Sikhs aim to plant million trees

ਲੰਡਨ: ਦੁਨੀਆ ਭਰ ਵਿਚ ਵਸ ਰਹੇ ਸਿੱਖ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਗੁਰਪੁਰਬ ਨੂੰ ਸਮਰਪਿਤ ਇਕ ਯੋਜਨਾ ਚਲਾ ਰਹੇ ਹਨ। ਇਸ ਯੋਜਨਾ ਦਾ ਨਾਂਅ “gift to entire planet” ਹੈ ਭਾਵ ਪੂਰੇ ਗ੍ਰਹਿ ਨੂੰ ਤੋਹਫਾ ਹੈ। ਇਕ ਅੰਗਰੇਜ਼ੀ ਅਖਬਾਰ ਅਨੁਸਾਰ ਇਸ ਪ੍ਰੋਜੈਕਟ ਦਾ ਮੁੱਖ ਉਦੇਸ਼ ਵਾਤਾਵਰਣ ਵਿਚ ਹੋ ਰਹੀ ਗਿਰਾਵਟ ਨੂੰ ਖਤਮ ਕਰਨਾ ਅਤੇ ਸਮੁੱਚੀ ਮਾਨਵਤਾ ਨੂੰ ਕੁਦਰਤ ਨਾਲ ਜੋੜਨਾ ਹੈ।

ਯੋਜਨਾ ਨਾਲ ਸਬੰਧਤ ਸਿੱਖਾਂ ਮੁਤਾਬਕ ਨਵੰਬਰ ਵਿਚ ਜਦੋਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਜਨਮ ਦਿਨ ਹੋਵੇਗਾ ਤਾਂ ਉਦੋਂ ਤਕ 10 ਲੱਖ ਬੂਟੇ ਲਾਉਣ ਦਾ ਟੀਚਾ ਹਾਸਲ ਕਰ ਲਿਆ ਜਾਵੇਗਾ। ਵਾਸ਼ਿੰਗਟਰ ਡੀਸੀ ਦੀ ਈਕੋਸਿੱਖ ਸੰਸਥਾ ਦੇ ਪ੍ਰਧਾਨ ਅਤੇ  ਮਿਲੀਅਨ ਟ੍ਰੀ ਪ੍ਰੋਜੈਕਟ ਦੇ ਕੋਆਰਡੀਨੇਟਰ ਰਾਜਵੰਤ ਸਿੰਘ ਨੇ ਕਿਹਾ ਕਿ ਉਹ ਗੁਰੂ ਨਾਨਕ ਦੇਵ ਦੇ ਇਸ ਗੁਰਪੁਰਬ ਨੂੰ ਅਲੱਗ ਤਰੀਕੇ ਨਾਲ ਮਨਾਉਣਾ ਚਾਹੁੰਦੇ ਹਨ।

ਇਸ ਯੋਜਨਾ ਤਹਿਤ ਈਕੋਸਿੱਖ ਸੰਸਥਾ ਨੇ ਹਜ਼ਾਰਾਂ ਗੁਰਦੁਆਰਿਆਂ ਅਤੇ ਭਾਰਤ, ਮਲੇਸ਼ੀਆ, ਪਾਕਿਸਤਾਨ, ਯੂਐਸ, ਯੂਕੇ, ਅਸਟ੍ਰੇਲੀਆ, ਫਰਾਂਸ, ਹੋਂਗ-ਕਾਂਗ, ਨਾਰਵੇ ਸਮੇਤ ਹੋਰ ਕਈ ਦੇਸ਼ਾਂ ਦੀਆਂ ਸੰਸਥਾਵਾਂ ਦਾ ਸਹਿਯੋਗ ਲਿਆ ਹੈ। ਇਕ ਰਿਪੋਰਟ ਅਨੁਸਾਰ ਪਰਵਾਸੀ ਸਿੱਖਾਂ ਨੇ ਹਜ਼ਾਰਾਂ ਦਰਖਤ ਪਹਿਲਾਂ ਹੀ ਲਗਾ ਦਿੱਤੇ ਹਨ ਅਤੇ ਜ਼ਿਆਦਾਤਰ ਦਰਖਤ ਭਾਰਤ, ਯੂਕੇ, ਯੂਐਸ, ਅਸਟ੍ਰੇਲੀਆ ਅਤੇ ਕੀਨੀਆ ਵਿਚ ਲਗਾਏ ਗਏ ਹਨ।

ਰਾਜਵੰਤ ਸਿੰਘ ਨੇ ਕਿਹਾ ਕਿ ਗੁਰੂ ਨਾਨਕ ਦੇਵ ਜੀ ਕੁਦਰਤ ਨੂੰ ਪਿਆਰ ਕਰਦੇ ਸਨ, ਗੁਰੂ ਨਾਨਕ ਦੇਵ ਜੀ ਨੇ ਬਾਣੀ ਵਿਚ ਵੀ ਜ਼ਿਕਰ ਕੀਤਾ ਹੈ ਕਿ ਕਿਵੇਂ ਸਾਨੂੰ ਕੁਦਰਤ ਤੋਂ ਜਿੰਦਗੀ ਦਾ ਪਾਠ ਸਿੱਖਣਾ ਚਾਹੀਦਾ ਹੈ। ਉਹਨਾਂ ਕਿਹਾ ਕਿ ਉਹਨਾਂ ਨੂੰ ਆਸ ਹੈ ਕਿ ਇਸ ਉਪਰਾਲੇ ਨਾਲ ਸਿੱਖ ਭਾਈਚਾਰੇ ਅਤੇ ਨੌਜਵਾਨ ਪੀੜੀ ਦੇ ਕੁਦਰਤ ਨਾਲ ਪਿਆਰ ਵਿਚ ਵਾਧਾ ਹੋਵੇਗਾ। ਇਸ ਯੋਜਨਾ ਤਹਿਤ ਕੌਵੈਂਟਰੀ ਸਥਾਨਾਂ ਵਿਚ 550 ਦਰਖਤ ਲਗਾਏ ਜਾਣਗੇ ਅਤੇ ਕਈ ਥਾਵਾਂ ‘ਤੇ ਦਰਖਤ ਲਗਾ ਦਿੱਤੇ ਗਏ ਹਨ।

ਸਿੱਖ ਯੂਨੀਅਨ ਕੋਵੈਂਟਰੀ ਦੇ ਚੇਅਰਮੈਨ ਪਲਵਿੰਦਰ ਸਿੰਘ ਚੰਨਾ ਨੇ ਕਿਹਾ ਕਿ ਸਿੱਖ ਹੋਣ ਦੇ ਨਾਤੇ ਕੁਦਰਤ ਨਾਲ ਸਾਡਾ ਸਬੰਧ, ਸਾਡੀ ਪਛਾਣ ਦਾ ਅਨਿੱਖੜਵਾਂ ਅੰਗ ਹੈ। ਉਹਨਾਂ ਕਿਹਾ ਕਿ ਸਾਡੀ ਮਿਹਨਤ ਦਾ ਫਲ ਆਉਣ ਵਾਲੀ ਪੀੜੀ ਨੂੰ ਮਿਲੇਗਾ। ਸਬੰਧਤ ਸਿੱਖਾਂ ਮੁਤਾਬਕ ਨਵੰਬਰ ਵਿਚ ਜਦੋਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਜਨਮ ਦਿਨ ਹੋਵੇਗਾ ਤਾਂ ਉਦੋਂ ਤਕ 10 ਲੱਖ ਬੂਟੇ ਲਾਉਣ ਦਾ ਟੀਚਾ ਹਾਸਿਲ ਕਰ ਲਿਆ ਜਾਵੇਗਾ।