Baljinder Kang and Sukhjinder Pooney Gang

ਲੰਡਨ: ਵਿਦੇਸ਼ਾਂ ਵਿਚ ਵਸੇ ਬਹੁਤ ਸਾਰੇ ਪੰਜਾਬੀਆਂ ਨੇ ਅਪਣੀ ਮਿਹਨਤ ਅਤੇ ਲਗਨ ਸਦਕਾ ਵੱਡੀਆਂ ਮੱਲਾਂ ਮਾਰੀਆਂ ਹਨ ਅਤੇ ਦੇਸ਼ ਕੌਮ ਦਾ ਨਾਂਅ ਰੌਸ਼ਨ ਕੀਤਾ ਹੈ ਪਰ ਕੁੱਝ ਅਜਿਹੇ ਪੰਜਾਬੀ ਵੀ ਹਨ ਜੋ ਗ਼ਲਤ ਕੰਮ ਕਰਕੇ ਦੇਸ਼ ਅਤੇ ਕੌਮ ਨੂੰ ਬਦਨਾਮ ਕਰਨ ਵਿਚ ਕੋਈ ਕਸਰ ਨਹੀਂ ਛੱਡ ਰਹੇ। ਤਾਜ਼ਾ ਮਾਮਲਾ ਇੰਗਲੈਂਡ ਦਾ ਹੈ, ਜਿੱਥੇ ਇਕ ਅਪਰਾਧਿਕ ਗਰੋਹ ਚਲਾਉਣ ਵਾਲੇ ਦੋ ਪੰਜਾਬੀਆਂ 31 ਸਾਲਾ ਬਲਜਿੰਦਰ ਕੰਗ ਅਤੇ 34 ਸਾਲਾ ਸੁਖਜਿੰਦਰ ਪੂਨੀ ਨੂੰ  ਕਿੰਗਸਟਨ ਦੀ ਅਦਾਲਤ ਵੱਲੋਂ 18 ਅਤੇ 16 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਗਰੋਹ ਵਿਚ 11 ਮੈਂਬਰ ਹਨ, ਜਿਨ੍ਹਾਂ ਨੂੰ ਕੁੱਲ ਮਿਲਾ ਕੇ 70 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ।

ਦਰਅਸਲ ਬ੍ਰਿਟੇਨ ਦੀ ਪੁਲਿਸ ਨੇ ਇਨ੍ਹਾਂ ਦੋਵੇਂ ਪੰਜਾਬੀਆਂ ਨੂੰ ਜਨਵਰੀ 2018 ਵਿਚ ਗ੍ਰਿਫ਼ਤਾਰ ਕੀਤਾ ਸੀ। ਇਨ੍ਹਾਂ 'ਤੇ ਜਾਅਲੀ ਕੰਪਨੀਆਂ ਰਾਹੀਂ ਨਸ਼ੀਲੇ ਪਦਾਰਥਾਂ ਦੀ ਸਮਗਲਿੰਗ ਰਾਹੀਂ ਇਕੱਠੇ ਹੋਏ ਪੈਸੇ ਦਾ ਗ਼ੈਰ ਕਾਨੂੰਨੀ ਲੈਣ ਦੇਣ ਕਰਨ ਅਤੇ ਪੈਸੇ ਨੂੰ ਦੁਬਈ ਦੇ ਖ਼ਾਤਿਆਂ ਵਿਚ ਜਮ੍ਹਾਂ ਕਰਵਾਉਣ ਦਾ ਦੋਸ਼ ਹੈ। ਇੰਗਲੈਂਡ ਦੇ ਕ੍ਰਾਈਮ ਅਤੇ ਲਾਅ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕੰਗ ਤੇ ਪੂੰਨੀ ਫੜੇ ਜਾਣ ਦੇ ਡਰੋਂ ਆਪਣੇ ਮੋਬਾਈਲ ਫ਼ੋਨ ਬਦਲਦੇ ਰਹਿੰਦੇ ਸਨ। ਪੁਲਿਸ ਨੂੰ ਕੰਗ ਕੋਲੋਂ ਇਕ ਕਾਪੀ ਵੀ ਬਰਾਮਦ ਹੋਈ ਸੀ, ਜਿਸ ਵਿਚ ਉਸ ਨੇ ਨਸ਼ਿਆਂ ਦੀਆਂ ਵੱਡੀਆਂ ਖੇਪਾਂ ਦੀ ਖ਼ਰੀਦੋ–ਫ਼ਰੋਖ਼ਤ ਦੇ ਸਾਰੇ ਵੇਰਵੇ ਲਿਖੇ ਹੋਏ ਹਨ। ਉਹ ਜ਼ਿਆਦਾਤਰ ਵੂਲਵਰਹੈਂਪਟਨ, ਬਰਮਿੰਘਮ ਅਤੇ ਵਿਗਾਨ ਵਿਚ ਨਸ਼ਿਆਂ ਦੀ ਸਪਲਾਈ ਕਰਦੇ ਸਨ ਪਰ ਹੁਣ ਪੁਲਿਸ ਦੀ ਪਕੜ ਵਿਚ ਆਏ ਇਹ ਪੰਜਾਬੀ ਕਈ ਸਾਲਾਂ ਤਕ ਜੇਲ੍ਹ ਦੀ ਚੱਕੀ ਪੀਸਣਗੇ।

ਇੱਥੇ ਹੀ ਬਸ ਨਹੀਂ, ਇੰਗਲੈਂਡ ਦੇ ਸਕਾਟਲੈਂਡ ਯਾਰਡ ਵਿਚ ਵੀ ਇਕ ਹੋਰ ਪੰਜਾਬੀ ਦਾ ਕਾਰਾ ਸਾਹਮਣੇ ਆਇਆ ਹੈ ਜੋ ਲੰਡਨ ਪੁਲਿਸ ਵਿਚ ਤਾਇਨਾਤ ਹੈ। ਪੰਜਾਬੀ ਪੁਲਿਸ ਅਧਿਕਾਰੀ ਹਰਦੀਪ ਦੇਹਲ ਨੂੰ ਬੀਮੇ ਦੇ 16 ਲੱਖ ਰੁਪਏ ਭਾਵ 18415 ਪੌਂਡ ਹੜੱਪਣ ਲਈ ਧੋਖਾਧੜੀ ਕਰਨ ਦਾ ਦੋਸ਼ੀ ਪਾਇਆ ਗਿਆ, ਜਿਸ ਕਰਕੇ ਉਸ ਨੂੰ ਤੁਰੰਤ 30 ਮਹੀਨਿਆਂ ਦੀ ਹਿਰਾਸਤ ਵਿਚ ਲੈਣ ਦੀ ਸਜ਼ਾ ਸੁਣਾਈ ਗਈ ਹੈ। ਦਰਅਸਲ ਬੀਮੇ ਦੀ ਮੋਟੀ ਰਕਮ ਲੈਣ ਲਈ ਹਰਦੀਪ ਦੇਹਲ ਨੇ ਝੂਠ–ਮੂਠ ਦੇ ਸੜਕ ਹਾਦਸੇ ਦਾ ਨਾਟਕ ਰਚਿਆ ਤੇ ਫਿਰ ਬੀਮੇ ਦੀ ਰਕਮ ਵਸੂਲ ਕੀਤੀ।

ਸਰਕਾਰੀ ਵਕੀਲਾਂ ਮੁਤਾਬਕ ਇਕ ਡਿਲੀਵਰੀ ਵੈਨ ਦੇ ਡਰਾਇਵਰ ਰਈਅਨ ਅਨਵਰ ਨੇ ਵੀ ਆਪਣੇ ਜ਼ੁਰਮ ਦਾ ਇਕਬਾਲ ਕਰ ਲਿਆ। ਇਹ ਸਭ ਮਾਰਚ 2016 ਦੌਰਾਨ ਵਾਪਰਿਆ ਸੀ ਜਦੋਂ ਉਸ ਨੇ ਗਿਣੀ ਮਿਥੀ ਯੋਜਨਾ ਤਹਿਤ ਪੂਰਬੀ ਲੰਦਨ ਵਿਚ ਆਪਣੀ ਵੈਨ ਨੂੰ ਇਕ ਕਾਰ ਨਾਲ ਜਾ ਟਕਰਾਇਆ ਸੀ, ਜਿਸ ਵਿਚ ਦੇਹਲ ਸਮੇਤ ਪੰਜ ਵਿਅਕਤੀ ਬੈਠੇ ਸਨ। ਪੁਲਿਸ ਅਧਿਕਾਰੀ ਹਰਦੀਪ ਦੇਹਲ ਨੇ ਝੂਠਾ ਦਾਅਵਾ ਕਰਦਿਆਂ ਕਿਹਾ ਸੀ ਕਿ ਹਾਦਸੇ ਦੌਰਾਨ ਉਸ ਦੇ ਸੱਟਾਂ ਲੱਗੀਆਂ ਹਨ ਤੇ ਉਸ ਦੇ ਬਹੁਤ ਜ਼ਿਆਦਾ ਦਰਦ ਹੋ ਰਿਹਾ ਹੈ।

ਟੈਸਕੋ ਦੀ ਬੀਮਾ ਕੰਪਨੀ ਵੈਨ ਡਰਾਈਵਰ ਦੀ ਗ਼ਲਤੀ ਮੰਨਦੇ ਹੋਏ ਬੀਮੇ ਦੀ ਰਕਮ ਦੇਣ ਲਈ ਸਹਿਮਤ ਵੀ ਹੋ ਗਈ ਸੀ ਪਰ ਜਾਂਚ ਅਧਿਕਾਰੀਆਂ ਨੇ ਜਦੋਂ ਅਚਾਨਕ ਹਰਦੀਪ ਦੇਹਲ ਤੇ ਵੈਨ ਡਰਾਈਵਰ ਅਨਵਰ ਦੀਆਂ ਫ਼ੋਨ–ਕਾਲਾਂ ਦੇ ਵੇਰਵੇ ਚੈੱਕ ਕੀਤੇ ਤਾਂ ਹਰਦੀਪ ਦੀ ਸਾਰੀ ਸਾਜਿਸ਼ ਦਾ ਭਾਂਡਾ ਫੁੱਟ ਗਿਆ। ਕਿੰਨੇ ਦੁੱਖ ਦੀ ਗੱਲ ਹੈ ਕਿ ਮਿਹਨਤ ਅਤੇ ਲਗਨ ਕਾਰਨ ਜਿਹੜੇ ਪੰਜਾਬੀਆਂ 'ਤੇ ਅੱਜ ਪੂਰੇ ਵਿਸ਼ਵ ਵੱਲੋਂ ਮਾਣ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਵਿਚੋਂ ਹੀ ਕੁੱਝ ਪੰਜਾਬੀ ਗ਼ਲਤ ਕੰਮਾਂ ਵਿਚ ਸ਼ਾਮਲ ਹੋ ਕੇ ਸਮੁੱਚੇ ਪੰਜਾਬੀ ਭਾਈਚਾਰੇ ਨੂੰ ਬਦਨਾਮ ਕਰਨ ਵਿਚ ਲੱਗੇ ਹੋਏ ਹਨ। ਵਿਦੇਸ਼ਾਂ ਵਿਚ ਗਲ਼ਤ ਕੰਮਾਂ ਵਿਚ ਪਏ ਇਨ੍ਹਾਂ ਪੰਜਾਬੀਆਂ ਨੂੰ ਮਿਹਨਤ ਅਤੇ ਇਮਾਨਦਾਰੀ ਦੀ ਰੋਜ਼ੀ ਰੋਟੀ ਕਮਾਉਣੀ ਚਾਹੀਦੀ ਹੈ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook ਤੇ ਲਾਈਕ Twitter  ਤੇ follow ਕਰੋ।