Ellyse Perry powers RCB into women premier league playoffs

Women's Premier League:  ਮਹਿਲਾ ਪ੍ਰੀਮੀਅਰ ਲੀਗ 2024 ਵਿਚ ਬੀਤੀ ਸ਼ਾਮ ਮੁੰਬਈ ਇੰਡੀਅਨਜ਼ ਅਤੇ ਰਾਇਲ ਚੈਲੇਂਜਰਜ਼ ਬੰਗਲੁਰੂ ਟੀਮ ਵਿਚਕਾਰ ਮੈਚ ਖੇਡਿਆ ਗਿਆ ਸੀ। ਇਸ ਦੌਰਾਨ ਆਰਸੀਬੀ ਦੀ ਟੀਮ ਨੇ ਇਹ ਮੈਚ 7 ਵਿਕਟਾਂ ਨਾਲ ਜਿੱਤ ਲਿਆ। ਇਹ ਮੈਚ ਦੋਵਾਂ ਟੀਮਾਂ ਲਈ ਬਹੁਤ ਮਹੱਤਵਪੂਰਨ ਸੀ।

ਜੇਕਰ ਮੁੰਬਈ ਇੰਡੀਅਨਜ਼ ਇਹ ਮੈਚ ਜਿੱਤ ਜਾਂਦੀ ਤਾਂ ਉਹ ਪਹਿਲੇ ਸਥਾਨ 'ਤੇ ਆ ਜਾਂਦੀ ਅਤੇ ਸਿੱਧੇ ਫਾਈਨਲ ਲਈ ਕੁਆਲੀਫਾਈ ਕਰ ਲੈਂਦੀ ਪਰ ਹੁਣ ਅਜਿਹਾ ਹੋਣਾ ਲਗਭਗ ਅਸੰਭਵ ਹੈ। ਉਸ ਦੀ ਟੀਮ ਹੁਣ ਅੰਕ ਸੂਚੀ ਵਿਚ ਦੂਜੇ ਸਥਾਨ 'ਤੇ ਹੈ ਅਤੇ ਉਸ ਨੂੰ ਐਲੀਮੀਨੇਟਰ ਮੈਚ ਵਿਚ ਆਰਸੀਬੀ ਨਾਲ ਮੈਚ ਖੇਡਣਾ ਪੈ ਸਕਦਾ ਹੈ। ਜਦਕਿ ਆਰਸੀਬੀ ਦੀ ਟੀਮ 8 ਮੈਚਾਂ ਵਿਚ 4 ਜਿੱਤਾਂ, 4 ਹਾਰਾਂ ਅਤੇ 8 ਅੰਕਾਂ ਨਾਲ ਤੀਜੇ ਸਥਾਨ 'ਤੇ ਹੈ।

ਮੁੰਬਈ ਇੰਡੀਅਨਜ਼ ਅਤੇ ਰਾਇਲ ਚੈਲੇਂਜਰਜ਼ ਬੰਗਲੁਰੂ ਵਿਚਾਲੇ ਖੇਡੇ ਗਏ ਮੈਚ 'ਚ ਆਰਸੀਬੀ ਦੀ ਕਪਤਾਨ ਸਮ੍ਰਿਤੀ ਮੰਧਾਨਾ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਅਰੁਣ ਜੇਤਲੀ ਸਟੇਡੀਅਮ 'ਚ ਖੇਡੇ ਗਏ ਇਸ ਮੈਚ ਨੂੰ ਦੇਖਣ ਲਈ ਲਗਭਗ 23,000 ਲੋਕ ਪਹੁੰਚੇ ਸਨ ਅਤੇ ਇਹ ਦੋਵੇਂ ਟੀਮਾਂ ਲਈ ਜ਼ਬਰਦਸਤ ਖੇਡ ਸੀ। ਇਸ ਮੈਚ 'ਚ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਮੁੰਬਈ ਇੰਡੀਅਨਜ਼ ਦੀ ਟੀਮ 19 ਓਵਰਾਂ 'ਚ 113 ਦੌੜਾਂ 'ਤੇ ਆਲ ਆਊਟ ਹੋ ਗਈ। ਆਰਸੀਬੀ ਨੇ 15 ਓਵਰਾਂ ਵਿਚ 3 ਵਿਕਟਾਂ ਗੁਆ ਕੇ 115 ਦੌੜਾਂ ਬਣਾਈਆਂ ਅਤੇ ਇਸ ਟੀਚੇ ਦਾ ਪਿੱਛਾ ਬੜੀ ਆਸਾਨੀ ਨਾਲ ਕਰ ਲਿਆ। ਆਰਸੀਬੀ ਦੀ ਜਿੱਤ ਦੇ ਨਾਲ, ਯੂਪੀ ਵਾਰੀਅਰਜ਼ ਅਤੇ ਗੁਜਰਾਤ ਜਾਇੰਟਸ ਦੀਆਂ ਡਬਲਯੂਪੀਐਲ ਪਲੇਆਫ ਲਈ ਉਮੀਦਾਂ ਖਤਮ ਹੋ ਗਈਆਂ ਹਨ। ਹੁਣ ਉਸ ਦੀ ਟੀਮ ਚਾਹ ਕੇ ਵੀ ਕੁਆਲੀਫਾਈ ਨਹੀਂ ਕਰ ਸਕੇਗੀ।

ਐਲਿਸ ਪੇਰੀ ਨੇ ਰਚਿਆ ਇਤਿਹਾਸ

ਸਟਾਰ ਆਲਰਾਊਂਡਰ ਐਲਿਸ ਪੇਰੀ ਨੇ ਮੁੰਬਈ ਇੰਡੀਅਨਜ਼ ਖਿਲਾਫ ਖੇਡੇ ਜਾ ਰਹੇ ਮੈਚ 'ਚ ਇਤਿਹਾਸ ਰਚਿਆ ਹੈ। ਉਹ ਮਹਿਲਾ ਪ੍ਰੀਮੀਅਰ ਲੀਗ ਦੇ ਇਕ ਮੈਚ ਵਿਚ ਸੱਭ ਤੋਂ ਵੱਧ ਵਿਕਟਾਂ ਲੈਣ ਵਾਲੀ ਗੇਂਦਬਾਜ਼ ਬਣ ਗਈ। ਇਸ ਮੈਚ 'ਚ ਐਲਿਸ ਪੇਰੀ ਨੇ 4 ਓਵਰ ਗੇਂਦਬਾਜ਼ੀ ਕਰਦੇ ਹੋਏ ਸਿਰਫ 15 ਦੌੜਾਂ ਹੀ ਦਿਤੀਆਂ ਅਤੇ 6 ਵਿਕਟਾਂ ਲਈਆਂ। ਇਸ ਤੋਂ ਪਹਿਲਾਂ ਕਿਸੇ ਵੀ ਗੇਂਦਬਾਜ਼ ਨੇ ਮਹਿਲਾ ਪ੍ਰੀਮੀਅਰ ਲੀਗ ਵਿਚ ਇਕ ਮੈਚ ਵਿਚ 6 ਵਿਕਟਾਂ ਨਹੀਂ ਲਈਆਂ ਸਨ।

(For more Punjabi news apart from Ellyse Perry powers RCB into women premier league playoffs, stay tuned to Rozana Spokesman)