ਪੈਰਿਸ ਓਲੰਪਿਕ ’ਚ ਅਮਨ ਇਕੋ ਇਕ ਭਾਰਤੀ ਪੁਰਸ਼ ਭਲਵਾਨ, ਜੈਦੀਪ ਅਤੇ ਸੁਜੀਤ ਕੁਆਲੀਫਾਇਰ ’ਚ ਹਾਰੇ

ਇਸਤਾਂਬੁਲ: ਸੁਜੀਤ ਕਾਲਕਲ ਅਤੇ ਜੈਦੀਪ ਅਹਲਾਵਤ ਨੂੰ ਐਤਵਾਰ ਨੂੰ ਵਿਸ਼ਵ ਕੁਆਲੀਫਾਇਰ ਵਿਚ ਅਪਣੇ  ਵਿਰੋਧੀਆਂ ਨੂੰ ਸਖਤ ਚੁਨੌਤੀ  ਦੇਣ ਦੇ ਬਾਵਜੂਦ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਿਸ ਨਾਲ ਪੈਰਿਸ ਓਲੰਪਿਕ ਖੇਡਾਂ ਵਿਚ ਦੇਸ਼ ਦੀ ਨੁਮਾਇੰਦਗੀ ਕਰਨ ਲਈ ਸਿਰਫ ਇਕ ਪੁਰਸ਼ ਭਲਵਾਨ ਅਮਨ ਸਹਿਰਾਵਤ ਹੀ ਰਹਿ ਗਏ ਹਨ।

ਸੁਜੀਤ ਨੇ 65 ਕਿਲੋਗ੍ਰਾਮ ਕਾਂਸੀ ਦੇ ਤਗਮੇ ਲਈ ਅਹਿਮ ਮੁਕਾਬਲੇ ’ਚ ਅਮਰੀਕਾ ਦੇ ਜੇਨ ਐਲਨ ਰਦਰਫੋਰਡ ਨੂੰ ਚੁਨੌਤੀ  ਦਿਤੀ  ਪਰ ਜਵਾਬੀ ਹਮਲੇ ’ਚ ਉਤਾਰ-ਚੜ੍ਹਾਅ ਕਾਰਨ ਮੈਰਿਟ ’ਚ 2-2 ਨਾਲ ਹਾਰ ਗਏ। ਸੁਜੀਤ ਨੇ ਜਵਾਬੀ ਹਮਲਾ ਕੀਤਾ ਅਤੇ ਪਹਿਲਾ ਅੰਕ ਹਾਸਲ ਕੀਤਾ। ਉਹ ਟੇਕਡਾਉਨ ’ਤੇ  ਪੁਆਇੰਟ ਗੁਆਉਣ ਵਾਲਾ ਸੀ ਪਰ ਜਵਾਬੀ ਹਮਲੇ ਨਾਲ ਅਮਰੀਕੀ ਭਲਵਾਨ ਨੂੰ ਹੈਰਾਨ ਕਰ ਦਿਤਾ।

ਇਕ ਹੋਰ ਟੇਕਡਾਉਨ ਦੀ ਭਾਲ ਵਿਚ ਸਜੀਤ ਰਦਰਫੋਰਡ ਦੇ ਪਿੱਛੇ ਗਏ ਪਰ ਅਮਰੀਕੀ ਭਲਵਾਨ ਨੇ ਟੇਕਡਾਉਨ ਨਾਲ ਅੰਕ ਪ੍ਰਾਪਤ ਕੀਤਾ। ਰਦਰਫੋਰਡ ਨੇ ਜਿੱਤ ਲਈ ਸਕੋਰਲਾਈਨ ਬਣਾਈ ਰੱਖੀ। ਸੁਜੀਤ ਦੀ ਹਾਰ ਦਾ ਮਤਲਬ ਇਹ ਵੀ ਹੈ ਕਿ ਡੋਪ ਟੈਸਟ ਲਈ ਅਪਣਾ  ਨਮੂਨਾ ਦੇਣ ਤੋਂ ਇਨਕਾਰ ਕਰਨ ਕਾਰਨ ਮੁਅੱਤਲ ਕੀਤੇ ਗਏ ਬਜਰੰਗ ਪੂਨੀਆ ਦੀ ਪੈਰਿਸ ਖੇਡਾਂ ’ਚ ਹਿੱਸਾ ਲੈਣ ਦੀਆਂ ਉਮੀਦਾਂ ਟੁੱਟ ਗਈਆਂ ਸਨ।

ਜੈਦੀਪ ਨੇ ਤੁਰਕਮੇਨਿਸਤਾਨ ਦੇ ਅਰਸਲਾਨ ਅਮਾਨਮਿਰਾਦੋਵ ਦੇ ਵਿਰੁਧ  74 ਕਿਲੋਗ੍ਰਾਮ ਰੇਪੇਚੇਜ ਮੈਚ ਜਿੱਤਿਆ ਪਰ ਉਹ ਸਥਾਨਕ ਦਾਅਵੇਦਾਰ ਸੋਨੇਰ ਡੇਮਿਰਤਾਸ ਦੇ ਵਿਰੁਧ  ਕੁੱਝ  ਖਾਸ ਨਹੀਂ ਕਰ ਸਕਿਆ ਅਤੇ ਕਾਂਸੀ ਦੇ ਤਗਮੇ ਦਾ ਮੈਚ 1-2 ਨਾਲ ਹਾਰ ਗਿਆ।

ਪੈਰਿਸ ’ਚ ਭਾਰਤ ਦੇ ਦਲ ’ਚ ਪੰਜ ਔਰਤਾਂ ਸਮੇਤ ਛੇ ਭਲਵਾਨ ਹੋਣਗੇ। ਭਾਰਤ ਲਈ ਮਹਿਲਾ ਵਰਗ ’ਚ ਵਿਨੇਸ਼ ਫੋਗਾਟ (50 ਕਿਲੋ), ਆਨੰਦ ਪੰਘਾਲ (53 ਕਿਲੋ), ਅੰਸ਼ੂ ਮਲਿਕ (57 ਕਿਲੋ), ਨਿਸ਼ਾ ਦਹੀਆ (68 ਕਿਲੋ) ਅਤੇ ਰਿਤਿਕਾ ਹੁੱਡਾ (76 ਕਿਲੋ) ਨੇ ਪੈਰਿਸ ਖੇਡਾਂ ਲਈ ਕੋਟਾ ਹਾਸਲ ਕੀਤਾ ਹੈ।

ਇਹ ਵੇਖਣਾ ਦਿਲਚਸਪ ਹੋਵੇਗਾ ਕਿ ਕੀ ਭਾਰਤੀ ਕੁਸ਼ਤੀ ਫੈਡਰੇਸ਼ਨ (WFI) ਭਾਰਤੀ ਟੀਮ ਦੀ ਚੋਣ ਕਰਨ ਲਈ ਟਰਾਇਲ ਕਰਵਾਏਗਾ ਜਾਂ ਕੋਟਾ ਜੇਤੂਆਂ ਨੂੰ 26 ਜੁਲਾਈ ਤੋਂ ਸ਼ੁਰੂ ਹੋਣ ਵਾਲੀਆਂ ਖੇਡਾਂ ’ਚ ਦੇਸ਼ ਦੀ ਨੁਮਾਇੰਦਗੀ ਕਰਨ ਦੀ ਇਜਾਜ਼ਤ ਦੇਵੇਗਾ।