Interfaith Commonwealth Peace Conference

ਰੋਮ (ਜਸਵਿੰਦਰ ਕੌਰ): ਇਟਲੀ ਦੀ ਰਾਜਧਾਨੀ ਰੋਮ ਵਿਖੇ ਸਮਾਪਤ ਹੋਏ ''ਸਰਬ ਧਰਮ ਸਾਂਝਾ ਵਿਸ਼ਵ ਸ਼ਾਂਤੀ ਸੰਮੇਲਨ'' ਦੌਰਾਨ ਸਿੱਖ ਧਰਮ ਵਿਚਲਾ ਅਮਨ, ਸ਼ਾਂਤੀ ਅਤੇ ਸਾਂਝੀਵਾਲਤਾ ਦਾ ਸੁਨੇਹਾ ਸਾਰਿਆਂ ਲਈ ਖਿੱਚ ਦਾ ਕੇਂਦਰ ਅਤੇ ਪ੍ਰੇਰਣਾਮਈ ਸਾਬਤ ਹੋਇਆ।

ਇਸ ਸੰਮੇਲਨ ਦੌਰਾਨ ਈਸਾਈਆਂ ਦੇ ਧਰਮ ਗੁਰੂ ਪੋਪ ਫ਼ਰਾਂਸਿਸ ਸਮੇਤ ਵਿਸ਼ਵ ਦੇ ਅੱਠ ਧਰਮਾਂ ਦੀਆਂ ਪ੍ਰਮੁੱਖ ਸ਼ਖ਼ਸੀਅਤਾਂ ਨੇ ਸ਼ਿਰਕਤ ਕੀਤੀ। ਸਿੱਖ ਧਰਮ ਵਲੋਂ ਕਰਮਜੀਤ ਸਿੰਘ ਢਿੱਲੋਂ 15 ਮੈਂਬਰੀ ਵਫ਼ਦ ਸਮੇਤ ਪਹੁੰਚੇ। ਉਨ੍ਹਾਂ ਵਿਸ਼ਵ ਦੀ ਸ਼ਾਂਤੀ ਲਈ ਸਿੱਖ ਧਰਮ ਦੀ ਅਰਦਾਸ ਕੀਤੀ ਅਤੇ ਸਿੱਖ ਧਰਮ ਦੇ ਅਮਨ ਸਦਭਾਵਨਾ ਵਾਲੇ ਸਿਧਾਂਤ ਤੋਂ ਜਾਣੂ ਕਰਵਾਇਆ ਜਿਸ ਤੋਂ ਪੋਪ ਫ਼ਰਾਂਸਿਸ ਅਤੇ ਉਥੇ ਹਾਜ਼ਰ ਇਟਲੀ ਦੇ ਰਾਸ਼ਟਰਪਤੀ ਸੇਰਜੋ ਮਾਤੇਰੇਲਾ ਵੀ ਬਹੁਤ ਜ਼ਿਆਦਾ ਪ੍ਰਭਾਵਤ ਹੋਏ।

''ਵਰਲਡ ਪੀਸ ਬੁੱਕ'' ਉਤੇ ਦਸਤਖ਼ਤ ਵੀ ਕੀਤੇ ਗਏ। ਇਸ ਵਰਲਡ ਪੀਸ ਬੁੱਕ ਨੂੰ ਆਉਣ ਵਾਲੇ 500 ਸਾਲਾਂ ਲਈ ਵੈਟੀਕਨ ਸਿਟੀ ਵਿਚ ਵਿਸ਼ਵ ਸ਼ਾਂਤੀ ਸੁਨੇਹੇ ਦੀ ਵਿਰਾਸਤ ਵਜੋਂ ਸਾਂਭ ਕੇ ਰਖਿਆ ਜਾਵੇਗਾ। ਇਸ ਪ੍ਰਕਾਰ ਸੰਸਾਰ ਵਿਚ ਸ਼ਾਂਤੀ ਬਣਾਈ ਰੱਖਣ ਲਈ ਹੋ ਰਹੇ ਉਪਰਾਲਿਆਂ ਦੀ ਲੜੀ ਤਹਿਤ ਇਹ ਸ਼ਾਂਤੀ ਸੰਮੇਲਨ ਇਕ ਮੀਲ ਪੱਥਰ ਹੋ ਨਿਬੜਿਆ। ਇਸ ਮੌਕੇ ਮਨਜੀਤ ਸਿੰਘ, ਅਜੀਤ ਸਿੰਘ, ਗੁਰਵਿੰਦਰ ਕੁਮਾਰ, ਗਿਆਨੀ ਲਖਵਿਦਰ ਸਿੰਘ ਬਖਸ਼ੀ ਸਿੰਘ ਤਰਲੋਚਨ ਸਿੰਘ ਵੀ ਮੌਜੂਦ ਸਨ।