਲਾ ਵਿੱਚ ਸਟੇਜ ਤੇ ਅਦਾਕਾਰੀ ਕਰਦਿਆਂ ਇੱਕ ਕਲਾਕਾਰ ਦੀ ਮੌਤ ਹੋ ਜਾਣ ਦੀ  ਖ਼ਬਰ ਸਾਹਮਣੇ ਆਈ ਹੈ। ਜਾਣਕਾਰੀ ਅਨੁਸਾਰ ਸਥਾਨਕ ਸੂਡਾ ਇਲਾਕੇ ਦਾ ਵਸਨੀਕ ਰਾਜੂ ਰਿਖੀ ਸ਼ਨੀਵਾਰ ਰਾਤ ਨੂੰ ਰਾਮਲੀਲਾ ਵਿੱਚ ਇਕ ਗਾਣੇ 'ਤੇ ਲੋਕਾਂ ਦਾ ਮਨੋਰੰਜਨ ਕਰ ਰਿਹਾ ਸੀ। ਇਸ ਦੌਰਾਨ ਉਹ ਅਚਾਨਕ ਨੱਚਦਾ ਟੱਪਦਾ ਲੋਕਾਂ ਦੀ ਭੀੜ ਦੇ ਬਿਲਕੁਲ ਵਿਚਾਲੇ ਜਾ ਕੇ ਡਿੱਗ ਗਿਆ।

ਲੋਕਾਂ ਨੇ ਉਸ ਨੂੰ ਹਿਲਾਇਆ ਪਰ ਉਹ ਉੱਠਿਆ ਨਾ ਕੁਝ ਸਮੇਂ ਲਈ ਲੋਕਾਂ ਨੇ ਮਹਿਸੂਸ ਕੀਤਾ ਕਿ ਉਹ ਅਦਾਕਾਰੀ ਕਰ ਰਿਹਾ ਹੈ। ਜਦੋਂ ਉਹ ਨਾ ਉੱਠਿਆ ਤਾਂ ਕਮੇਟੀ ਦੇ ਮੈਂਬਰ ਤੁਰੰਤ ਉਸ ਨੂੰ ਹਸਪਤਾਲ ਲੈ ਗਏ। ਹਸਪਤਾਲ ਜਾ ਕੇ ਚੈੱਕਅਪ ਤੋਂ ਬਾਅਦ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ। ਰਾਜੂ ਰਿਖੀ ਆਪਣੇ ਪਿੱਛੇ ਤਿੰਨ ਬੇਟੇ ਅਤੇ ਇੱਕ ਬੇਟੀ ਨੂੰ ਪਿਛੇ ਛੱਡ ਗਿਆ ਹੈ।

ਦੱਸ ਦਈਏ ਕਿ ਰਾਜੂ ਰਿਖੀ ਪਿਛਲੇ 35 ਸਾਲਾਂ ਤੋਂ ਰਾਮ ਲੀਲਾ ਵਿਚ ਅਦਾਕਾਰੀ ਕਰਦਾ ਸੀ। ਰਾਜੂ ਰਿਖੀ ਰਾਮਲੀਲਾ ਵਿਚ ਬਤੌਰ ਕਾਮੇਡੀਅਨ ਕੰਮ ਕਰਦਾ ਸੀ ਅਤੇ ਲੋਕਾਂ ਦਾ ਮਨੋਰੰਜਨ ਕਰਦਾ ਸੀ ਪਰ ਇਸ ਵਾਰ ਉਸਨੂੰ ਕੀ ਪਤਾ ਸੀ ਕਿ ਰਾਮਲੀਲਾ ਵਿਚ ਇਹ ਉਸਦੀ ਆਖਰੀ ਪੇਸ਼ਕਾਰੀ ਹੋਵੇਗੀ। ਰਾਮਲੀਲਾ ਦੌਰਾਨ ਕੁਝ ਰਾਜੂ ਦੇ ਪੁਰਾਣੇ ਪ੍ਰਸ਼ੰਸ਼ਕ ਸਨ। ਜਿਨ੍ਹਾਂ ਨੂੰ ਉਸਦੀ ਮੌਤ ਦਾ ਸਦਮਾ ਲੱਗਿਆ ਹੈ।

ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਵੀ ਰਾਮਲੀਲਾ ਦੌਰਾਨ ਸਟੇਜ ਤੇ ਕਈ ਕਲਾਕਾਰ ਦੀ ਮੌਤ ਹੋ ਚੁੱਕੀ ਹੈ। ਪੰਜਾਬ 'ਚ ਹੀ ਨਹੀਂ ਬਲਕਿ ਦੇਸ਼ ਦੇ ਹੋਰ ਵੀ ਕਈ ਸੂਬਿਆਂ 'ਚ ਅਜਿਹੀਆਂ ਘਟਨਾਵਾਂ ਵਾਪਰੀਆਂ ਹਨ। ਜਿਨ੍ਹਾਂ ਦੇ ਵੀਡੀਓ ਵੀ ਸੋਸ਼ਲ ਮੀਡੀਆ ਤੇ ਕਾਫ਼ੀ ਵਾਇਰਲ ਹੁੰਦੇ ਰਹੇ ਹਨ।