Punjab inmates use high signals to duck jammers

Punjab News: ਪੰਜਾਬ ਦੀਆਂ ਜੇਲਾਂ ਵਿਚ ਮੋਬਾਈਲ ਸਿਗਨਲ ਰੋਕਣ ਲਈ ਜੇਲ ਪ੍ਰਸ਼ਾਸਨ ਦੀਆਂ ਕੋਸ਼ਿਸ਼ਾਂ ਉਤੇ ਕੈਦੀਆਂ ਦਾ ਤਕਨੀਕੀ ਗਿਆਨ ਭਾਰੀ ਪੈ ਰਿਹਾ ਹੈ। ਜੇਲ ਵਿਚ ਜੈਮਰ ਰਾਹੀਂ ਮੋਬਾਈਲ ਸਿਗਨਲ ਨੂੰ ਬੰਦ ਕਰਨ ਦੀਆਂ ਕੋਸ਼ਿਸ਼ਾਂ ਨੂੰ ਕੈਦੀਆਂ ਦੀਆਂ ਚਾਲਾਂ ਵਲੋਂ ਨਾਕਾਮ ਕੀਤਾ ਜਾ ਰਿਹਾ ਹੈ। ਕੈਦੀ ਐਮਰਜੈਂਸੀ ਨੰਬਰ ਡਾਇਲ ਕਰਕੇ ਅਤਿ-ਆਧੁਨਿਕ ਸਿਗਨਲ ਜੈਮਰ ਪ੍ਰਾਜੈਕਟ ਨੂੰ ਬਾਈਪਾਸ ਕਰ ਰਹੇ ਹਨ।

ਇਸ ਨੰਬਰ ਨੂੰ ਡਾਇਲ ਕਰਨ ਨਾਲ, ਸਿਗਨਲ ਮਜ਼ਬੂਤ ​​​​ਹੋ ਜਾਂਦਾ ਹੈ ਅਤੇ ਇਸ ਤੋਂ ਬਾਅਦ ਉਹ ਜੇਲ ਕੰਪਲੈਕਸ ਤੋਂ ਹੀ ਲੋੜੀਂਦੀ ਕਾਲ ਕਰਨ ਦੇ ਯੋਗ ਹੋ ਜਾਂਦੇ ਹਨ। ਇਸ ਗੱਲ ਦਾ ਖੁਲਾਸਾ ਪੰਜਾਬ ਸਰਕਾਰ ਵਲੋਂ ਜੇਲਾਂ ਵਿਚ ਜੈਮਰ ਲਗਾਉਣ ਸਬੰਧੀ ਦਿਤੇ ਹਲਫ਼ਨਾਮੇ ਤੋਂ ਹੋਇਆ ਹੈ। ਪੰਜਾਬ ਦੀਆਂ ਜੇਲਾਂ ਵਿਚ ਮੋਬਾਈਲ ਫੋਨਾਂ ਦੀ ਵੱਧ ਰਹੀ ਵਰਤੋਂ ਦਾ ਨੋਟਿਸ ਲੈਂਦਿਆਂ ਪੰਜਾਬ-ਹਰਿਆਣਾ ਹਾਈ ਕੋਰਟ ਨੇ 2011 ਵਿਚ ਪੰਜਾਬ ਸਰਕਾਰ ਨੂੰ ਜੇਲਾਂ ਨੂੰ ਅਤਿ-ਆਧੁਨਿਕ ਜੈਮਰਾਂ ਨਾਲ ਲੈਸ ਕਰਨ ਲਈ ਕਦਮ ਚੁੱਕਣ ਦੇ ਹੁਕਮ ਦਿਤੇ ਸਨ।

ਪੰਜਾਬ ਸਰਕਾਰ ਨੇ ਰੀਪੋਰਟ ਵਿਚ ਦਸਿਆ ਕਿ ਕੇਂਦਰ ਸਰਕਾਰ ਦੀ ਮਨਜ਼ੂਰੀ ਅਤੇ ਸੁਝਾਅ ਅਨੁਸਾਰ ਪੰਜਾਬ ਦੀਆਂ ਦੋ ਜੇਲਾਂ ਅੰਮ੍ਰਿਤਸਰ ਅਤੇ ਕਪੂਰਥਲਾ ਵਿਚ ਪਾਇਲ ਪ੍ਰਾਜੈਕਟ ਵਜੋਂ ਟਾਵਰ ਆਫ਼ ਹਾਰਮੋਨੀਅਸ ਕਾਲ ਬਲਾਕਿੰਗ ਸਿਸਟਮ ਲਗਾਇਆ ਗਿਆ ਹੈ। ਇਸ ਨੂੰ ਪੰਜਾਬ ਦੀਆਂ ਹੋਰ ਜੇਲਾਂ ਵਿਚ ਲਾਗੂ ਕਰਨ ਲਈ ਪੰਜਾਬ ਸਰਕਾਰ ਨੇ ਸਮੂਹ ਸਬੰਧਤ ਧਿਰਾਂ ਨਾਲ ਮਿਲ ਕੇ ਹੋਰਨਾਂ ਜੇਲਾਂ ਦਾ ਸਰਵੇਖਣ ਕੀਤਾ ਹੈ। ਰੀਪੋਰਟ ਵਿਚ ਸਰਕਾਰ ਨੇ ਕਿਹਾ ਕਿ ਜੈਮਰਾਂ ਰਾਹੀਂ ਸਿਗਨਲ ਜਾਮ ਕਰਨ ਲਈ ਸਰਕਾਰੀ ਪੱਧਰ ’ਤੇ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ ਪਰ ਕੈਦੀ ਐਸਓਐਸ ਨੰਬਰ ਦੀ ਹਿੱਟ ਐਂਡ ਟਰਾਈ ’ਤੇ ਵਰਤੋਂ ਕਰਦੇ ਹਨ।

ਇਕ ਵਾਰ ਨੰਬਰ ਡਾਇਲ ਕਰਨ ਤੋਂ ਬਾਅਦ, ਸਿਗਨਲ ਮਜ਼ਬੂਤ ​​​​ਹੋ ਜਾਂਦਾ ਹੈ ਅਤੇ ਫਿਰ ਫ਼ੋਨ ਕੱਟ ਕੇ ਲੋੜੀਂਦੇ ਨੰਬਰ 'ਤੇ ਡਾਇਲ ਕੀਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ ਕੈਦੀ ਮੈਨੂਅਲ ਸਿਗਨਲ ਚੁਣ ਕੇ ਵੀ ਫ਼ੋਨ ਦੀ ਵਰਤੋਂ ਕਰਦੇ ਹਨ। ਇਹ ਵੇਰਵੇ ਪੰਜਾਬ ਦੇ ਡੀਆਈਜੀ (ਜੇਲਾਂ) ਸੁਰਿੰਦਰ ਸਿੰਘ ਵਲੋਂ ਸੂਬੇ ਦੀਆਂ ਜੇਲਾਂ ਅੰਦਰ ਕੈਦੀਆਂ ਵਲੋਂ ਮੋਬਾਈਲ ਫ਼ੋਨਾਂ ਦੀ ਦੁਰਵਰਤੋਂ ਸਬੰਧੀ ਇਕ ਮਾਮਲੇ ਦੀ ਸੁਣਵਾਈ ਦੌਰਾਨ ਸੂਬਾ ਸਰਕਾਰ ਦੀ ਤਰਫ਼ੋਂ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਪੇਸ਼ ਕੀਤੀ ਗਈ ਰੀਪੋਰਟ ਵਿਚ ਸਾਹਮਣੇ ਆਏ ਹਨ।

ਹੁਣ ਪੰਜਾਬ ਸਰਕਾਰ ਸਾਹਮਣੇ ਸੱਭ ਤੋਂ ਵੱਡੀ ਚੁਣੌਤੀ 5ਜੀ ਸਿਗਨਲ ਨੂੰ ਬੰਦ ਕਰਨਾ ਹੈ ਕਿਉਂਕਿ ਇਹ ਸਿਸਟਮ 5ਜੀ ਸਿਗਨਲ 'ਤੇ ਅਸਰਦਾਰ ਨਹੀਂ ਹੈ। ਇਸ ਦੇ ਨਾਲ ਹੀ ਇਹ ਵੀ ਦਸਿਆ ਗਿਆ ਕਿ ਇਨ੍ਹਾਂ ਦੋਵਾਂ ਜੇਲਾਂ ਵਿਚ ਪਾਇਲਟ ਪ੍ਰਾਜੈਕਟ ਦੇ ਸਰਵੇ ਦੀ ਜ਼ਿੰਮੇਵਾਰੀ ਪ੍ਰਾਈਵੇਟ ਕੰਪਨੀ ਨੂੰ ਸੌਂਪੀ ਗਈ ਸੀ ਅਤੇ ਕੰਪਨੀ ਨੇ ਇਸ ਨੂੰ ਅੰਮ੍ਰਿਤਸਰ ਵਿਚ 78 ਫ਼ੀ ਸਦੀ ਅਤੇ ਕਪੂਰਥਲਾ ਜੇਲ ਵਿਚ ਸਿਰਫ਼ 70 ਫ਼ੀ ਸਦੀ ਅਸਰਦਾਰ ਦਸਿਆ ਹੈ। ਕੰਪਨੀ ਨੇ ਇਕ ਮਹੀਨੇ ਤੋਂ ਹਰ ਰੋਜ਼ ਵੱਖ-ਵੱਖ ਥਾਵਾਂ 'ਤੇ ਸਿਗਨਲ ਸਬੰਧੀ ਅਪਣੀ ਰੀਪੋਰਟ ਤਿਆਰ ਕੀਤੀ ਹੈ। ਹਲਫਨਾਮੇ 'ਚ ਹਾਈਕੋਰਟ ਨੂੰ ਅਪੀਲ ਕੀਤੀ ਗਈ ਸੀ ਕਿ 5ਜੀ ਸਿਗਨਲ ਲਈ ਟਾਵਰ ਆਫ ਹਾਰਮੋਨੀਅਸ ਕਾਲ ਬਲਾਕਿੰਗ ਸਿਸਟਮ ਨੂੰ ਪ੍ਰਭਾਵੀ ਬਣਾਉਣ ਲਈ ਕੇਂਦਰ ਸਰਕਾਰ ਨੂੰ ਨਿਰਦੇਸ਼ ਜਾਰੀ ਕੀਤੇ ਜਾਣ।

SOS ਨੰਬਰ ਕੀ ਹੈ?

ਐਮਰਜੈਂਸੀ ਐਸਓਐਸ ਆਈਓਐਸ ਅਤੇ ਐਂਡਰਾਇਡ ਫੋਨਾਂ ਵਿਚ ਉਪਲਬਧ ਇਕ ਵਿਸ਼ੇਸ਼ ਫੀਚਰ ਹੈ। ਇਸ ਫੀਚਰ ਨਾਲ, ਤੁਸੀਂ ਫੋਨ ਨੂੰ ਅਨਲੌਕ ਕੀਤੇ ਬਿਨਾਂ ਵੀ ਮੁਸੀਬਤ ਦੇ ਸਮੇਂ ਵਿਚ ਕਿਸੇ ਨੂੰ ਸਕਿੰਟਾਂ ਵਿਚ ਕਾਲ ਕਰ ਸਕਦੇ ਹੋ। ਫੋਨ ਵਿਚ ਐਮਰਜੈਂਸੀ ਨੰਬਰ 112 ਦੇ ਨਾਲ ਐਮਰਜੈਂਸੀ SOS ਪਹਿਲਾਂ ਤੋਂ ਹੀ ਚਾਲੂ ਹੈ। ਹਾਲਾਂਕਿ, ਉਪਭੋਗਤਾ ਅਪਣੀ ਜ਼ਰੂਰਤ ਦੇ ਅਨੁਸਾਰ ਇਸ ਸੈਟਿੰਗ ਵਿਚ ਅਪਣੇ ਸੰਪਰਕਾਂ ਨੂੰ ਜੋੜ ਸਕਦਾ ਹੈ।