ਹੇਮੀਲਟਨ : ਨਿਊਜੀਲੈਂਡ ਨੇ ਸੈਡਨ ਪਾਰਕ ਮੈਦਾਨ ਉਤੇ ਐਤਵਾਰ ਨੂੰ ਖੇਡੇ ਗਏ ਤੀਸਰੇ ਟੀ - 20 ਮੁਕਾਬਲੇ ਵਿਚ ਭਾਰਤ ਨੂੰ ਦੋ ਦੌੜਾਂ ਨਾਲ ਹਰਾ ਦਿਤਾ। ਇਸ ਦੇ ਨਾਲ ਮੇਜ਼ਬਾਨ ਟੀਮ ਨੇ ਤਿੰਨ ਮੈਚਾਂ ਦੀ ਲੜੀ 3 - 0 ਨਾਲ ਜਿੱਤ ਲਈ। ਭਾਰਤੀ ਟੀਮ 162 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਸਿਮਰਤੀ ਮੰਧਾਨਾ (86) ਦੀ ਤੇਜ਼ ਅਰਧ ਸੈਂਕੜਾ ਪਾਰੀ ਦੀ ਬਦੌਲਤ ਇਕ ਸਮਾਂ ਜਿੱਤ ਦੀ ਸਥਿਤੀ ਵਿਚ ਸੀ।

ਪਰ ਹੌਲੀ - ਹੌਲੀ ਮੈਚ ਉਸ ਦੇ ਹੱਥੋਂ ਨਿਕਲ ਗਿਆ ਅਤੇ ਉਹ 20 ਓਵਰਾਂ ਵਿਚ ਚਾਰ ਵਿਕੇਟਾਂ ਦੇ ਨੁਕਸਾਨ ਉਤੇ 159 ਦੌੜਾਂ ਹੀ ਬਣਾ ਸਕੀ। ਨਿਊਜੀਲੈਂਡ ਵਲੋਂ ਸੋਫੀ ਡਿਵਾਇਨ ਨੇ ਦੋ ਵਿਕੇਟ ਲਏ। ਇਸ ਤੋਂ ਪਹਿਲਾਂ ਸੋਫੀ ਡਿਵਾਇਨ (72) ਦੇ ਤੇਜ਼ ਅਰਧ ਸੈਂਕੜਾ ਦੀ ਬਦੌਲਤ ਨਿਊਜੀਲੈਂਡ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 20 ਓਵਰਾਂ ਵਿਚ ਸੱਤ ਵਿਕੇਟਾਂ ਉਤੇ 161 ਦੌੜਾਂ ਬਣਾਈਆਂ।

52 ਗੇਂਦਾਂ ਉਤੇ 8 ਚੌਕੇ ਅਤੇ ਦੋ ਛੱਕੇ ਲਗਾਉਣ ਵਾਲੀ ਡਿਵਾਇਨ ਤੋਂ ਇਲਾਵਾ ਸੂਜੀ ਬੈਟਸ ਨੇ 24 ਅਤੇ ਕਪਤਾਨ ਐਮੀ ਸੈਦਰਵੇਟ ਨੇ 31 ਦੌੜਾਂ ਦਾ ਯੋਗਦਾਨ ਦਿਤਾ। ਭਾਰਤ ਵਲੋਂ ਦੀਪਤੀ ਸ਼ਰਮਾ ਨੇ ਦੋ ਵਿਕੇਟ ਲਏ ਜਦੋਂ ਕਿ ਅਰੁੰਧਤੀ ਰੈਡੀ , ਰਾਧਾ ਯਾਦਵ , ਮਾਨਸੀ ਜੋਸ਼ੀ ਅਤੇ ਪੂਨਮ ਯਾਦਵ ਨੂੰ ਇਕ - ਇਕ ਸਫ਼ਲਤਾ ਮਿਲੀ।